Read Nyishi NYIJWQ 5 Bible Online

NYIJWQ 5 - Nyishi bible

NYIJWQ 5

¹Hwdlo no Pwnbog namlob wikam noqg dwqkap kvbxiam hengab to. Ogumb hvvnwql tanamv alyadwn damabog pwr jinam mam, hoggab bulv hoggv almab nyidu dvn ham bulv cengma dvn.

²‍Noqg agamv nyebia jaqb goomabv, ho Pwnbog agaho noqg hangv nyebia jaqb gomcwram goosar dvb mwwmabv, hoggab Pwnbov ao gvda lo doodwn hoo no swcw nvg ao si doodwn. Hoqgab noqg gomcwr tulungam anyo go gooto.

³‍Hoggab yuma lo nyoma maasv vigo haadwn, hoo damabo akv vigo agam rooxo dvn.

⁴‍Hwdlo nulv Pwnbon dingrnam ak dingyin, ham jidwb nyin-nyip maabv, hoggab mwv damabo nyiaho hemp maadwn. Jito hoggv nulv dingr pan.

⁵‍No dingr peel hoo jimanamv no dingr maanamv alyadwn.

⁶‍Noqg agamv nam nyic urab wg komab, hoo pui baqnbo agaho nyixaq tubanyi hvl bemabv. Hoggub noqg agam goonam ho Pwnboam haaxaq mvdwn hoo noqg alaq bonam nyinam mam twrm tayin?

⁷‍Hoggab hwdlo yumangv vigo maaikam hoo agamv vigo gooikam, hoqhv niqtuq dook maadvn; hvbmabde Pwnbo akinvn no bos soky dvb nyidwn.

⁸‍Hwdlo nyook golo jwwgw boam nyijab-nyiyiqnam mam hoo jvqtw bvla dvrwqb nyimanam mam no kaapa yukam, hoq pagoq gab lomabv, hoggab saab koibo aoho hvraqb ham koi yaan bov kaal doodwn, hoo bul mwlwg aoho hvraqb koi yaanbo ak doodwn.

⁹‍Hvbmabde lvpw at akv rongo mvdwb mwr kunamv; gvdangam hojar-jarm dvn.

¹⁰‍Hiyv twngkam aby dvn, mwv twngk lvgab xumt ram, hvbkalam mwwg paanam lvgab gumn nanam mam abynamv; soq si kam niqtuq dookma.

¹¹‍Hwdlo dvs-twws naleq yukam, hoq tulu ham dvnbov kam naleq dvn, hoo gumn at tulungv hoggv niqtuq doodkun, hvbmabde mwwg vnyiqkv bulam kvvtwq taikun?

¹²‍Bon nyinbo akv anyob dvge koiywb dvge mwv yubngam alwb dvn hvbmabde nyetbo akv kepo dedeq sujaqkam yubngam alwb yuma dvn.

¹³‍Nyodo nvg niikum so vc-loodab almanbo ak ngo kaapa pakun: nyetam pvvnum si pvvnbo yangam mwur dvb mvdwn,

¹⁴‍hoo almanbo nyis ak nyigam gab nyet-nyeramv yuupaqnum. Hoo mwv ko akwg abv su, hvbmabde mwwg alaqho mwv hog akam doog maanum.

¹⁵‍Mwv mwwg annwg kepo hoqgv hoggub haanum hvbkalam mwv wkur tayin, talo tvl mwv haanum, hoo mwwg hentwr henl bon nyinam hoqgv mwwg alaqho hog akam bwwl wg kuram.

¹⁶‍Soq si kam vc-loodab almanbo akv; mwv hoggub haanum, hvbkalam mwv wkur tayin, hoo dooiyam nootu tanam hvb mwwg hentwr henl bon nyinam hoggv mwwg gab hognvk niqtuqkv doodkun?

¹⁷‍Hoq aoho, mwwg swwca mwlwho kan twdwqkam hoo alman boam hoo vc-cinam mam hoo haaxaqnam mam henl swwnum.

¹⁸‍Kaato, Pwnbog mwam nyodo nvg niikum so anyo mood gob swwl doom dvb jinam ho hiyv akv hog mwlw hentwr henam hoqgv dvl-twwl hwnyir-hvmar ram kaapa dvn hoqham ngo aldvb la jot dvb kaapa pakun, hoggab soq si mwam nvtaqnamv.

¹⁹‍Nyi vxiam Pwnbov gumn-ranam hoo doog-daqgnam mam hoo atoram hemp-hvnyir mvdwb jipa kun, hoo mwwg gab nvtaqnam mam loorwqto hoo mwwg hentwr henam ho hwnyir-hvmar to — soq si Pwnbog lvqc cinamv.

²⁰‍Hoggab mwv mwwg swwca aal tulungam koigo mwwpa kuram hoggab mwwg hang ura lo hemp lvgab Pwnbov mwam naol ap pakun.