Read Nyishi SOLOMONWG BEMIN 3 Bible Online

SOLOMONWG BEMIN 3 - Nyishi bible

SOLOMONWG BEMIN 3

¹Aiyam ngoqg kartam nan aoho ngoqg yvjwg abynam akam ngo mwam meegaqnum; ngo mwam meegaqnum, hvbmabde mwam meepa maanum.

²Ngo sija gorab layil hoo bopam wtayin, lyobu buux lo hoo cuukiq-kiqx lo; ngoqg yvjwg abynam akam ngo mwam meegaq tayin, ngo mwam meegaqnum, hvbmabde mwam meepa maanum.

³Rvky bo tulungv hwdlo bulv bopam urab wdu yikho ngam kaapanum. “Hiyam noqg yvjv abynam akam no mwam kaapa namyv?”

⁴Hwdlo ngoqg yvjv hiyam ngo abynam dvn ham ngo kaapa yikho bulam ngo wbo-wiyiql wleqnum yv. Ngo mwam nootu apnum, hoo mwam wm mvmanum hwdlo ngo mwam ngoqg annwb boolwq maady deedib, hoo ngam dwr buqnbog pwqlw urab boolwq maady deedib.

⁵Siby tulungv la nyorog sudum tulu lvgab, Jerusalemwg nyem ko tulunga, ngo nulam yolu ruql bedwn, noqg abynamv xumt maalo noqg abiam huurab mvmabv.

⁶Swwty la sulum sungam bo lvgab sulin dvn, kwm-kor mvnbo akwg dook hoggv sungam bo hog mwlwngv sulin namhvb, hoggv yu deexa-rara alo wm muk hvb juuca dvn?

⁷Kaato, soq si Solomonnvn joonnan go! Ham atorbo nyi camx go doqyum do, tuugin Israelwg atorbo nyi go,

⁸bul mwlwngv lyoqr orioqkam buqdo hoo nyob palaq lvqtwrbo go, vx-cerv atwg lyoqr orioqkam buqtwl aiyig bos haaiyam ceetor do.

⁹Lvpw at Solomon mwam atam joonnanam Lebanonwg svvda hoqgv mvnum.

¹⁰Mwv hoqg swwrwngam rup hoqgv mvnum, langkam hun hoqgv mvnum, dootam mam lwwsa-lwwma bo toj lvgab mvnum; Jerusalem nyem ko tulug abiv urangam kangam dvb guj mvnum.

¹¹Jaiyonwg nyem ko tulunga, agab lengto, hoo lvpw at Solomonnvn mwwg annv mwwg nyem nvvdy aalho, mwwg hangv hemp pod aalho, mwam ywr dumtupam gvmnam mam kaato.