Read Nyishi NYIJWQ 4 Bible Online

NYIJWQ 4 - Nyishi bible

NYIJWQ 4

¹Ngo lokta nyodo nvg niikum so hog mwlwngam nyijab-nyiyiqnam mam kaapanum. Hoo kaato nyijab-nyiyiqnam tulug nyiqsam, hoo bulam bet-bela bo akam doomnum! Nyijab-nyiyiqbo tulungv huqlwngam doognum, hoo bulam bet-bela bo akam doomanum.

²‍Hoo ngo sinam mam mwwpal mwwnum sikbo tulungam simab turl doonbo tulungv alyadwn hvl ngo mwwdwn.

³‍Hvbmabde nyodo nvg niikum so soq vnyi sam hiyvn ko bwwma daqpwn hoo almanbo bon nyinam tulungam kaapa maada dvn hv alyanbov.

⁴‍Ho ngo kaanum nyi akwg door-doopwngam kaaneqnamv mwwg hog mwlw hentwr henamv hoo mwlw bonam nyilaqnamv haadwn. Soq si kam niqtuq dookma hoo dooiyam nootul tanam hvb nyidwn.

⁵‍Paca bov mwwg alaqkam cikwq-lvqlwqtvl hoo mwv atv atam dvs dvn.

⁶‍Alaq lvqnyiv hentwrl nyil dooiyam nootu tanam hvb nyimmam lingsam alaq laqkin tvl swrsob doonamv alyadwn.

⁷‍Lokta, ngo kaanum nyodo nvg niikum so niqtuq dookma:

⁸‍Nyi ak nyi akam doog maanbo, hoo mwv ko tuup ho vbw-bor dooma su, hvbsujaqkam mwwg hog mwlw hentwr henamv hingtup dooma, hoo nywywngam nyet lvgab mwwg vnyiqkv xumt maadwn, hoqgab mwv nywywngam tox maadwn, “Hiyv gab ngo hentwr-hendu dvn hoo atwg hemp-hengam mam apaqnam?” Soq si kam niqtuq dookma hoo hemp maanam bon go.

⁹‍Vnyiv akinam alyadwn, hoggab bulug hentwr-nyijongv bulam aljaqb lvqc cipakun.

¹⁰‍Hoggab bulv yoql sujaqkam, mwwg ajin akwnv mwam purab tayin. Hvbmabde mwwdwqnamv hiyv vp-cwkw dvn hwdlo mwv yoql yin hoo mwam purabo nyi asaq dooma dvn!

¹¹‍Lokta, vnyiv lvkin gob karb nyiloqkam bunyiv ogdvn, hvbmabde vp-cwkwb akinv hoggab oggul doola tayin?

¹²‍Hoo vp-cwkwbo nyi ak akin kalam mam ceekol mvtur kamyi nvpv, hvbmabde nyi vnyiv mwam ceetor tayinsoum xipiumnam osongv nyebia jaqb puriq lama dvn.

¹³‍Axa tvl paca bo lvpw-atv nyi tomswrnam mam naadwb cengma boam, jwwgwbo akv la mwwlaqbo tuudy-yaamy tulungv alyadwn.

¹⁴‍Mwwg atwg lvpw-haty ho mwam jwwgwbob dwr buqskujaqkam, mwv pvtwq hoqgv lvpw-atwg pwqlw dootam kob wknum.

¹⁵‍Nyodo nvg niikum so biil tabl swwl doonbo mwlwngam, hoo hoq lvgab tuudy-yaamiv hiyv lvpw-atwg dook ho daqdy bo tulu ham ngo kaapanum.

¹⁶‍Mwwg wgnam nyiilu mwlwngv twryum maanum. Hvbsujaqkam mwwg kokwb haanbov mwam hwnyir-hvmar ram. Jvqtw jaqb soq si kam niqtuq dookma hoo dooiyam nootul tanam hvb nyidwn.