Read Nyishi AIJAYA 22 Bible Online

AIJAYA 22 - Nyishi bible

AIJAYA 22

¹Nyiqry kaak lywpa gab gamt tonam. Nulgab caanamv hognvkv, nul mwlwngv nam mwwlo aob caol,

²nulug vcjaqb sogoq goqdu gvdwn, bopamv hur-matab gvdwn, pamdangv hemp pogdvn? Nulug nyiilungam mengnam hv lyoqr orioq lvgab mengma ho nyob pak ho sima.

³Nulug nyiilo mwlwngv lvkin gob keleq paku; illy-uppuq dooma ko-gab bulam nootunum. Bulv aado jaqb kes jaqkam, nul mwlwngam hiyam kaapanum ham nootunum,

⁴Hoqgab ngo benum: “Ngam kaamabv; ngam vcjaqb xam tvbv; ngoqg nyiilug nyem ko ocu-aiya tanam pagoqkam ngam bet-bela dvb nyimabv.

⁵Hoggab Pwnbo nyiit At Sw aal loog doog paku hur-marabl hoo caatam-caabaql hoo mwwdar maadwb nyiqry kaak lywpa lo, bvly mwlwngam yaqpia dvb hoo puutu mwlw hoqgv goqdu dvb pvvl ap pan.

⁶Hoo Elamv ablaq boam ho ceriotam lvgab svpur xarnbo nyiilungam ko bwwnum, hoo Kirv svtam mam taakoqnum.

⁷Noqg mwwbynam lywpangv ceriot rooxonum, hoo svpur xarnbo nyiilungv toggoq tuluho daqnum.

⁸Mwv Judag tortum nanam naapaq paku. Hoq aalam no Nyoro Namwg nwwxo-svtam mam tuugabnum,

⁹‍hoo nulv Debidg bopamho mvpianam mam naleqgo kaapanum. Nulv ako sviyin hoqgv iss bwwnum,

¹⁰‍hoo nulv Jerusalemwg nam tulungam xikanum, hoo gurum nwqtumnam sulu namgub nulv nam tulungam sapianum.

¹¹‍Nulv kucuqbo sviying issam bvly vnyig pengko lo hengkuml apnum. Hvbmabde hiyv ham hengnum nulv kaamanum, ho mwam kaato hiyv ham kol otuqho hengl apnum.

¹²Hoq aalam Pwnbo nyiit At Sw xabl nyix-riim dvb, dungxo lool tvl tuila vjam koom dvb goqnum;

¹³hoo kaato, hwnyir-cojor bvla mwwngamnamv, hvvbam la sviyangam mengl vdin dvl hoo opo twwdwn. “Kuj ngulv dvt-twwtuj, hoggab aram mam ngulv sita yi.”

¹⁴Nyiit At Sw mwv atv atam ngoqg nyuru si betam pakun: “Jvqtw jaqb no sima deedib soq nyixiaqnam sam nam apaq jiram,” Pwnbo nyiit At Sw bedo.

¹⁵‍Soq sib Pwnbo nyiit At Sw bedo, “Haato, nammam gootu kaanbo, Sebna ho wno, hoo mwam beta:

¹⁶‍Hoggv no so mvdwn, hoo nam so hiyv pvvpan, hoqgab no atv noqgab nyubungam roqpa kun, hiyv nam puutu aolo nyubungam roql hoo wlw lwwtaq ho noqg atgab doogw koam roqdwb jinum?

¹⁷‍Kaato, atorbo nyi nam, At Sw nam joorabl hurpaq tayin. Nam mwv vcjaqb yumgab jinjin tayin

¹⁸‍hoo nam poopar-tamar leql, hoo gvda deela ho bol hvb hurtayin. Hoqho no sitayin, hoqho noqg yuunam ceriotv dootayin, noqg nam atam no hvnyw nyipa tayin.

¹⁹‍Ngo nam ngoqg oppis hoqgv ruqpaq tayin, hoo nam noqg doogw hoqgv akob pugeq tayin.

²⁰‍Hoq aalam ngoqg kanam tanbo Hilkiyag ko tuup Eliyakimnvn goqtayin,

²¹‍hoo noqg kamt vjam ngo mwam koom tayin, hoo noqg pusam mwam hiqlwq tayin, hoo noqg atoram mwwg alaqlo gvqlwq tayin. Hoo mwv Jerusalem gvla Judag nam hoq abwb nyitayin.

²²‍Hoo Debid namwg sabingam ngo mwwg gorbw lo tulwq tayin. Mwv mvko tayin, hoo ham hiyvkam ciqtum nyoram; hoo mwv ciqtum tayin, hoo ham hiyvkam ciqko nyoram.

²³‍Hoo ngo cumciqko nyook ho mwam dvcw silongam tvqlwqnam hvb tvqlwq tayin, hoo mwwg abwg nammam mwv xinam pwqlwngam haagtayin.

²⁴‍Hoo bulv mwwg abwg nam hoq hog mwlw xinam mam, ko hosiqkam la pagoqkam, pvtaq hoqgv naarab layil cwwro gaapo pwcw luuxiam mwwg aoho haqp tayin.

²⁵‍Hoq aalam, nyiit At Sw bibwqpan, cumciqko nyook ho dvcw silo tvqlwqnam mam cuqpaq tayin, hoo hoqham pageq tvl yoql mvtayin, hoo hoqho vgwb haqpnam mam papaq tayin, At Sw goopa kun.”