Read Nyishi SOLOMONWG BEMIN 6 Bible Online

SOLOMONWG BEMIN 6 - Nyishi bible

SOLOMONWG BEMIN 6

¹Nyem tulug pengko lo mwlwngam kangam yaan boa, hog loqb noqg tumanamv wn kun? Hogloqb noqg tumanamv tobkur nukun, noqg lvgab ngulv mwam meegaq yindo?

²Boolungam gaql kaatab hoo lili opungam nookum taab, ngoqg tumanamv mwwg naleqgo opu dook boolub in kuba.

³Ngo ngoqg tumanam gv hoo ngoqg tumanamv ngoqgv; Mwv lili opu pengko ho gaql yvdwn.

⁴Ngoqg abynam, no Tirja hvbjaq kangam do, hoo Jerusalem hvb kangam do, jet vj lvgab Nyemaqkv piwr jwr-jwr dvb wnam hvb nyido.

⁵Noqg vnyiqkv ngam kaadaq maabv, hoggab noqg vnyiqkv ngam kaaya paku Noqg dumpiv sibin bintwngv Gilead yordaho pojuq-juql namhvb nyido.

⁶Sviya vm reqxaqnam hvb hwrxaq layil daqlinbo hvb; mwlwngv bwwpiam sulayil; anyo tulu pengko hoqgv akam yuupaq maanam hvb noqg exiv nyido.

⁷Nam pulup yukam noqg nyuqmv annar peec pan hvb nyido.

⁸Hoqho kooriv camxgo hoo xwwbaq nywxwngv campiin go, hoo mvvngamv xinya lamab dvb doonam.

⁹Ngoqg pwk yoburv, ngoqg jubtaq-kvlaq bov, akin ciqnyi gotwq, hoqhv mwnwg annwg hoqg mvvtum akinv, mwnwn ko bwwnbov nyiidar nyemv. Nyijwr mwlwngv mwnwn kaatwl hoo xinam gonyi hvnum; kooriv la xwwbaq nywxw tulu ngvkam bulv mwnwn paqnum.

¹⁰“Hiyv soq si arkomc gv cwwnyiaq hvb kaabab dvn, pool hvb kangam dvn, doonyi hvb huupi dvn, jet vj lvgab nyemaqkv piwr jwr-jwr dvb wnam hvb nyidwn?”

¹¹Xoox svvn opu dwmw-dvma twqb puunam mam, roo svvnv jurd bwdwq, annar opu puud bwdwq, kaatab ngo lywpab innum.

¹²Ngoqg cengma ta otuqb, ngoqg mwwby nammam ngoqg nyi tulug lvpw atwg ko tuupwg ceriot pengko lo ngam pvvdwn.

¹³Hookurto, hookurto, Sulam nyi nga, hookurto, hookurto, ho ngulv nam kaaiyin do. Sipai vnyig agaho noso soonam mam kaanam hvb, no hoggab Sulam nyiam kaadwn?