Read Nyishi AIJAYA 18 Bible Online

AIJAYA 18 - Nyishi bible

AIJAYA 18

¹Kuswg pobu lvvg cwkeq-lvmeq dooi yik gvda nga,

²Hvvky-pootam tulungam issib, ho Papiraswg pota uppum mam iss aoho kanam dvn! Ao gvi haapa bo nyookub, ogum-aiywr nyiilungam bos dvb, ator gvi mviya bo nyookub, hoo hiyvg gvda ham pobungv tvqnyi gob topin supan, pui baqnbo tulungv nyebia jaqb wto.

³Gvda-gvt so doonbo nul mwlwngv, swcw nvg aoso doonbo nulv, puutu tuluho kaacinamv caalin yin, kaagab to! Hwdlo tuuliv miqyikam, tato!

⁴Hoggab At Sw ngam benum: “Dvrwq cojorl doonyi hutonam hvb, vly nvvdam doomwqg gums cooyumnam hvb, ngoqg doogw hoqgv ngo cooikab kaatayin.”

⁵Hoggab vly nvvdv haama taab, opungv puunya maatab, hoo opungv puul roo aaxy ningma taab, mwv mvxaqnan pvvhwq lvgab jurlin boam paxaq dvn, hoo haqb lyamkar bo tulungam mwv papaql hoo dvrwq dvb mvdwn.

⁶Dvs meegaqbo puutug pvta tulu gab, hoo swcw nvg svdin gab bul mwlwngam apaqtayin. Hoo dug moodam pvta tulungv, hoo swcw soqg svdin mwlwngv bulam tapam moodam dvtayin.

⁷‍Hoq moodam nyiit At Swn paqnam mam baqa jitayin ao gvi haapa bo nyook hoqgv, ogum-aiywr nyiilu bosnam hoqgv, ator gvi mviya bo nyook hoqgv, hoo hiyvg gvdangam pobungv tvqnyi gob topin supan, Jaiyon puutug nyook hv nyiit At Swg eminv.