Read Nyishi AIJAYA 11 Bible Online

AIJAYA 11 - Nyishi bible

AIJAYA 11

¹Jesse sutu hoqgv ok nviyin ak jurlin tayin, hoo mwwg haqb rwb hoqgv aaxy xeetayin.

²Hoo At Swg Yalv, mwwlaq gvla cenglaq Yalv, tomswr-hony dvb la atorbo Yalv, cenglaq kvla At Swn bosnam Yalv, mwwg aoho dooba tayin.

³Hoo At Swn bosnam ho mwwg hempnamv dootayin. Hoggv mwwg vnyiqkv kaadwn ham mwv pw-hwwram, hoggv mwwg nyurungv haqyaq minsnam mam tapa dvn ham mwv pvvb mvvram,

⁴hvbmabde mwv dvrwq jvqtw lvgab jwwgw boam pw-hwwtayin, hoo swcw sam yumcum lvgab homyin dvb pvvb mvtayin; hoo mwv swcw sam mwwg gvmdwq agam lvgab betayin, hoo mwwg gomcwr lvgab nyic-nyia boam meng tayin.

⁵Dvrwq jvqtwngv mwwg hwwpo lo soruqb nyitayin, hoo dengkynamv mwwg rumbum ceetaqb nyitayin.

⁶Svcangv sviya ko lvgab dooba tayin hoo hogga takarv sibin bindo lvgab lvkin gob karba tayin, hoo hvvbuqbo svv koam la sony nyotam lvkin gob, ko anyongv bool wgtayin.

⁷Svv ngvla sutumv nwmw dvbam tayin; bulug anyo bo tulungv lvkin gob karbam tayin, hoo sony nyotv svv hvvb hvb am piilam dvtayin.

⁸Gwwi twwdu bo ko hoiyinv tvb borta ungho sootayin, hoo mama kongv mwwg alaqkam tvb bwru ho ilwqtayin.

⁹Bulam vc-apy dvb mvram ho mwlwngam ngoqg dvrwqbo puutu lo twrm ram; issiv hoggub sa-svlob hingpwnam hvbkalam swcw bumpwngv At Swn cingpw tayin.

¹⁰‍Hoq aalam Jesseg rwbv nyiilu gab kaacinam akwb daqtayin—mwam nyob mwlwngv tox tayin, hoo mwwg doogw ko nyookam yuutayin.

¹¹‍Mwwg nyiilu boumnam tulungam boolin dukub Assiriya hoqgv, Ijipt hoqgv, Patros hoqgv, Kus hoqgv, Elam hoqgv, Sinar hoqgv, Hamat hoqgv, hoo sa-svlog sugur nyook hoqgv hoq aalam At Sw mwwg alaqkv laqlin layil lwnyi dvb svka tayin.

¹²Mwv nyob nyiilu gab kaacinam ak mvrab tayin hoo nyuum boonam Israelam bookum tayin, hoo swcw nvg cuukiq-bvrw hoqgv ruqs-ruqtwrnam Judangam goqkum tayin.

¹³Iprayimg kaaneqnamv wpaq tayin hoo Judangam hentwr hemboam mvpaqtayin; Iprayimv Judangam kaaneq kuram, hoo Judangv Iprayim mam hentwr hem kuram.

¹⁴Hvbmabde bulv duo-haaga daiyag Palistan nyi tulug gorbw aoho poqlwl poqdaq tayin, hoo bulv lvkin gob duo-caga nyiilungam naalil naareq tayin. Bulv Idom mam la Moab pam lvkin gob bulug alaqkam ceeko tayin, hoo Ammon nyiilungv bulam tatayin.

¹⁵Hoo At Sw Ijipt gv sa-svlog iss biqlin koam twrtayin, hoo mwwg siru miqsunam lvgab mwwg alaqkv pobu aoho lwwiywq-lwwxeq tayin, hoo hoqham silam kvn uraho jwwlwq tayin, hoo mwv nyiilungam samtaq gvmtvl boopeql wgtayin.

¹⁶Hoo Israelv hoggub lamta ak doonum hwdlo bulv Ijipt nyook hoqgv lengl dooyikho hvbkalam mwwg nyiilu boumnam tulu gab Assiriya hoqgv lamta paadangv dootayin.