Read Nyishi AIJAYA 15 Bible Online

AIJAYA 15 - Nyishi bible

AIJAYA 15

¹Moab pagoq gab gamt tonam. Hoggab Moabg Ar ham aiho mvpaq pakun, Moabv hog nyikma; hoggab Moabg Kir ham aiya ho mvpaq pakun, Moabv hog nyikma.

²Mwv xumk namlo, bvla Dibon, hoo ao ko gvdab xabtab caan kun; Nebo gabla Medeba gab Moabv xabdo. Nyi vxig dumpo dummam riqbin paku; nyi vxig nvmmam reqpaq paku;

³lyobu-buuxy lo bulv tuila vjam kootwl; nam-pamto lola cuukiq-bvvrw vxy lo nyiicwr-cwrxiv xabl nyiqs dil doodo.

⁴Hesbonv la Eleale ngv xabgoq lengdo; bulug xabnam mam aado kiyo Jahaj nagub tapa do; hoqgab Moabg nwwxo-svtam gvnbo nyiilungv vcjaqb xabdo; mwwg yvjv tvmdwr do.

⁵Ngoqg hangv Moab gab xabdo; mwnwg nyiilungv Joarb bvla Eglat-silisiyab kedo. Hoggab Luhit coodu yukam bulv xabdo; Horonaim lamta ho bulv kvl-jeem dvb sogoq do;

⁶Nimrim issiv xoopa ku; nwmwngv sengpa ku, wj-oongv lengk ma, jeenbo akkam dook ma.

⁷Hoqgab bulug naleqgo naaknam mam hoo bulv hoggv pvvcum kunum bulv ham Huiloswg Kucw aob baqbonam.

⁸Hoggab Moabg akar-aarho xabnam yalam tvpw nukun; mwnwg xabnamv Eglayim nagub duc do; mwnwg xabnamv Beer-elim nagub duc do.

⁹Hoggab Dibonwg issiv ui rooxo do; hoggab ngo Dibonwg aoho vi yaiya go haam tayin, Moab hoqgv kelin boam la gvdaho boumnam mam sony nyot akwg gombub haam tayin.