Read Nyishi NYIJWQ 7 Bible Online

NYIJWQ 7 - Nyishi bible

NYIJWQ 7

¹Emin tangam bov xinam kutiam alyadwn, hoo sinam aalv ko bwwnam aalam alyadwn.

²Durum doodu ko nammwb wnam mam nyix-riidu ko nammwb wnamv alyadwn, hoggab soq si nyia ko tulug nyitwrv, hoo swwl doon bov sam hangho pvvtayin.

³Mwwdwqnamv nyirnam mam alyadwn, hoggab nyuqmwg mwwdwqnamv hangam hemp dvb mvdwn.

⁴Mwwlaqbo hangv nyix-riidu ko namho doodwn, hvbmabde damabo tulug hangv nyirmin-soominko namho doodwn.

⁵Damabo tulug beminam benam mam tammam lingsam mwwlaqbo nyi akwg yolu ruqnam mam tanamv alyadwn.

⁶Hoggab damabo tulug nyirminamv pwcw kooyungam tonyum-taa jwwko namhvb nyidwn; soq si kam niqtuq dookma.

⁷Jvqtw jaqb nyijab-nyiyiqnamv mwwlaq boam paca dvb mvdwn, hoo kam jinamv hangam nyiwq-nyito mvdwn.

⁸Nyinya kunamv pagoq akv hoqham nyirabnam mam alyadwn, hoo larl swwnam mam cwql swwnamv alyadwn.

⁹Nulug swwca lo nyebia jaqb haaxaq maabv, hoggab haaxaq bov dama bo tulug hoobum ho doodwn.

¹⁰“Kolwg moodv swnyw-soolog mood sam alyanum hvl”? Bemab. Hoggab no soq sam pumb ywrnam hoqgv tox maadwn.

¹¹Pumb ywrtaqnamv otu nvvsiqnam hvb aldvn, hoo hiyv doonyiam kaapa dvn hv hila yaadwn.

¹²Hoggab pumb ywrn bog ceetornamv twngkwg ceetornam hvb nyidwn, hoo pumb ywrtaqnamv nam cumdwn, soq si cenglaq laqjongv.

¹³Pwnbog bonam nyinam mam mwwdy kaato: hoggub mwv pvgw dvb mvknum ham hiyv dinda dvb mvnyi tan?

¹⁴‍Swwd-geed moodam hwnyir-hvmar to, hoo vs-axaq moodam mwwdy kaato: Pwnbov luunyi-luunyiam pwnum, hoqgab nyia kov hognvkv mwwg kokwb haata dvn ham kaapa ram.

¹⁵‍Ngoqg niqtuq doomab swwca yuk ho ngo hoolu luuxiam kaat kun. Jvqtw bo nyi akv mwwg jvqtwho yuupaq nukun, hoo nyic-nyiya bo nyi akv mwwg almab nyinamho mwv swwyul doodwn.

¹⁶‍Jvqtw twwxum maabv, hoo no atam vcjaqb mwwlaqbo hvb mwws maabv. Hoggab no atv atam twrs tadwn?

¹⁷‍Nyic-nyia haajaq maabv, dama maangar maabv. Hoggub noqg moodv haama taab no sis tadwn?

¹⁸‍No soq sam nootunamv aldo, hoo noqg alaq nootunam ham topaq maabv, hoggab hiyv Pwnboam bosdvn hoq akv hoolu-luuxig vs-axaq hoqgv keleqtayin.

¹⁹‍Bopam uraho wyw go pvvb bwwl doog boam ator yaadwb pumb ywrnamv mwwlaqbo nyi akam atoram jidwn.

²⁰‍Jvqtw jaqb swcw nvg aoso hiyv kam al bvla nywywngam nyic nyika maab nyiidar-takar nyi akam dooma dvn.

²¹‍Nyiilug pagoq goqxiam goonam mam hanglo tagab maabv, hvb nyibaloqkam noqg nyerangv nam beenam mam tapa sun pvla.

²²‍Noqg hangv cengdo no atv nyi asaqkam vigo beeknam mam.

²³‍Soq mwlw sam ngoqg pumb ywrnam hoqgv cengka pakun. Ngo benum, “Ngo mwwlaq tayin,” hvbmabde hoqhv ngoqg galoqkv vigo aadonum.

²⁴‍Hoq aado kiyo bo hv, hoo urwbo, urw koogw boam; hiyv sam meelin nyodwn?

²⁵‍Ngoqg hangv cengdwb mwwkanum hoo meelin dvb hoo pumb ywrnam mam kaapa dvb hoo mwonam pagoq tulungam, hoo dama bog nyic-nyiangam hoo dama maangar layil rugaqnam mam cengdwb.

²⁶‍Hoo ngo sinam mam koi yaab kacaqbo pagoq go kaapanam: hoqhv dvnwg hang lo pwd-poto bvla alaqlo tag kortunam hvb nyidwn. Hiyv Pwnboam hemp mvdwn hv mwnwg hoqgv keleqdvn, hvbmabde nyic boam mwn naag nukun.

²⁷‍Tomswrbo akv bedo, kaato, soq si hoggv ngo kaapa tukun, akwg pagoq ho asaqkam vbw yukam mwonam pagoq tulungam kaapa dvb —

²⁸‍hogloq ham ngoqg yvjv meedar-meedarl meegaqnum, hvbmabde ngo meepa kumanum. Lwwyw ak pengko ho ngo nyega ak kaapanum, hvbmabde hoq mwlw pengko ho ngo nyem akin gokam kaapa maanum.

²⁹‍Kaato, soq akin sam twq ngo kaapanum, Pwnbov nyia koam lootw dvb mvnum, hvbmabde bulv naleqgo pagoqkam mwwbuq lengknum.