Read Nyishi NYIJWQ 9 Bible Online

NYIJWQ 9 - Nyishi bible

NYIJWQ 9

¹Hvbmabde soq hog mwlw sam ngoqg hang so pvvnum, hoqg hog mwlw ham kaaka tukun, hoggub jvqtw bo la mwwlaqbo tulug bon nyinamv Pwnbog alaqho doodwn. Hoqhv abiv yv hoo oyumnamv ham nyia kov cengma dvn; soq vnyi-vnyi si mwwg agaho doodwn.

²‍Soq si mwlw gab aiyin dvn, hoggab soq nyinam luukin si jvqtw boam la nyic boam, alboam la alman boam, dvrwq boam la dvrwq maan boam, mwam pwr jinboam la pwr jima boam nyidwn. Albo akam nyinam hvbkalam nyimur bo akam nyidwn, hoo mwam hiyv dingr dvn hoo mwam hiyv dingr maadwn.

³‍Nyodo nvg niikum so soqg hog mwlw nyinam si almadwn, hoqg luukinv nyi mwlwngam nyidwn. Hoq lvgab nyia ko tulug hangv alman rooxo dvn, hoo bulug hangv rugaq dvn hvb mwwdar maab swwl doodwn, hoo hoq kokwb bulv sidkun.

⁴‍Hvbmabde hiyv swwl doonbo mwlw lvgab haanbo akv mwwgwngam kaapa dvn, hoggab sinbo sony nyot akam turl doonbo iky dorv alyadwn.

⁵‍Hoggab turl doon bov cengdwn bulv sitayin, hvbmabde sin bov hog akam cengma dvn, hoo bulv nyijo gokam kaapa ram, hoggab bulam mwwpa kuram.

⁶‍Bulug abynamv, oyumnamv hoo kaabynamv mwlwngv yuupaq nukun, hoo nyodo nvg niikum so nwrba xaqb bulug hog mwlw nyijongam bulv naapa kuram.

⁷‍Wg dvl, noqg dvsam hwnyir-hvmarl dvto, hoo hemp hang lvgab noqg roo alangam twwto, hoggab Pwnbov noqg nyinam-wnam mam loomin gvpa kun.

⁸‍Noqg lwxiam dvrwqbo vjam kooto. Noqg dumpo ho lwxiam kuty piaqto.

⁹‍Nyodo nvg niikum so mwwg nam niqtuq dook maanbo swwgam jiknam aal jinam mwlwho, noqg abynam nywxw lvgab hwnyir-hvmarl swwnam mam swwto, hoggab hoqhv noqg swwca lo nyidy sanamv hoo hoqhv nyodo nvg niikum so noqg hentwr hendy sanamv.

¹⁰‍Hognvkv xeq noqg alaqkv hengpal nyisv doodwn, ham no kwrw jaqb nyito, hoggab noqg wdy ko Sux-ywlwho bonam nyinam, mwwnam, cenglaqnam, hoo pumb ywrnam dookram.

¹¹‍Nyodo nvg niikum so ngo lokta kaapanum xarka sunamv nyebia jaqb xarnbo gabma, nyob panamv atorbo gabma, wtwngv mwwlaqbo gabma, nyetnamv cenglaqbo gabma, mwwswnamv cenglaqbo gabma, hvbmabde moodv la tubrwqnamv bul mwlwngam haadwn.

¹²‍Hoggab nyia kov mwwg moodam cengma dvn. Nguiyam wswqho tumtu namhvb hoo pvtangam gurw ho hoqtu namhvb nyia kongam swqa holwqnam hvbkalam almanbo moodv, nulam tumtu dvn.

¹³‍Soq doocil pumb ywrnam samkam, ngo nyodo nvg niikum so kaatkun, hoo soq sam ngo koijaq gob mwwt kun.

¹⁴‍Nyi anyo go doonbo bopam anyo ak doonum, hoo koibo lvpw at ak ham ceekol haabnv hoo ham gooyuml naareq kunum, hoqho koi jaqb ceeko mvdwb sulungam mvknum.

¹⁵‍Hvbmabde hoq uraho jwwgw tvl mwwlaqbo nyi ak doonum, hoo mwwg mwwlaq hoqgv bopam mam naalinum. Hvbsujaqkam hoq jwwgwbo nyi ak ham hiyvkam mwwpa maanum.

¹⁶‍Hvbmabde jwwgwbo nyi akwg pumb ywrnam mam oyuml hoo mwwg gomcwram tapa maas jaqkam, ngo bedwn pumb ywrnamv atornam mam alyadwn.

¹⁷‍Damabo tulug pengko lo lvpw atwg sogoqnam mam tammam lingsam mwwlaq bog gomcwr goonam tulungam cooikab tanamv alyadwn.

¹⁸‍Nyob panan nwwxo-svtam mam pumb ywrnamv alyadwn, hvbmabde nyicbo akv vigo alboam turm dvn.