Read Nyishi NYIJWQ 8 Bible Online

NYIJWQ 8 - Nyishi bible

NYIJWQ 8

¹Hiyv mwwlaqbo hvb nyidwn? Hoo hiyv agam goosiqnam pagoqkam cengdwn? Nyi akwg pumb ywrnamv mwwg nyuqm mam huum dvn, hoo mwwg mox-moiyanam nyuqm mam kwlydvn.

²‍Ngo bedwn: Lvpw atwg gamlam pvvto, hoggab Pwnbov mwam dingrwl bir jipa kun.

³‍Mwwg dook hoqgv kuduq-rvdaql wleqmabv. No alman pagoq gab nyemaq daqmabv, hoggab mwwg mwwlwqkob mwv nyidwn.

⁴‍Hoggab lvpw atwg gamlv gamr agamv, hoo hiyv mwam benyitayin, “No hoggv nyidu dvn?”

⁵‍Hiyv xeq gamlam pvvdwn hv almanam cengram, hoo mwwlaqbo hangv kvtaq moodam la jvqtw lamtangam cengtayin.

⁶‍Nyia kog vs-axaqkv mwwg aoho vgwl doosjaqkam hog luuxy gab moodv la lamtangv doodwn.

⁷‍Hoggab mwv cengma dvn hoggv nyita dvn, hoggab soq si hoggub nyitayin ham hiyv mwam betam nyotayin?

⁸‍Yalam parl ap dvb, ho sidy aalam mviya dvb nyi akam ator doog maadwn. Hiyam sim dvb jiknam mam nyob panam hoqgv, ho nyic-nyiya ngvkam roolinl naalin nyoram.

⁹‍Nyodo nvg niikum so soq hog mwlw sam nyinum hoqham ngo ngoqg hangwg nyiqmv kaatwn, hwdlo nyiv nyi akwg aoho ator dool ho mwam mwwr dvb nyinam hamkam kaatwn.

¹⁰‍Hoq kokw so ngo nyic-nyiangam liinam mam kaanum. Dvrwqbo nyook ho bulv haag gwi hoo leng gwi nyinum hoo hogloq bopamho bulv soq pagoq tulu sam nyinum hoqho paql doonum. Soq siikam niqtuq dookma.

¹¹‍Hoggab almab bon nyin boam nyebia jaqb ceekol pw-hwwma, hoqgab nyia ko tulug hangv almab nyidkub mwwr ap paku.

¹²‍Nyic nyinbo akv almab lwwyw taqt gob nyil swwyu sujaqkam, hvbmabde ngo cengdwn hiyv Pwnboam bosdvn hv altayin, hoggab bulv mwwg agaho bosdvn.

¹³‍Hvbmabde nyic-nyia bov alram ho swwyuram mwwg swwnam aalv yal bobo hvb nyitayin, hoggab mwv Pwnboam bos ma.

¹⁴‍Swcw aoso hog nyinam mwlw si niqtuq dookma, nyicbog nyijongam jvqtw bo nyiilug aoho haadwn, hoo jvqtw bo nyijongv nyicbog aoho haadwn. Ngo bedwn, soq siikam niqtuq dookma.

¹⁵‍Hoo ngo hemp gab bemin gvdwn, nyodo nvg niikum so nyia ko gab hog albo dookma hvbmabde dvl-twwl hwnyir-hvmarnamv twq, hoggab Pwnbov mwam nyodo nvg niikum so soq sam mwwg hentwr-kaanyi swwnam aalho mwwg lvgab nyil swwm dvb jipa kun.

¹⁶‍Hwdlo ngoqg hangv pumb ywrnam mam cengdwb mwwi yin, hoo swcw soqg nyis-mvsam kaaikam, hoggub yu ai-aalwb vnyiqkv yumy doomab nyid nui yu,

¹⁷‍ho ngo Pwnbog hog mwlw bonam nyinam mam kaanum, nyia kov nyodo nvg niikum so hoq bonam nyinam mam kaapa nyoma dvn. Hvbsujaqkam nyia kov vigo hentwr henl meegaq jaqkam, mwv sam meelin nyoram. Mwwlaqbo nyia ko akv cengdwn hvsjaqkam, mwv sam meepa nyoram.