Read Nyishi AIJAYA 25 Bible Online

AIJAYA 25 - Nyishi bible

AIJAYA 25

¹At Swa, no ngoqg Pwnbov; ngo nam paqtayin; ngo noqg eminam paqtayin, hoggab no kolwg nyidwb mwwnam mam, dengkiam la swrdorxeq pagoqkam niqtuq nyilin mvpa ku.

²Hoggab no bopam mam hwwpum hvb mvpa kun, gurum nwqtumnam bopam mam yuupaq mvnum; nyoodo nyi tulug lvpw-haty bopamv dookma; hoqham nywywngam mvdar kuram.

³Hoqgab atorbo nyiilungv nam yuutayin; kuqnyi bo nyob nyi tulug bopamv nam bostayin.

⁴Hoggab no jwwgwbo nyiilu gab cwwgw gob nyipa kun, dwc-twwpw maanbo nyi gab no cwwgw akv, doogum-dooi hoqgv doogw nan akv hoo og xamnam hoqgv doonyiumv; hoggab kuqnyi bog saqnamv gurumlo doogum-dooi yidaqnam hvb nyidwn,

⁵pwtw bo nyook lo og xamnam hvb nyidwn. No nyoodo nyi tulug ruuj-pumj dvb dunam mam munyiub dvn; doonyi ogam doomwq pulupnam hvb, kuqnyi bo beminam mvgeq lodwn.

⁶Soq puutu aoso nyiilu mwlw gab dwjwbo dvsam, aljaqb opo nyiaqngar boam, loocin rooxo tvl dwjwbo dvsam, twwngam bo poolangam, nyiit At Sw mvxor jitayin.

⁷Hoo nyiilu mwlwg aoho tomlup tvl doognam mam, la nyob nyiilungam pulup tvl doognam mam, mwv soq puutu aoso dvmeqtayin.

⁸Mwv sigam nwrba gob dvmeq tayin; hoo Pwnbo At Sw nyi mwlwg nyiqsam tixaq tayin, hoo mwwg nyiilungam benyi-beyanam mam swcw nvg ao soqgv naapaq tayin, hoggab At Sw goopa kun.

⁹Soq sam hoq aalam betayin, “Kaato, soq si ngulug Pwnbov; ngulv mwwg gab kaayanum, ho mwv ngulam ywwlin kamyi nvpv. Soq si At Sw; ngulv mwwg gab kaaya pakun; kuj ngulv mwwg ywwlinam ho mwwngam gvdvl hwnyir-hvmar tuj.”

¹⁰Hoggab At Swg alaqkv soq puutu so laqp tayin, hoo Moab nyiilungam mwwg nyook uraho caajabl swqmwq tayin, am amrongam pwnwr gab swqmwqnam hvb swqtayin.

¹¹Hoo iss jaan bov mwwg alaqkam yamga tvl iss jaatanam hvb mwv mwwg alaqkam hoq pengko ho yamga tayin, hvbmabde mwwg atam koi gob mwwl larnam mam la mwwg alaq hoqg nyilaqnam mam At Sw akob mvl tayin.

¹²Hoo mwwg ao jaq dvb gurum nwqtumnam mam mwv akob sageq lotayin, svdw lotayin, hoo deelag diimwr aoho joop tayin.