Read Nyishi AIJAYA 19 Bible Online

AIJAYA 19 - Nyishi bible

AIJAYA 19

¹Ijipt pagoq gab gamt tonam. Kaato, At Sw nyebia jaqb doomwq-haapam aob Ijipt ho xarl hoodu do; hoo Ijipt gv murty mwlwngv mwwg agaho tvmdwr tayin, hoo Ijipt nyi tulug hangv bulug uraho hang hotayin.

²Hoo ngo Ijipt-Ijipt nyi tulu pengko lo ceebio baqm dvb nwqduq tayin, hoo bul-bulug pengko lo ceekol mviyaq mins mvm tayin hoo vxiv mwwg door-doopwngam ceeko tayin, bopamv bopam kalam mam ceeko tayin, lvpwngv lvpw kalam mam ceeko tayin;

³hoo Ijipt nyi tulu ura lo bulug nyinw-wnwnamv asar tai kun, hoo bulam tomswr-hony boam ngo mwwdar maadwb mvtayin, hoo bulv murtiam la nyioky nyub tulungam, hoo pui bvqsiq bo tulungam la sootu nyub tulungam heqka tayin;

⁴hoo ngo Ijipt nyi tulungam nyiit at alaqho jilwq tayin, hoo bulug aoho kwr-korbo lvpw atv pvvb bwwl doog tayin, nyiit At Sw bibwqdo.

⁵Hoo Sa-svlog issiv xoota yukun, hoo pobungv xoolayil hoo deegoq goqta yukun,

⁶hoo hoqg silam mwlwngv kac tayin, hoo Ijipt gv Nail pobu tobwq lengn bo mwlwngv nyiilayil hoo xootayin, poqta saala gvla rapeqkv yaapaq tayin.

⁷Nail pobug asar dvb tobinam nyookv, Nail sugurho dootayin, hoo Nail pobug tobinam mwlwngv deegoq goqta yukun, ham aadob ruqpaq tai kun hoo hoqho hog akkam dookram.

⁸Nail pobu ho vkar paql, ngui mengbo tulungv xabl-riil nyix-riitayin; hoo iss ho wswq hurn bo tulungv hentwr hentayin.

⁹Pud-pos vj mvnbo tulungv, hoo svcaq vj cumnbo tulungv mwwgw dookram.

¹⁰Gvdag rwwda tulungv dwrmwq-dwrkaq tai kun, hoo nyis nyijo bo mwlwngv mwwdwq tayin.

¹¹Joan gv lvpw at ko tuupv paca caaya do; Parog mwwlaq lvqtwrl tomswr-hony bo tulungv dooxa xaaram boam tomswr-hony do. No hoggub Paron bela dvn, “Ngo mwwlaqbo ko tuup akv, hoo kolwg ab apag lvpw atwg ko tuupv akv”?

¹²Noqg mwwlaqbo nyiilungv hoglo? Bulam nam betam mvto nyiit At Sw hoggv Ijiptam ceekol nyitanam mam bulv cengkam yinpv

¹³Joan gv lvpw atwg ko tuup tulungv nyiidam paku, hoo Mempiswg lvpw atwg ko tuup tulungv niqtuq dooma boam mwwjw paku; hiyv mwnwg nyob gab swwrw rwwdab daqn bov Ijiptam yuupaq gvpa ku.

¹⁴At Sw mwnwg ura lo mwwdar-hendar maanam mam mviyo-mvco pakun, hoo twwxum bo nyi akv bulum-kac baapaqnam hvb, bulv Ijipt bon nyinam mwlwngam yuupaq mvtayin.

¹⁵Hoo dumpo ngvkam ho amivkam, pvng haqbv kam ho poqta-saala ngvkam, hog akkam Ijipt gab dookram.

¹⁶‍Hoq aalam Ijipt nyi tulungv nyem tulu hvb nyitayin, hoo nyiit At Swg alaqkv hwqdin kunam aoho mwwg agaho tvmdwrl bos tayin.

¹⁷‍Hoo Judag gvdangv Ijipt nyi tulungam bos sotwr kamangam bos mvtayin. Nyiit At Sw bulam ceekonam pagoq gab nyiicwr-cwrxiam bepa pan hoq pagoq gab bos tayin.

¹⁸‍Hoq aalam Ijipt gvda lo bopam ang-go Kanaanwg goangam gootayin hoo nyiit At Swn tvjwl swwdwb dingtayin. Hoq bopam akwn ham Twrnbo Bopamv hvl betayin.

¹⁹‍Hoq aalam Ijipt gv gvda pengko lo At Sw gab yugw ak dootayin, hoo hoqg vrrho At Sw gab swwrw daag diitayin.

²⁰‍Hoqhv Ijipt gvda lo muxnam ak gob nyil nyiit At Sw gab hvvkib daqtayin. Hwdlo bulam nyijab-nyiyiq yin bulv At Swn xabtayin, hoo mwv bul gab ceetorl ywwlin bo ak kanam tayin, hoo bulam naalin tayin.

²¹‍Hoo At Sw mwv atv atam Ijipt nyi tulungam cengm tayin, hoo Ijipt nyi tulungv hoq aalam At Swn cengtayin hoo pwr jil aky lvgab xumtayin, hoo bulv At Sw gab bon nyidwb dingr tayin.

²²‍Hoo At Sw Ijiptam jwwtayin, jwwjo ywwtwl mwptayin, hoo bulv At Swg dookub hookur tayin, hoo bulug aya mwwpa tvbwk hvl xumnam mam mwv tatwl hoo bulam mwptayin.

²³‍Hoq aalam Ijipt hoqgv Assiriya nagub lamta baada ak dootayin, hoo Assiriyangv Ijipt urab, hoo Ijiptv Assiriya urab haatayin, hoo Ijipt nyiilungv Assiriya nyi tulug lvgab xumba tayin.

²⁴‍Hoq aalam Ijipt la Assiriya lvgab Israelv oum deen swcw nvg pengko so xinam gob nyitayin,

²⁵‍hiyam nyiit At Sw lvqc cipa kun, hoo begamv, “Ijiptv ngoqg nyiilu xinam jaqkv, hoo Assiriyangv ngoqg alaq bonam nyinamv, hoo Israelv ngoqg otub nvvsiqnamv.”