Read Nyishi AIJAYA 1 Bible Online

AIJAYA 1 - Nyishi bible

AIJAYA 1

¹Amojwg ko tuup Aijayag nyiqry kaanamv, hwdlo Ujjaya, Jotam, Ahaj, hoo Hejekiya Judag lvpw atwb swwiyik aalho mwv Juda gvla Jerusalemwg pagoqkam kaapanum.

²Doangv, tato, hoo swcw no ruucw kwrgab to; hoggab At Sw agam goopa kun: “Ko tulu ngo nulam sorabl hoo akam dvb mvnum, hvbmabde bulv ngam taleql ceeko paku.

³Svv hvvbv atam, hoo svdamv atwg dvk dokam mam cengdwn, hvbmabde Israelv hog cenglaq kuma, ngoqg nyiilungv mwwlaq kuma.”

⁴Nyimurbo nyob tulunga, nyixiaq lvgab vgw baqn bo nyiilu ak, almab nyinbo ko hosiq tulungv, ko tulungv nyibum-nyiyiq nyidwn! Bulv At Swn apaq paku, bulv Israelwg Dvrwqbo Akam oyum pakun, bulv twrkub tumin supa kun.

⁵Hoggub nam hvraqb jwwt bvk hvdwn? Hoggub no tamab nyidu keetayin? Dumpo pwpwngv vc do, hoo hang pwpwngv swnyiq-svnyiaq do.

⁶Lvc koro hoqgv dumrwq tvqyw nagub, hoqho albo akam dooma, hvbmabde yaamam-yaaraml hoo un rooxo do hoo un tulungv leelaq busur do; un tulungam kuty lvgab xaml nwwjab dvb nwwka kama.

⁷Noqg nyookv deexa-rara tvl doodwn; noqg bopam tulungam wm lvgab gunum; noqg kaagaho nyoodo nyiilungv noqg kedam naanya gvnkun; hoqham nyoodo nyiilungv damyaql deexa-rara dvb mvnam hvb nyidkun.

⁸Hoo Jaiyonwg nyem koam roo boolu ho taabongam, boolu lo doonu ko booyapam, naalil naareqnam bopam mam apaqnam hvb apaq pakun.

⁹Nyiit At Sw ngulug tuugin swwm mvma nyiloqkam, ngulv Sodom hvb nyikam kuba nvpv, hoo Gomorra hvb nyik banpv.

¹⁰Sodomg nyig-wgbo tulungv, At Swg gaml sam tato! Gomorrag nyiilungv, ngulug Pwnbog tomswrnam mam ruucw-kwrgab to!

¹¹“Nulug naleqgo pwr jinam si ngoqgab hoggv? At Sw bedwn; yaap tvmwr tulungam parl aky jinamv hoo jwwtwl ox xupiabo svdinam ngoq gab aky jinamv laleq-kaakeq dvb jot paku; hvvb tulug, ho sviya tulug, ho sibin tulug hijum ho ngo hwnyir-hvmar maadwn.

¹²“Hwdlo no ngoqg agaho haal daqlin yin, hiyv nam goqnam ngoq pw-hwwkam cvvmwq mvdwb?

¹³Niqtuq dooma bo aky tulungam bwa kumabv; sulum suunam mam ngo bulum-kac dukun. Pool karlin namla hoo Doonu aalam goqkumnam mam— Nyixiaqnam la piwr jwr-jwr dvb dookumnam mam ngo cwqla kuma.

¹⁴Noqg nit poolam la noqg dvl-twwl soomin dvb mood xipnam mam ngoqg yvjv oyum dvn; hoq tuluhv ngam mwwdwq mvm pakun; ngo bulam cwqnanv nyelin-dorsil nyidu dvn.

¹⁵Hwdlo no noqg alaqkam yamga yin, ngoqg vnyiqkam ngo noqg hoqgv kvs tayin; no naleqgo swgw jaqkam, ngo tagab ram; hoggab no sony mingdum twqdo.

¹⁶Nulv atv hwrxaqto, nulv atv dvrwq dvb mvto; nulug almab nyinam tulungam ngoqg vnyiq kaaga hoqgv mvpaqto; alman boam nyik maabv,

¹⁷alboam nyidwb cengto; jvqtwngam meegaqto, nyijab-nyiyiqnam mam bedar to; ab dooma boam jvqtwngam jito, xwwmig pagoq gab goojto.

¹⁸At Sw bedo, “Sija haato, ngulv lvkin gob pagoqkam hwwbam tuj: noqg nyimurnam tulungv lwwda-kvla bo toj hvb nyisjaqkam, bulv tapam hvb puulu huutayin; bulv lwwcw-kwrwqbo toj hvb nyisjaqkam, bulv svcaq hvb puulu tayin.

¹⁹Nulug nyinw-wnwl hoo tvjw bvnyiloqkam, nulug gvda hoqg albo dvsam dvtayin;

²⁰hvbmabde nulv haqpaql hoo tamab yolu pabnyiloqkam, nulug lyoqr niqtuqb wtayin; hoggab At Swg agam hoqgv goolin pakun.”

²¹Mwn jvqtw rooxonam, hoggub yu dengky bo bopamv yojobo gob nyipa kun! Mwnwg uraho jvqtwngv doonum, hvbmabde sija sony mengdu duku.

²²Noqg rupv tvk dookma, noqg pootuqkam iss lvgab tooyonum.

²³Noqg lvpw atwg tuup tulungv tamab yolu pado hoo dvco bo ajin dvparb nyido. Vx-cerv kam naanam mam aby do hoo aky jikwb xarmin gvdo (aky kokwb xarmin gvdo). Bulv ab dooma boam jvqtwngam jima, hoo xwwmig bvrwqkv bulug dook ho haama dvn.

²⁴Hoqgab At Sw bibwqdo, nyiit At Sw, Israelwg Xitorbo Akv: “Ngoqg ceebio tulu hoqgv ngo meeg saqsor tayin hoo ngoqg ceebio tulungam ngo atv laqm bvrwq mvtayin.

²⁵Ngoqg alaqkv nam ngo ceeko tayin hoo tvk dooma boam jiqxa mvtayin hoo noqg mviyonam dvcwngam naapaq tayin.

²⁶Hoo otuqcob ngo noqg nyegam tulungam bookur tayin, hoo otuqjaqb noqg tomswr-hony bo tulungam. Kokwngam nam jvqtw bvla dengky bo bopam gob goqtayin.”

²⁷Jaiyonam jvqtw hoqgv, hoo hiyv mwnwg uraho dvrwq hoqgv mwwkur tayin hoq tulu ham pvlyw tayin.

²⁸Hvbmabde tamab yolu dunbo tulungam la nyimur bo tulungam lvkin gob mwmwq tayin, hoo hiyv At Swn apaqdvn hoq tulu ham twryum tayin.

²⁹Hoggab bulug mwwbynam kora svvn tulungv bulam hvnyw mvmtayin; hoo nulug boolu xuqnamv nulam hvnyw nyipa tayin.

³⁰Hoggab nulv kora svvn okv rwxaqbo hvb nyitayin, hoo iss toomanam boolu hvb nyitayin;

³¹Hoo atorbov urum tayin, hoo mwwg bonam mwwjwr jwrtayin, hoo vnyi-vnyiam lvkin gob parpaq tayin, bulam hiyv kam mwmiqram.