Read Nyishi SOLOMONWG BEMIN 7 Bible Online

SOLOMONWG BEMIN 7 - Nyishi bible

SOLOMONWG BEMIN 7

¹Xinam nyem ko tulunga, hwdjaqgo noqg lvpia lo samtaqnan gvnamv kangam do! Nyisam nyilaqbo akwg alaqkv mvnam hvb noqg bumba mvla bo xarpongv hun-rup hvb nyido.

²Noqg xinv taqro bo pvtaq lo roo ala twws mviyonamv nywywngam asar maan bov, Noqg kepongv wtw am agaqkv, lili opungv doqyumnamv.

³Noqg oce sudum ko bwwpiamnam, dornyi hvb soomin do,

⁴Noqg lwwpongv svt vxy hoqgv soja mvnam hvb nyido. Noqg vnyiqkv Bat-rabbim toggoq bviywrg Hesbon ura lo sviyin yintumnamv. Noqg nyupumv Damaskas daiyab kaabo bo Lebanonwg soja hvb nyido.

⁵Noqg dumpongv Karmelam ywr dumtup hvb nyido, hoo noqg sorlbo dumkwqkv lwwsa-lwwma toj hvb nyido; lvpw at akam dumpy uraho tuml appa.

⁶Abynam aka, noqg hwrcnam ho, no hwdjaqgo kangam bvla hemp-hvnyirnam go!

⁷Noqg gv aiyaqkv pvng svvn hvb nyido, hoo noqg oce hoqg opium hvb nyido.

⁸Ngo bedwn ngo pvng svvnwb duqcal hoo hoqg aaxiam gvbwl dootayin. Noqg oce roo opium hvb nyinka, hoo noqg saqlinamv appel aaxy hvb suunka,

⁹hoo noqg agamv mwlwngam twwngam yaanbo roo ala hvb nyinka Hoqham ngoqg abynamv lyocaq-lyomaql, twwngam alwb twwdwn.

¹⁰Ngo ngoqg abynam ak gv, hoo ngo mwwg mwwbinamv.

¹¹Haato, ngoqg abynam, kuj ngulv rongo rwqtaqb wnuj hoo nampam tuluho yubgaq taju;

¹²kuj ngulv komc jaqb roo boolub lengnuj hoo roo opu puunam puumanam mam, roo opungv puubar pabadwq hoo annar opungv puupa bwdwq kaata ju. Ngoqg nam abynam mam ngo alo jitayin.

¹³Mandrak tulungv sungam boam sulin do, hoo ngulug viyap bviywrho dviyin bo aaxiv, nitiv kam ho kucuq kvkam doodwn, ngoqg tumanam ma, hoqham ngo noqg gab pvvcuml ap jipa kun.