Read Nyishi SOLOMONWG BEMIN 4 Bible Online

SOLOMONWG BEMIN 4 - Nyishi bible

SOLOMONWG BEMIN 4

¹Kaato, ngoqg abynam, no kangam jaqdo, kaato, no kangam jaqdo! Noqg pulup yukam noqg vnyiq tulungv pwk yobur hvb nyido. Noqg dumpiv sibin bintwngv Gilead yordaho pojuq-juql namhvb nyido.

²Sviya vm reqxaqnam hvb hwrxaq layil daqlinbo hvb; mwlwngv bwwpiam sulayil; anyo tulu pengko hoqgv akam yuupaq maanam hvb noqg exiv nyido.

³Noqg naborv tan nwlw hvb nyido, hoo noqg agamv kangam jaqdo. Nam pulup yukam noqg nyuqmv annar peec pan hvb nyido.

⁴Noqg lwwpongv Debidg wlw lwwco ho soja mvnam hvb nyido; hoq aoho svtam lwwyw go haql pan, hoq mwlw hv nyob pan nan svtamv.

⁵Noqg oc conyiv sudum ko bwwpiamnam dornyiv, lili opu tulug pengko lo soominam hvb kangam do.

⁶Ar komc maadab, hoo ariyum kan maadab, ngo swwty puutu mwlwho hoo sulum lumtaq yorda ho wtayin.

⁷Ngoqg tumanam, no bumpwb kangam jaqdo; noqg uraho nyixin dooma.

⁸Ngoqg tvmw no, Lebanon hoqgv ngoqg lvgab haato; Lebanon hoqgv ngoqg lvgab haato. Amananwg dumpum hoqgv, Siner la Harmonwg dumpum hoqgv, sony nyot tulug lwwpwq hoqgv, hogga takarg puutu hoqgv wleq tuku.

⁹Ngoqg nyem ajina, ngoqg tvmw nga, no ngoqg hangam pugnukba; noqg vnyiqkv piodaq twqnamv, noqg dok-doqly gvnam akv hordaq kalam, ngoqg hangam no pugnukba.

¹⁰Ngoq nyem ajina, ngoqg tvmw nga, hwdjaqgo noqg abynamv kangam do! Noqg abynamv hwdjaqgo roo alangam alyado, hoo noqg gv paqnam kutiv mwlwg kutiam alyado!

¹¹Ngoqg tvmw nga, noqg nabor hoqgv tiiswr bov dilin do; tong-ngola ngvla gwwiyv noqg lyol ura hv doodwn; noqg vj koonam hoqgv suunamv Lebanon hoqgv sungam bo sulinam hvb sulin do.

¹²Ngoqg nyem ajina, ngoqg tvmw nga, no ngoqg boolug kortum nanv, iss subuq buqlinam mam tuuxa nanv, hvviyam lwwcaq tutum nanv.

¹³Noqg nviyin jurlin bov annar nviyin mwlwngam kaaby yaadwb aaxy jurlin bo hvb nyidwn, tamin hvbla nyingpo tiya hvb nyidwn,

¹⁴nyingpo tiya hoo alotiam, tiiswrbo svvnam la asing-taringam, sulum svvn mwlw lvgab swwty la alos, hoq lvgab hog mwlwngam sungam yaanbo kutiam xuqnum.

¹⁵Hvvi boolu iss buqlinbo hvb, xoombo iss sokum hvb nyidwn, hoo Lebanon hoqgv iss kucw tolinbo hvb nyidwn.

¹⁶Sudum daiyag dooiyv yirabto, hoo svko daiyag dooiyv yica to! Ngoqg boolu so yidaqto, hoq sungam bo kutiam yipupto. Ngoqg tumab abynam mam mwwg boolu ho haamto, hoo hoqg boolu hoqgv mwlwngam xibin yaanbo aaxiam dvmto.