Read Nyishi AIJAYA 23 Bible Online

AIJAYA 23 - Nyishi bible

AIJAYA 23

¹Taiyar pagoq gab gamt tonam. Mwwdwqto, Tarsisig iss jaaj tulunga, hoggab Taiyarho jaaj jeegw ko nam, dook maab doopaq paku! Saipras gvda hoqgv bulam soq sam betamnum.

²Pobu bviywr ho doonbo tulunga, cooikab dooto; Sidonwg kwm-kor mvnbo tulungv, sa-svlongam rapeq layil, nam bwwr dvb mvpa kun.

³Hoo issiv mvqlw ko-gab noqg nyooga naanamv Sihorg vly-axeq hvb, ho Nailwg am rongo rwqtaq hvb nyinum; no gvda mwlw so kwm-kor mvnbob nyinum.

⁴Hvnyw to, Sidon na, hoggab sa-svlongv goonum, sa-svlog dvqgwngv bepakun; “Ngo cinc gokam cima ho ko gokam bwwma, ngo yaamy gokam soma ho tuudy gokam sorabma.”

⁵Hwdlo pui betamnamv Ijiptho haaikam, Taiyar puiyam tatwl bulv vcjaqb mwwdwq tayin.

⁶Tarsis sam rapeqto; pobu bviywr ho doonbo tulunga, mwwdwqto!

⁷Soq si kol galoqkv nulug yuugnam bopam hvviyv, hiyvg lvpiangv mwnwn aadob baqpaq gvnum?

⁸Ywr dumtup jinboam, hiyv Taiyaram ceeko dvb mwwdwn, hiyvg kwm-kor mvnbo tulungv lvpw atwg ko tuup gob nyinum, hiyvg kwm-kor mvnbo tulungv swcw soq xinam gob nyinum?

⁹Hog mwlw larl yuunam mam mucu-mviya dvb, swcw soqg hog mwlw xinam mam xima mvdwn, nyiit At Sw soq sam bibwq pakun.

¹⁰Tarsisig nyem ko tulunga, Nail pobungv topeqnam hvb noqg gvdangam wpeq to; mvturnamv akkam dookram.

¹¹Mwwg alaqkv ilinl sa-svlo aob ibo pakun; mwv lvpw-hatiam hwqdin pakun; Kanaanv hogloq ho atorb dvqgw dvn hoqham At Sw twrm dvb gaml jipa kun.

¹²Hoo mwv benum: “No lardwb nyikram, Sidonwg nyijab-nyiyiqnam mvvngam tulunga; gorabl Saiprasam wbo sujaqkam, alo kam no doonu dookram.”

¹³‍Kaato Kaldiya nyi tulug gvdangam! Soq nyiilu si nyi maanam; Assiriyangv hoqham nyoro svdin gob mvol apnum. Bulug naareqnam sojangam bulv tuurabnum, bulv mwnwg lvpwngam asar dvb twqbinum, bulv mwnwn mucu-mviyanum.

¹⁴Tarsisig iss jaaj tulunga, Mwwdwqto, hoggab noqg ator torgw nananv doopaq paku.

¹⁵‍Lvpw at akwg aal hvb, Taiyaram vnyw camkvn go mwwpa kuram. Vnyw camkvnwg vtwr-anyangam, meqjo bo tulug bemin benam hvb Taiyar lo nyitayin:

¹⁶“Mwwpa kumanam meqjo boa, rwwxw ak naarab layil, bopam golo wto! Tiiswrl tangam dvb guuliam liito; naleqgo bemin lo beto, ho nam mwwpa kamyi nvpv.”

¹⁷‍Vnyw camkvn vtwr-anyangam, At Sw Taiyar ho gaqa tayin, hoo mwnwg meqjongam jikur tayin hoo swcw nvg aoso gvda-gvtwg lvpw-haty mwlwho mwn atv meqjo bob nyitayin.

¹⁸‍Mwnwg kwm-kor mvnamv la mwnwg nyijongv At Sw ho dvrwq tayin. Hoqham pvvkuml ho pvvcum kamram, hvbmabde mwnwg kwm-kor mvnamv naleqgo dvs-twwsam la albo vjam At Swg agaho doon boam hortayin.