Read Nyishi AIJAYA 26 Bible Online

AIJAYA 26 - Nyishi bible

AIJAYA 26

¹Hoq aalam Juda gvda lo soq bemin sam betayin: “Ngulv atorbo bopam mam doogdvn; mwv ywwlinam mam bvly hvb la gurum hvb pvvl ap pan.

²Toggoq tulungam mvko to, mwwjwngam pvvnbo dvrwqbo nyob hoolungam urab haam dvb.

³Hiyv noqg aoho mwwn boam, no mwam swrsomalo dvb pvvpa ku hoggab mwv nam mwwgw dvn.

⁴At Swn nwrba gob mwwgw to, hoggab Pwnbo At Sw kuiyum nagub lwwn pwtv.

⁵Hoggab mwv ao bvla kangam dvb doonbo bopam mam, yan dvb mvpa kun. Mwv hoqham akob mvgeq paku, hoqham ked deela diimwr aiyin dvb mvgeq paku.

⁶Hoqham jwwgwbo la dwc-twwpw maanbog, lvpia dwqnamv dwqjab dvn.”

⁷Dvrwqbog lamtangv nvmyin dvn; no dvrwqbog lamtangam nvmyin dvb mvdwn.

⁸At Swa, noqg pw-hwwta ko lamta ho, ngulv noqgab kaaya dvn; noqg eminam la nam mwwpanam mam ngulug yvjv mwwby dvn.

⁹Aiyam ngoqg yvjv nam mwung dvn; ngoqg ura yalv nam ngo meegaq dvn. Hoggab hwdlo noqg pw-hwwnamv swcw uraso dooikam, gvda gvt so doonbo tulungv jvqtwngam cengdwn.

¹⁰Nyic-nyia boam mwwswnam mam kaakin baloqkam, mwv jvqtwngam cengma dvn; mwv jvqtw bog nyook lo nyiwq-nyitongam nyidwn hoo mwv At Swg yuunam mam kaapa maadwn.

¹¹At Swa, noqg alaqkam irab supa, hvbmabde bulv ham kaapa ma. Bulam noqg nyiilu gob noqg hwrcwnam mam kaapa mvdo, hoo hvnyw mvto. Noqg ceebio wmv bulam lyomeq mvto.

¹²At Swa, swrsongam no ngul gab gaml jitayin, hoggab jvqtw jaqb no ngul mwlwg nyis tulungam nyij paku.

¹³Ngulug Pwnbo At Swa, asaqg pwnbo lvvg lo no ngulug aoso pvvb bwwl doog paku, hvbmabde noqg emin arongam ngulv mwwpa dvb baqayin.

¹⁴Bulv sipa ku, bulv swwkram, bulv yal bobongv, bulv torab kuram; hoq vtwr nagub no bulam gvqyiql twrpa kun hoo bulug hog mwlwngam mwwpa mvma dvb tipaq pakun.

¹⁵Hvbmabde At Swa, no nyob hoolungam dumtwq-miilyw dvb swwm paku, no nyob hoolungam dumtwq-miilyw dvb swwm pakun; nam swsw-saab yuupw do; no gvda vrram mwlwngam koi yaiya dvb mvpa ku.

¹⁶At Swa, hentwr yukho bulv nam meegaqnum; hwdlo no bulam gwrnyiaq yukho, bulv jebsil swgwnam mam belinum.

¹⁷At Swa, ko gvnbo nyem ak hvb hwdlo mwnwg ko bwwdv hvvnwq yukam mwnwg cinc cinam mam cwqla maab xabnam hvb ngulv kam noqgab nyinum;

¹⁸ngulv ko gvnum, ngulv cinc cinum, hvbmabde ngulv dooiho bwwpaq tukun. Swcw nvg uraso ngulv ywwlinam mam niqtuq nyilin maata, hoo gvda gvt soq nyi mwlwngv yoql maata.

¹⁹Noqgab sin bov swwtayin; bulug gv apongv gorab tayin. Nulv hiyv diimwr uraho doodwn, gorabto hoo hemp gab bemin beto! Hoggab noqg gumsiv hutog gumsiv, hoo swcwngv sin boam ko bwwtayin.

²⁰Haato, ngoqg nyiilu, nulug pwqlwb haatku, hoo nulug kokwb nulug viyap pam ciqtumto; haaxaqnamv wnyanam gob nulv atv atam anyo mood go kvsil dooto.

²¹Hoggab kaato, At Sw mwwg dook hoqgv lengl hoodu do swcw soqg doonbo nyi tulug bulug nyixiaqkam laqm-baqm taab, hoo swcwngv hoqg ywlw swtw twwnam mam bepor tayin, hoo hoqg mengnam mam kvsil apkuram.