Read Nyishi SOLOMONWG BEMIN 2 Bible Online

SOLOMONWG BEMIN 2 - Nyishi bible

SOLOMONWG BEMIN 2

¹Ngo Saron nyorog toqru opungv, lywpa hoqg lili opungv.

²Taa-haataq pengko lo lili opu doonam hvbkalam, ngoqg abynamv nyijwr tulug pengko lo doodwn.

³Nyoro pengko lo appel svvn daqnam hvbkalam, ngoqg abynam yaapa tulungv nyi tulug pengko lo doodo. Vcjaqb hemp lvgab ngo mwwg doonyium uraho doodwn, hoo mwwg aaxiv ngoqgab tiiswr dvngam jaqdvn.

⁴Mwv ngam dvmin-twwminko namho boanum, hoo mwwg abiv ngoqg aoso tomyumnam.

⁵Ngam roo aaxy romnunam lvgab dvl swwl doom dvn; appel aaxy lvgab dwjwq-dvbia mvtwb, hoggab ngo aby biol vc duku.

⁶Mwwg laqc alaqkam ngam dumtam mvnam hoo mwwg lvqbwq alaqkv ngam cvggab dvn!

⁷Siby tulungv la nyorog sudum tulu lvgab, Jerusalemwg nyem ko tulunga, ngo nulam yolu ruql bedwn, noqg abynamv xumt maalo noqg abiam huurab mvmabv.

⁸Ngoqg tumanam akwg yal go! kaato, puutu tulungam juqbo-juqyiql, yorn tulungam soobo-sooiyiql, mwv haado.

⁹Ngoqg tumanam akv siby hvb, ho dumb dumyo ko hvb nyido. Kaato, mwv tv daqdo, ngulug bvly langk tv, pupum hoqgv rocoqdo, pamto hoqgv kaalin do.

¹⁰Ngoqg tumanam akv ngam agam gool bedo: “Gorabto, ngoqg abynam, ngoqg kangam bo akv, hoo soqb haaleqto,

¹¹ho kaato, tapam poolv wnkuba; nyodongv hongin nukba.

¹²Opungv swcw aoso puulin yuku, bemin bid moodv haapa ku, hoo dvb-dvnv dunam mam ngulug gvda si tapa duku.

¹³Taoq svvn aaxiv ningd ku, hoo roo boolungv opu puubiq duku; bulv sungam boam sulin mvdo. “Gorabto, ngoqg abynam, ngoqg kangam bo akv, hoo soqb haaleqto,

¹⁴Pwlw niqtuq tol doonbo, ngoqg pwk yobur ra, swwxa ubu tol doon boa, ngam noqg nyuqm mam kaam tvb, ngam noqg guuliam tam tvb, hoggab noqg yalv tangam do, hoo noqg nyuqmv kangam do.

¹⁵Siyal tulungam ngul gab nootu tvb, siyal ko tulungv ngulug roo boolungam sooi yu paku, hoggab ngulug roo boolungv opu puubiq do.”

¹⁶Ngoqg tumanamv ngoqgv su, hoo ngo mwv gvsu; mwv lili opu tulu pengko lo dvminl yvdwn.

¹⁷Ar komc maady deedib, hoo aiyv niima deedib, ngoqg tumanam akv sudum hvb, ho dumb dumyo ko hvb puutu ao lo wkurto.