Read Nyishi AIJAYA 16 Bible Online

AIJAYA 16 - Nyishi bible

AIJAYA 16

¹Gvdag pvvb bvvl doogbog sviya koam Sela hoqgv, diixa-rara lamtab ho Jaiyon puutug nyem koam kanam nvmlwqto.

²Osupam huuyaqyin, pvtangv jarl yvnam hvb, Moabg nyem ko tulungv Arnonwg soiyoq ho gaql yvdwn.

³“Nyid sanam mam tomswr-hony to; jvqtwngam gvbwqto; noqg doonyium mam ai hvb aal lvpangam mvto; nyuum tulungam doogw jito; kvsil kilwq boam bepor maabv;

⁴Moabg nyuum tulungam nulug pengko lo doonu mvto; bulam twrdy bo hoqgv bulug cwwgw gob nyito. Hwdlo nyijab-nyiyiqbo dooma yukun, mviyaq-mvcaq bov niipa kun, hoo gvda soqgv caajab-caaiyabo nyiv nyiid kun,

⁵Tumab abynam ho pwqlwngam mvko tayin, hoo hoq aoho dengky bongv Debidg doogw ko ho dootwl pw-hwwnbo akv jvqtwngam meegaq tayin hoo nyebia jaqb jvqtwngam nyidwn.”

⁶Ngulv Moabg larnam mam tapa tukun— mwv hwdjaqgo larn do!— mwwg koijaqb mwwnam mam, mwwg larnam mam, hoo mwwg kwr-kornam mam; mwwg sepil larl doonam si kvtaq ma.

⁷Hoqgab Moab gab Moabv sogoql xabto, nyiicwr cwrxiv sogoql xabto. Vcjaqb jwwgam gab, Kir-hareset dvngam bo wtw gab, nyix-riimto.

⁸Hoggab Hesbonwg rongo rwqtaqkv, hoo Sibma roo annv; nyob tulug lvpw atv hoqg haqb tulungam papaq paku, hogloq hv Jajer nagub wcnum hoo diixa-rarangam wpeqnum; hoqg rwbv aado jaqb meenum hoo sa-svlongam meebonum.

⁹Hoqgab ngo Jajer lvgab Sibmag roo boolu gab xabmin gvdwn; ngo noqg lvgab ngoqg nyiqsam dimin gvdwn, Hesbon la Eleale nga; hoggab noqg dug poolwg nyijo aaxiam la noqg vly nvvdam sogoqnamv goqnyin pakun.

¹⁰Hoo diibuqbo rongo gab hwrcwnam mam la hempnam mam naapaq pakun, hoo roo boolu ho bemin bek maanum, akkam hwrcw kuma; kwm-kor mvnbongv twws alangam mvlin kuma; ngo sogoq goqdunam mam mutum pakun.

¹¹Hoqgab ngoqg hvvjw-harangv rwwxw-gungga mvnam hvb Moab gab, hoo ngoqg yvj-yalv Kir-hareset gab xiitu tuudwn.

¹²‍Hoo hwdlo Moabv mwv atv dooikam, hwdlo mwv atv nyook ao gab mwwdwq yin, hwdlo mwv mwwg dvrwq namho haal swgw yikam, mwv mviya nyoram.

¹³‍Otuqho Moab pagoqgab soq agam sam At Sw gooknum.

¹⁴‍Hvbmabde sija At Sw gooknv, begamv, “Vnyw nywum uraho, bon nyin boam ree goql bonam nyimnam vnyw hvb nyitayin, Moabg yuunam mam haqpaq tayin, mwwg hog mwlwngv nyiitw-mvqlw sujaqkam, hoo doonyu bov anyol hoo laanyi maatayin.”