Read Nyishi AIJAYA 14 Bible Online

AIJAYA 14 - Nyishi bible

AIJAYA 14

¹Hoggab At Sw Jakubg aoho aya mwwpa tayin hoo lokta Israelam xuqtayin, hoo bulam bulug at gvdaho doom tayin, hoo nyoodo nyiilungv bulam nyiba tayin, hoo bulv atv Jakubg nambu ho guugabl dooba tayin.

²‍Hoo nyiilungv bulam naalayil hoo bulam bulug gvdaho boa jidwn, hoo Israelwg nambungv bulam nyera-paqnwb At Swg gvdaho bwwtayin. Bulam nyuum boonbo tulungam bulv nyuum bootayin, hoo bulam nyijab-nyiyiqbo aoho pvvb bwwl doog tayin.

³‍Hwdlo At Sw nam noqg vc hoqgv hoo bosil mwwdar mwwpar maanam hoqgv hoo nam hentwr jaqb bon nyim dvb jinam hoqgv doonu dvb jilin yukun,

⁴‍no Bebilon lvpw atam soq sib ceekol mvcap tayin: “Hoggub nyijab-nyiyiq bov niipa kun yu, hang lengl xima dvb nyimurnamv niipa kun yu!

⁵At Sw nyicbog beqnyiangam, ho pvvb bwwl doogbo dvvpam turtu pakun,

⁶hogloq hv hang lingtwr yin nyiilungam jwwngin maab jwwnan ham, haaxaq lvgab nyookam pvvb bwwl doognan ham leel-parl nyob podu nan ham.

⁷Swcw bumpwngv doonul hoo jimy-jema duku; bulv beminam belin duku.

⁸Saipreses mwlwngv nam hwnyir-hvmar do, Lebanonwg sidar mwlwngv, begamv, “Nam anyo dvb mvgam gab svvda panbo akkam ngulam ceekol daqlin maad kun.’

⁹Hwdlo no haaikam nam kvvrwq dvb Sux-ywlw niikumv hur-matab do; hoqhv nam svgagvrwq dvb doonyium pvmj do, swcw soqg nyiilo tulungv; bulug pwqlw hoqgv, ho nyookwg lvpw at tulungv daqrab do.

¹⁰Bul mwlwngv birwql hoo nam bedo: ‘No kam ngulug hvb laanyi maatwl haapa ku! No ngulug hvbkalam nyipa kun!’

¹¹Noqg ator yuunam mam Sux-ywlwb, noqg rwwxw-gungga dunam mam akob mvgeq pakun; niikumbv topum mam noqg kartaqb puul ap jipan, hoo tadorv noqg vj pomlupnan gob nyido.

¹²“Hoggub no ao lvpw toloqkv yoql yin, Ar komcig Takar Korlum pumbum ma, Dooko koarg ko tuupa! Hoggub nam deela so pageq lopa kun, no nyob hoolungam anyo dvb mvl paku!

¹³No noqg hanglo benum, ‘ngo ao lvpwb caatayin; Pwnbog takar tulug ao tol ngoqg pwqlwngam ngo ao dvb mvptayin; ngo nyoodum daiyag nyi wc maak aado jaqg nyi hookum ko puutu aoho dootayin;

¹⁴ngo doomwq ao yaab caatayin; ngo Pwnbo hvb atv mvstayin.’

¹⁵Hvbmabde nam Sux-ywlwg vcjaqb ung uraho mvgeq paku.

¹⁶Nam kaanbov nam nyiqjin tintin tvl kaatayin hoo noqg aoho mwwka tayin; ‘Soq nyi jaqsi yv swcwngam tvmdwr dvb mvnbov, hiyv lvpw-hatiam hwqdin mvnbov,

¹⁷hiyv gvda-gvtam diixa-rara gob mvnbov hoo hoqg bopam tulungam paiyaq-pacaq bov, pvtwq tumnam nyiilungam nammwb wkur mvma bov?’

¹⁸Nyob luuxig lvpw at mwlwngv mwwg atwg yuunamv nyubu uraho doodo;

¹⁹hvbmabde nam noqg nyubu hoqgv seepaq lengpa kun, haqpaqnum haqb hvb, lyoqr orioq nwqxwl mengnam mam vj pomlupnam hvb, wlw ung urab joopaqnam hvb, svmangam caajabnam hvb.

²⁰No bulam svma liiba ram, hoggab no noqg nyookam twryum mvpa ku, noqg nyiilungam no mengpaq paku. “Almab nyinbo hosiqkam nywywngam emin mingpa maabv!

²¹Bulug ab tulug nyimur nyigam gab mwwg ko tulungam meng dvb mwx-mvaq pakun, hvbmab baloqkam bulv swwrab layil swcw sam gumn bwwta do, hoo gvda-gvt aoso bopam tulungam bwwr mvta do.”

²²“Ngo bulam ceebio baqrab tayin,” Nyiit At Sw bibwqdo, “hoo Bebilon hoqgv eminam hoo boumnam mam, ko hotam mam la hosiqkam mvpaqtayin,” At Sw bibwqdo.

²³“Hoo ngo hoqham sis sitaq bvla iss swnyiqb mvtayin, hoo ngo svmpwq pwqnam hvb pwqpaql ham kvl-jeem tayin,” nyiit At Sw bibwqdo.

²⁴Nyiit At Sw dingr pakun: “Ngo hoggub mwwbwq pakun, hoqhvb nyimtayin, hoo ngo hoggub nyidwb bepakun, hoqhvb doom tayin,

²⁵ngo Assiriyangam ngoqg nyook lo mwmwqtayin, hoo ngoqg puutu aoho mwam lvc-korongv samtin tayin; hoo mwwg lwwpaqkv bulug hoqgv, hoo mwwg vgwngv bulug gorbw hoqgv wleq tayin.”

²⁶Soqg nyim dvb benam si swcw bumpw so nyim dvb mwwnamv, hoo soq alaq si nyob mwlwg aoho ilin pakun.

²⁷Hoggab nyiit At Sw pagoq ak mvp pakun, hoo hiyv ham kwly tayin? Mwwg alaqkv ilin paku, hoo hiyv ham ikur mvnyi tayin?

²⁸‍Lvpw at Ahajwg sid vnyw ho soq gamt tonam si haanum:

²⁹Palistiya nga, nam jwwn nan dvvcwngv dwrtu paku hvl, nul mwlwngv, hwnyir-hvmar maabv, hoggab cumdwq baqnbo tvb hosiq hoqgv cumdwq baqnbov lengtayin, hoo hoqg aaxiv bwxeq-naalo jarl wnbo tvb hvb nyitayin.

³⁰Hoo jwwgwg ko bwwconamv dvmin-twwmin tayin, hoo dwc-twwpw maanbov mwwdwq maab dootayin; hvbmabde ngo noqg lengk hosiqkam dwr-kano lvgab meng tayin, hoo noqg boumnam mam patab tayin.

³¹Toggoq nga, sogoq kiir to; Bopam ma sogoql xabto; Palistiya nga, nul mwlwngv, bosil yusum-yaqgam to! Hoggab nyoodum toloqkv mwkv juulin do, hoo toloqkv haanbov mwwg atwg bonam vbwq maanbo akam dooma dvn.

³²Hoggv gvdag pui baqnbo tulungam birwqtayin? “At Sw Jaiyonam kaapa pakun, hoo mwnwg uraho hentwr-kanyi bo mwwg nyiilungv hoqho cwwgw kaapa tayin.”