Read Nyishi NYIJWQ 3 Bible Online

NYIJWQ 3 - Nyishi bible

NYIJWQ 3

¹Hog luuxy gab mood ak doodwn, hoo nyodo nvg niikum so doonbo pagoq goqxy gab mood ak doodwn:

²Ko bwwdy mood ak doodwn, hoo sidy mood ak doodwn; liid mood ak doodwn, hoo hoggv liinum ham bupaq de mood ak doodwn;

³mengdy mood ak doodwn, hoo mwp dv mood ak doodwn; mvpia dv mood ak doodwn, hoo mvrab dv mood ak doodwn;

⁴Xabdy mood ak doodwn, hoo nyirdy mood ak doodwn; nyix-riid mood ak doodwn, hoo noso soomin dv mood ak doodwn;

⁵wlw tulungam hurpaq dv mood ak doodwn, hoo wlw tulungam doorkum dv mood ak doodwn; svgagvrwq dv mood ak doodwn, hoo svgagvrwq maadynam mood ak doodwn;

⁶meegaq dv mood ak doodwn, hoo topaq dv mood ak doodwn; pvvcum dv mood ak doodwn, hoo hurpaq dv mood ak doodwn;

⁷Swrc dv mood ak doodwn, hoo hvmsiq dv mood ak doodwn; gombeq maab dood mood ak doodwn, hoo agam goody mood ak doodwn;

⁸aby dv mood ak doodwn, hoo oyum dv mood ak doodwn; nyob pady mood ak doodwn, hoo swrso mood ak doodwn.

⁹‍Mwwg hentwr henl bonam nyin bov hognvkv niqtuq doodwn?

¹⁰‍Pwnbov nyia koam nyoma maam dvb jiknam nyomangam ngo kaat kun.

¹¹‍Mood jaqho mwv hog mwlwngam kangam dvb mvpa kun. Mwv nyia kog hang uralo nwrba cwtam mam kam jilwq pakun, hvbsujaqkam nyirab hoqgv nyitwr-nyinya nagub Pwnbo hoggv nyipa kun ham mwv cengyum nyoram.

¹²‍Bulug swwnam bumpw ho hwnyir-hvmar la alwb bon nyinam aoho ngo bul gab hog gokam alyad kaaparam;

¹³‍ho mwwg hog mwlw hentwr henam ho nyiicwr-cwrxiv dvl-twwl hoo hemp dvb nyidwn — soq si Pwnbog nyia koam lvqc cinamv.

¹⁴‍Ngoqg mwwnamv Pwnbo hognvkv xeq nyidwn hv nwrba gob doodwn; hoqho hog akam vbw dvb nyima dvn, ho hog akam hoqgv naapaq dvb nyima dvn. Hoqgab nyiilungam mwwg agaho bos som dvb, Pwnbov soq sam mvpa kun.

¹⁵‍Otuq hoqgv soq sam doom pakun, ho hoggv doota namham doom pakun, hoo hognvkam aadob ruqpaq pakun ham Pwnbov meegaq dvn.

¹⁶‍Hoq aoho, ngoqg kaanamv nyodo nvg niikum so jvqtw dooiyinko ho nyic-nyiya ngvkam doonum, hoo dvrwq dooiyinko ho nyic-nyiya ngvkam doonum.

¹⁷‍Ngoqg hang lo ngo benum, Pwnbov jvqtw boam la nyic-nyiya boam pw-hwwtayin, hoggab hog mwlw pagoq goqxy gab la hog mwlw nyis gab mood ak doodwn.

¹⁸‍Ngoqg hang lo ngo benum, nyia ko tulungam bulv atv svdin nvbo hvl kaapa cengm dvb pooka dvn.

¹⁹‍Ho hoggv nyia ko tulungam nyipan hoo hoggv svdin tulungam nyipan hv luukinv; hoggab akwg sinam, hvbkalam asaqkv kam sidwn. Bul mwlwg saqnamv luukin dvn, hoo nyia kov svdinam hila yaama dvn, hoggab hog mwlwngv niqtuq dookma.

²⁰‍Mwlwngv nyook akin gol wtayin, mwlwngv diimwr hoqgv, hoo mwlwngv diimwrb nyikur tai.

²¹‍Hiyv cengdwn nyia kog yalv aob caakam suiyv hoo svding yalv swcw urab haakam suiyv?

²²‍Hoqgab ngoqg kaanamv nyia ko mwlwg bonam nyinamho hoo mwlw gab nvtaqnamho hwnyir-hvmar nammam alyanbo dooma dvn. Mwwg kokwb hoggv haata dvn ham hiyv mwam boal kaakin tayin?