Read Nyishi AIJAYA 24 Bible Online

AIJAYA 24 - Nyishi bible

AIJAYA 24

¹Kaato, At Sw swcw sam asar dvb hoo ham doopaq dvb mvtayin, hoo mwv hoqham likub tayin hoo hoqho doonbo tulungam cwrsaq gob mvtayin.

²Hoo soq si nyiilungam nyinam hvbkalam nyub tulungam nyitayin; nyera tulu lvgab nyinam hvbkalam; at tulungam nyitayin, paqn tulungam nyinam hvbkalam ai tulungam nyitayin; rvnbo tulungam nyinam hvbkalam, puqnbo tulungam nyitayin; ciirwqbo tulungam nyinam hvbkalam, ceenbo tulungam nyitayin, narnbo tulungam nyinam hvbkalam, nvrwqbo tulungam nyitayin.

³Swcw si twrkub asar taikun hoo twrkub naalil naareq taikun; hoggab soq gomcwr sam At Sw bepakun.

⁴Swcwngv nyix-riil hoo sengdwn; gvda gvtv mwwdwql sengdwn; swcw soqg koibo nyiilungv mwwdwq dvn.

⁵Swcw nvg uraso doonbo tulungv swcwngam kacdvb mvnum; hoggab bulv pvvbam juqbo paku, daapongam juqbo paku, kuiyum xaqb birminsnam mam mvpia paku.

⁶Hoqgab beenamv swcwngam duiyum gvdo, hoo hoq uraho doonbo tulungv bulug nyixiaq ko-gab hentwr dvn; hoqgab swcw so doonbo tulungam xvvtwrnum, hoo nyiingv anyo go dootwq kunum.

⁷Opo twwn bov nyix-riido, roo boolungv yooyum paku, hang hwrcw bo mwlwngv hvnyw moolw duku.

⁸Tamborin tulungam jwwl soonamv cooikab doon kuba, tal dwwl ruuj-pumj dvb dunamv nyiin kuba, rwwxw-gungga mvnamv cooikab doon kuba.

⁹Bulv opo twwl baajam jamnamv dookma; opo poodwq boam twwnbo gab opongv kacaq duku.

¹⁰Doopaq bo bopamv yaqpia paku; nyi akkam haam mvma dvb nam nvmcw namtam ciqtum paku.

¹¹Opo gab lyobu buuxylo nyiingv sogoq goqkar do; hwnyir-hvmarnam mwlwngv kan paku; swcw soqg hemp-hvnyirv nyiin kuba.

¹²Bopam mam yuupaq dvb apaq paku; yabg toggoq tulungam eexaml sojv mialap paku.

¹³Hoggab hwdlo olib svvnam pvmwq yukam, roo aaxiam vly noodu yukam, soq si swcw nvg nyob tulug pengko ho nyitayin.

¹⁴Bulv goqr rorab do, bulv hemp bemin bedo; At Swg dengkynam aoho bulv dou-haaga hoqgv goqr rodo.

¹⁵Hoqgab dou-caga hoqgv At Swn yuunam mam jido; sa-svlog soiyoq gvda hoqgv Israelwg Pwnbo At Swg eminam yuum do.

¹⁶Jvqtw bo Akwg yuunam mam, swcw nvg ywwtwr hoqgv ngulv paqnam beminam tapa do. Hvbmabde, ngo bedwn, “Ngo dampaq paku, ngo dampaq paku. At Swv mwwdwq dvn! Hoggab nyipin bov nyipin paku, nyipinam lvgab nyipin bov nyipinum.”

¹⁷Swcw soqg doonbo nyi tulunga, nulug aoho bosnamv la ungngv hoo pwd-potongv doodo!

¹⁸Hiyv bosnam mam tapa pel ken bov hoq ung urab holwq tayin, hoo hiyv hoq ung hoqgv geelin tayin ham pwd-potongv hoqtu tayin. Hoggab doa nvg pupum mam kuqkonum, hoo swcwg gwwlv tvmdwrnum.

¹⁹Swcwngv twrkub vmwq-akaq paku, swcwngv taqc-taqi paku, swcwngv bos xaxa dvb hwqdin paku.

²⁰Swcwngv twwxum bo hvb tabko-tablo do; hoqhv booiyap hvb yakub-yaxeqdo; hoqg nyixiaqnamv hoq aoho vgw dvb paap paku, hoo hoqhv tabto do, hoo hv lokta daqrab kuram.

²¹Hoq aalam At Sw doa uraho doonbo doa nyiit atam, hoo swcw aoso doonbo swcwg lvpw atam laqm-baqm tayin.

²²Bul mwlwngv lvkin gob ung uraho pvtwq doonam hvb dootayin; bulam pvtwq uraho tuml aptayin, hoo aal oyu go dooxo kokwngam bulam laqm-baqm tayin.

²³‍Ho poolv swrdorxeqb nyitayin, hoo doonyiv hvnyw tayin, hoggab Jaiyon puutu ngvla Jerusalemho nyiit At Sw pvvb bwwl doog tayin, hoo mwwg nyixa tulug agaho mwwg yuunamv dootayin.