Read Nyishi AIJAYA 13 Bible Online

AIJAYA 13 - Nyishi bible

AIJAYA 13

¹Amojwg ko tuup Aijaya Bebilonwg pagoqgab gamt tonam.

²‍Diixa-rara yorn golo kaacinam ak daqrabl; bul gab sogoql xabtayin; xinam toggoq tulungam bulam haam dvb alaqkv hoqyab to.

³Ngo atv ngoqg xuqnam akam gvmbwq pakun, hoo ngoqg haaxaqnam mam bon nyim dvb ngoqg atorbo nyiilungam goqkumnum, ngoqg larl yuumnam akam.

⁴Nyi naleqgo dunam-xaanamv puutu aoho hur-matabl dudo! Nyob nyi tulug lvpw-hativ lvkin gob hookuml hur-matabl dudo! Nyiit At Sw bookum pan hoo nyob pagbo atwb nyido.

⁵Doa nvg ywwtwr hoqgv, bulv aado nyook hoqgv haado, At Sw mwwg haaxaqnamv nwwxo-svtam gob, nyook mwlw sam twrdwb nyidwn.

⁶Sogoq kiirl xabto, hoggab At Swg aalv hvvnwq paku; kvl-jeenamv Pwnbo hoqgv haatayin!

⁷Hoqgab alaq mwlwngv tvmdwr tayin, hoo nyia kog hvvjw pwxiv jiqtayin.

⁸Bulam xikram: bulam silo-dors dvb la sig-dorgv kurum dvb vcnamv haatayin, bulv nyem cinc cinam hvb hentwr hentayin. Bulv akwn-akwn koor-kaamin sutayin; bulug nyuqmv moolw-cexam tayin.

⁹Kaato, At Swg aalv haado, kwc-kvranam lvgab hang lingtwrnamv la haaxaql kwr-kornamv nyookam mucu-mviya tayin hoo nyicbo tulungam hoq hoqgv twrtayin.

¹⁰Hoggab doa toloqg takarv bulam huto huuj kuram, aram doonyiv caak maab kan tayin, hoo poolv huto huukram.

¹¹Ngo gvda-gvtwg almag gam gab, la nyic ko-gab bulug nyixiaqkam laqm-baqm tayin; atam kwcwr-kvpar gob nyin boam ngo mingtwr tayin, hoo hang biimab larn boam ngo anyo dvb mvtayin.

¹²Hun alboam kaapa lamanam hvb ngo nyiilungam anyo dvb mvtayin, hoo nyia ko tulungam Opir hunam kaapa lamanam hvb mvtayin.

¹³Hoqgab nyiit At Swg hang lingtwrnamv hoq aalam mwwg hang lengl haaxaqnam mam ngo doangam tvmdwr dvb mvtayin, hoo swcw si swcw dook hoqgv xwwpin-xwwra tayin,

¹⁴Hoo sudum abtab tanam hvb, ho sviyangam rookum bo doomanam hvb, vxiv mwwg at nyiilu dookub wkur tayin, hoo vxiv mwwg atwg nyookub ketayin.

¹⁵Hiyam xeq kaapa tayin ham toopaq tayin, hoo hiyam xeq nootu tayin hv lyoqr niqtuqb haatayin.

¹⁶Bulug mama kongam bulug vnyiq kaagaho xiceq tayin; bulug nammam naareq tayin hoo bulug nywxwngam humlil nyitayin.

¹⁷Kaato, ngo Medes nyiilungam bulam ceeko mvdwb nwqduq pan, hiyv rupam xima dvn hoo hunam hemp maadwn.

¹⁸Bulug illiv nyijwr-yaapa tulungam abx tayin; bulv kepo hoq ko doon boam aya mwwpa ram; bulug vnyiqkv ko huriam aya kaapa ram.

¹⁹Hoo yuunam lvpw-haty, Bebilonv, Kaldiyag nyi tulug kaaneq dvb nyinamv, Sodom la Gomorra hvb hwdlo Pwnbov bulam mingtwr yin nyitayin.

²⁰Hotam-hotam nagub hoqho nywywngam nyi dookram; Arabv hoqho mwwg tombu doogwngam mvkram; sviya rvkbo tulungv bulug sviya tulungam hoqho karm ram.

²¹Hvbmabde nyoro svdinv hoqho kartayin, hoo bulug nam tuluho swcw-svjongv swrwq rwqtayin; hoqho mwra kiigangv doogw tayin, hoo hoqho bembv pojuq juqmin tayin.

²²Hainasv hoq soja aoho sogoq tayin, hoo siyalv ngv doongam bo pwqlw tuluho dootayin; hoq moodv alaqsi hvvc paku hoo hoqg aalv oyu kuram.