Read Nyishi AIJAYA 10 Bible Online

AIJAYA 10 - Nyishi bible

AIJAYA 10

¹Hiyv almanbo pvvbam gambwq dvn, hoo xeqn bov hiyv nyijab-nyiyiqnam mam xiqdu dvn,

²dwc-twwpw maan boam jvqtw hoqgv wiyeq mvdwn hoo ngoqg jwwgwbo nyiilug nyidynam mam naalil naareq dvn, xwwmy tulungv bulug mucu-mviya namgob, hoo ab dooma boam bulug mengn bob nyin boam, mwwdwq mvm to!

³Laqm baqd aalam, aado hoqgv mucu-mviya taab haan boam no hoggv mvtayin? No hiyam svka kotab ketayin, hoo noqg gumn sam hoglo pvvxa kubv?

⁴Hog akkam dookram hvbmabde pvtwq doonbo pengko lo geqp mvdwn, ho mengnam pengko ho yoqlwq mvdwn. Hoggab mwwg haaxaqnam mwlwngv wpaq maata dvn, hoo mwwg alaqkv sija xaqb ijin tvl dooxiq dvn.

⁵Assiriya nga, ngoqg haaxaqnam dvvcw; ngoqg hang lengnamv bulug alaqg beqnyiangv!

⁶Dormo dooma bo nyob nyi tulungam ceeko mvdwb mwam kanam pan, ngoqg hang lingtwrnam nyiilungam ngo mwam bidwq pakun, bulam lamta lo kacam somcu-samya namhvb, hoo mucu-mviyal hoo naalil naareq mvdwn.

⁷Hvbmabde mwv nyidwb tuuka kvla maasu, hoo mwwg hangv hvb nyidwb mwwma su; hvbmabde soq si mwwg hang ura lo twrm tvs mwwnamv, hoo anyo go nyob tulungam mengpaq tvs mwwma dvn;

⁸hoggab mwv bedwn: “Ngoqg sipai saab mwlwngv lvpw at maai yv?

⁹Kalno Karkemis hvb nyima yv? Hamat Arpad hvb nyima yv? Samariyangv Damaskas hvb nyima yv?

¹⁰Ngoqg alaqkv murtig lvpw-haty ho ic pakun hvb nyido, hiyvg alaq taqnam guss tulungv Jerusalem mam la Samariyangam koi yaadwn,

¹¹ngo hoggub Samariya ngamla mwnwg guss tulungam mwmwqnam hvb ngo Jerusalem mam la mwnwg murty tulungam mwmwqram yv?”

¹²‍Hwdlo At Sw mwwg bonam mwlwngam Jaiyon puutu aoho la Jerusalemho nyiyum yukun, mwv Assiriyag lvpw atwg hang larl agam goonam mam la mwwg vnyiq kaanam mam laqm-baqm tayin.

¹³‍Hoggab mwv bedo: “Ngoqg alaq ator hoqgv ngo sam nyipa kun, hoo ngoqg mwwlaq hoqgv ngo cengp kun; ngoqg vrr ho doonbo nyiilungam ngo mvpaq pan, hoo bulug gumnam naareq pan; pwqlw aoho doon boam sv hvvb baqgeqnam hvb baqgeq pakun.

¹⁴Ngoqg alaqkv nyiilug gumnam osup hupa namhvb hupa pakun; hoo apaq kunam pwpam dorkumnam, hoq hvbkalam ngo swcw mwlwngam nookum pakun; hoo alapam mvdinbo ho agam mam kuqko bo ho cum dvb mvnbo akkam dook maanum.”

¹⁵Bwwtwl pan nvnbo atam vxv koi sviya nvi yv, bwwtwl peenbo akam peen nanv koi sviya nvi yv? Dvvcwngv joorab boam joorab kuram hvl hwqdin namhvb, beqnyiangv naarab boam wsw naarab namhvb naarab kuram hvvma dvn!

¹⁶Hoqgab nyiit At Sw mwwg pwbwb nyob paky bog pengko lo vc mwp lamanam mam kanam tayin, hoo mwwg yuunam uraho wm gunam hvb gurab mvtayin.

¹⁷Israelwg hutongv wmv hoo mwwg Dvrwqbo Akv moilib nyitayin, hoo hoqhv gul hoo aal lookin ho mwwg taa-haageqkam la iky ningc taa-ngam gutwr tayin.

¹⁸Mwwg yuunam nyorongam la mwwg diibuqbo nyookam At Sw gv vdinam la yvjam twrtayin, hoo hoqhv vcbo nyiv cipaq tayin.

¹⁹Ko anyongv xiqpw maadwb mwwg nyoro lo svvnv anyo go daqtayin.

²⁰‍Hoq aalam Israelwg boumnam mvla Jakub nambu ho swwl doon bov hiyv bulam jiitabo aoho hingw kuram, hvbmabde Israelwg Dvrwqbo Akwg At Swg jvqtw aoho hingw tayin.

²¹‍Boumnam akv, hoo Jakubg nambu ho boumnam, atorbo Pwnbo dookub hookur tayin.

²²‍Hoggab noqg Israelwg nyiilungv sa-svlo lo xuqx hvb nyis jaqkam, boumnam tulungam aro hookur mvtayin. Ocu-aiyanamv pvvb bibwqnamv, hvbsujaqkam dvrwq jvqtw lvgab topoq-toloq mvtayin.

²³‍Hoggab nyiit At Sw, swcw mwlwg pengko so, pvvb bibwql mutum looda tayin.

²⁴‍Hoqgab soq sib nyiit At Sw bedo: “Ngoqg nyiilunga, hiyv Jaiyon lo doodwn, Assiriyangam bos maabv hwdlo bulv dvvcw lvgab jwwjaqkam hoo Ijipt nyi tulungv nyinam hvb bulug beqnyiangv nam ceekol lwwrab sujaqkam.

²⁵‍Hoggab oyu maab ngoqg hang lengnamv lengnya tadku, hoo ngoqg haaxaqnamv bulam ocu-aiya mvdwb tuugab pakun.

²⁶‍Hoo Oreb wlw ho Midian nyiilungam jwwnam hvb, nyiit At Sw bulam ceekol xipwql jwwtayin. Hoo mwwg beqnyiangv sa-svlo aoho jwwdaqnam hvb, hoo Ijipt aoho lwwrabl jwwnam hvb jwwtayin.

²⁷‍Hoo hoq aalam mwwg vgwngv noqg gorbw hoqgv wpaq tayin, hoo noqg lwwpo hoqgv mwwg lwwpaqkam naapaq tayin; hoo bobuq ko-gab lwwpaqkv vmwq yumgub nyitayin.”

²⁸Mwv Aiyat ho haapa kun; mwv Migronwb wpeq pakun; mwv Mikmas ho mwwg cukam boqkuml ap pakun;

²⁹bulv toggoqb wpeq pakun, bulv Geba lo hoq aiho yubnum; Ramangv tvmdwr do; Gibeag Soul keleq nukun.

³⁰Gallim gv nyem ko tulunga, sogoql xabto! Laisanga, Anatotwg jwwgwbo tulunga, ruucw kwrgab to!

³¹Madmenangv kidu do; Gebim ho doonbo tulungv cumciq koob kenya do.

³²Soq aal jaqso mwv Nob ho doonu tayin; mwv mwwg alaqho nyumtinam mam Jaiyon puutu gvla Jerusalemwg yorn ho toosuq tayin.

³³Kaato, Pwnbo nyiit At Swg atorv bos looda dvb haqbam pvriq tayin; ao kiigo boam otu dvb pvvdw tayin, hoo koi xitor boam akob mvl tayin.

³⁴Mwv nyorog svvn tvgeq mwlwngam vx lvgab paxaq lotayin, hoo Lebanonv vcjaqb Xinam Akv ho yoqlwq tayin.