Read Nyishi AIJAYA 2 Bible Online

AIJAYA 2 - Nyishi bible

AIJAYA 2

¹Juda la Jerusalemwg pagoqkam Amojwg ko tuup Aijaya agam gool kaanum.

²Kokw aalam soq sam kaapa dvb nyitayin At Swg namlo poogw ko puutungv puutu mwlwngam ao yaanbo nyook ho mvko tayin, hoo yorn mwlwngam yuubin yaatayin; hoo nyob mwlwngv hoqb sookum lwqtayin,

³hoo nyiilungv naleqgo haal, hoo betayin: “Haato, kuj ngulv At Swg puutub aob caanuj, Jakubg Pwnbog namlob, mwwg lamta tulungam mwv ngulam tomswr kamyi nvpv hoo ngulv mwwg lamtab wdwb nyikam yinpv.” Hoggab Jaiyon hoqgv pvvbv lengtayin, hoo Jerusalem hoqgv At Swg agamv lengdwn.

⁴Mwv nyob pengko ho hvvky swwtayin, hoo naleqgo nyiilug roqyaq minsnam mam pvvb mwbwq jitayin, hoo bulug lyoqr orioqkam rongo omin nvtayin, hoo bulug nwwxongam nwmw peexaq nvtayin, nyob-nyobv nyob pamin sukram, bulv nyob panam mam cengka kuram.

⁵Jakub nambunga, haato, kuj ngulv At Swg huto ho wnuj.

⁶Hoggab no noqg nyiilungam, Jakubg nombungam haqpaq paku, hoggab bulug lvgab dou-caga hoqg dupum-dvrabpv bwwr tvl doodo hoo Palistanwg jerbiq tuul benbo tulu hvb nyidwn, hoo nyoodo nyi tulug ko huriam bulug alaq lvgab jwwdwn.

⁷Bulug kedho rupv la hunv bwwr tvl doodwn, hoo bulug gumnv hwdlo jaqkam xoody ma; bulug kedho svpurngv bwwr tvl doodwn, hoo bulug ceriotv hwdlo jaqkam doomab nyiram.

⁸Bulug kedho alaq lvgab murty mvnamv naleqdo; bulug alaq lvgab mvnam tulu ham, hoqgv bulug atwg lvqcw lvgab mvn ham bulv pvxwl xumnum.

⁹Hoqgab nyiingam xikma, hoo nyi vxiam akob mvgeq pakun — bulam danyib apaq maabv!

¹⁰At Swg bos looda dvb nyinam mvla mwwg runyum-rvnyi dvb yuunamv haama taab wlw ura bvla diimwr urab haal kvs to.

¹¹Larl kaanbo nyiam akob mvgeq tayin, hoo xitor-xilo gob larnbo nyiilungam yan dvb mvtayin, hoo hoq aalam At Swn aro yuutayin.

¹²Hoggab nyiit At Sw aal loog doog gvdwn larl hoo koi gob mwwnbo mwlwngam ceeko dvb, yuunam mwlwngam ceeko dvb — hoo hoqham akob mvgeq tayin;

¹³Lebanonwg sidar mwlwngam ceeko dvb, ao bvla yuunam mam; Basanwg kora svvn mwlwngam ceeko tayin;

¹⁴ao bo puutu mwlwngam ceeko tayin, hoo yuunam yorn mwlwngam ceeko tayin;

¹⁵aobo soja vxiam ceeko tayin, hoo gurum nwqtumnam vxiam ceeko tayin;

¹⁶Tarsisig iss jaaj mwlwngam ceeko tayin, hoo kangam dvb jem mvnam mwlwngam ceeko tayin.

¹⁷Hoo larnbo nyiam yan dvb mvtayin, hoo xitor-xilo gob larnbo nyiilungam akob mvgeq tayin, hoo hoq aalam At Swn aro yuutayin.

¹⁸Hoo murty tulungam twrkub mvpaq tayin.

¹⁹At Swg bos looda dvb nyinam mvla mwwg runyum-rvnyi dvb yuunamv haama taab hwdlo mwv swcw sam bos sorab dvb mviyin; hoo nyiilungv wlw lwwpwq ura bvla deelag ungngwb haatayin.

²⁰Hogloq ham bulv atv xumdwb mvnum mam, nyia ko tulungv hoq aalam bulug hun-rup murtiam, kubu-pvta gab joopaq jitayin,

²¹At Swg bos looda dvb nyinam mvla mwwg runyum-rvnyi dvb yuunamv haama taab hwdlo mwv swcw sam bos sorab dvb mviyin; hoo nyiilungv, wlw bwdw dwraq bvla bwdw niqtuqho haatayin.

²²Nyiingam mwwjwnam mam apaqto hoggab swwgv nyupum svqyi-saqcanam hvvtwq, hoqgab hoggv mwam xidwb nyidwn?