Read Nyishi AIJAYA 17 Bible Online

AIJAYA 17 - Nyishi bible

AIJAYA 17

¹Damaskas pagoq gab gamt tonam. Kaato, Damaskas bopamv dookram hoo yuupaq boam pookumnam hvb nyitayin.

²Aroyer bopam tulungv asar dukun; bulv sibin-svv tulu gel karkwb nyitayin, ho hv doopaq tayin, hoo bulam hiyv kam bos dvb mvkram.

³Iprayim hoqg gurumv, hoo Damaskaswg lvpw atv nyiitayin; hoo Siriyag boumnamv Israelwg ko tulu yuunam hvb nyitayin, nyiit At Sw bibwqdo.

⁴Hoo hoq aalam Jakubg yuunam mam akob mvgeq tayin, hoo mwwg gv ox-aiyaqkv jiql dornyol xuutayin.

⁵Hoo hoqhv am doqdu boam am peenbov nookumnam hvb nyitayin hoo mwwg alaqkv vmlywngam nooxub tayin, hoo Repaiyamwg lywpa ho am vmlywngam nooxubl nookumnam hvb nyitayin.

⁶Hoqho nookumnam mam apaq tayin, olib svvnam jwwmwqnam hvb— aaxy xeenbo svvn niqtuqho aaxy pwnyi-pwum, haqb tuluho aaxiv pwpy-pwng gotwq xeetayin, Israelwg Pwnbo At Sw bibwqdo.

⁷‍Hoq aalam nyiv mwam Pwnboam kaagab tayin, hoo mwwg vnyiqkv Dvrwqbo Akam kaagab tayin.

⁸‍Mwv yugw tulungam, mwwg alaqg bonam nyinam mam kaakram, hoo mwv hoggv mwwg alaqkv Aserim la yugw hoqg sulum mwwnam mam kaagab kuram.

⁹‍Hoq aalam bulug bopam tulungv gvda yorn tuluho svvn kwrbin tvl asarnam hvb asar tayin, bulv ham asar mvnum Israelwg ko tulu gab, hoo hoqhv vp-cwkwl hemp kuram.

¹⁰Hoggab nam ywwlin bo Pwnboam no mwwpa maab nyipa ku hoo noqg cwwgwnan Bvdo lwwnam mwwpa kuma; hoqgab no dengkybo svvnam liis jaqkam hoo luusaqbo roo haqb annam liis jaqkam,

¹¹noqg liid aal hoqgv bulam no hingkib liilwqtvl swwm sujaqkam, hoo noqg liinamv ar komcam opungv jwgw-jvgo sujaqkam, vcjaqb mwwdwqnamv la mwp lama dvb vc de aalam vly naadv wleq tayin.

¹²Oa, nyiilug dunam-benamv sa-svlog dugum gumdunam hvb gumdo! Oa, nyob tulug dugum gumnamv; atorbo iss tol dunam hvb dudo!

¹³Nyob tulug dugum gumnamv; vigo iss tonam hvb nyido, hvbmabde mwv bulam yolu ruqtayin, hoo bulv aadob ketayin, puutu aolo ampam dooiyv baqxanam hvb hoo diimwram cwkeq-lvmeq dooi baql wgnam hvb baqtayin.

¹⁴Kaato, ariyum moodam bosnamv haado! Ar komc maatab hoqhv dook ma! Ngulam naareql baqreqbov, hoo ngulam naalil naareq bov soq sib nyitayin.