Read Nyishi AIJAYA 28 Bible Online

AIJAYA 28 - Nyishi bible

AIJAYA 28

¹Twwxum tvl largnam Iprayima ywr dumtup pam, hoo hoqg yuunam kangamv opu nyiinam hvb nyiidu do, hiyv opongam mviya dvn hoq gab nyetwg lywpangv haabo ho doodwn!

²Kaato, At Sw akin twq koi bvla ator dvn; mwv mwwg alaq lvgab nyodo taa hvb, mucu-mviyabo doogum-taiyam hvb, koijaqb nyodo taa honam hvb, iss tonam hvb, swcw so hurlwqnum.

³Twwxum tvl largnam Iprayimg ywr dumtup pam lvpia niikum lo caajab tayin;

⁴hoo hoqg yuunam kangamv opu nyiinam hvb nyiidu do, hiyv diibuq lywpag agaho doodwn, hv dwr poolv hvvc maatab otuq jaqb taoq aaxy ningn bo hvb nyidwn: hwdlo nyi akgon ham kaapa yin, mwv ham nyebia jaqb mwwg alaqho naal meqtayin.

⁵Hoq aalam nyiit At Sw yuunam ywr dumtup pam gvtayin, hoo kangam bo hun bopyangam, mwwg boumnam nyiilungam gvmtayin,

⁶hoo hiyv pw-hwwk ho doodwn ham jvqtw yalam jitayin, hiyv nyob pak hoqgv toggoqb wkur dvn ham atoram jitayin.

⁷Hiyv opo lvgab svqgw dvn hoo twwxum tvl tabko-tablo dvn; nyubv la nyiqry kaal betambo tulungv twwxum tvl tabko-tablo do, bulam opongv lyomeq paku, bulv twwxum tvl tabko-tablo do, bulv nyiqry kaanam mam svqgw do, bulv pw-hwwl jikho dwqtup do.

⁸Hoggab bulug dvk tebol lo lvlam samp ko dookmab, baas-baap paku

⁹Mwv hiyam cengm dvb tomswr tayin, hoo hiyam puiyam betam tayin? Hiyv gwwi twwdu bo ham yv, hiyv oc hoqgv naanam ham yv?

¹⁰Hoggab soq si vcwr go, toloq tv vcwr go, tomswrnam aoho tomswr yaada, tomswrnam aoho tomswr yaada, bwqnam aoho bwqnam yaada, bwqnam aoho bwqnam yaada gob nyido.”

¹¹Hoggab taka maanam nyiilug nvbcwr lvgab, hoo nyoodo nyi tulug lyol lvgab At Sw soq nyiilu sam gootayin,

¹²hiyam mwv bepakun, “Soq si doonu kov; nyelin boam doonu dvb jito; hoo soq si doonu kov”; hvbsujaqkam bulv tapa maadwn.

¹³Hoo At Swg agamv bulam betayin soq si vcwr go, toloq tv vcwr go, tomswrnam aoho tomswr yaada, tomswrnam aoho tomswr yaada, bwqnam aoho bwqnam yaada, bwqnam aoho bwqnam yaada gob nyidwn, ho bulv wlayil langkwb tabxeql geql dvn, hoo vmwq-akaqdvn, hoo pwd-potob haadwn, hoo naapaq dukun.

¹⁴Hoqgab bec-beya benbo tulu nul, hiyv Jerusalemho soq nyiilu sam pvvb bwwl doogbo nulv, At Swg agam mam tato!

¹⁵Hoggab nulv bepakun, “Ngulv sinam lvgab birwl ap pakun, hoo Sux-ywlw lvgab pvvb mwrpakun, hwdlo vcjaqb jwwnamv wpeq yukam hoqhv ngulam haata ma, hoggab ngulv vm mvvnam mam ngulug cwwgw mvpa kun, hoo xaalyongam ngulug doogwb naapa kun”;

¹⁶hoqgab soq sib Pwnbo At Sw bedo, “Kaato, ngo lak wlw pwxiam xuqka-xuqkal Jaiyon gwwlam diilwqnum, xinam wlw rwwdangam gwwl diilwqnum: ‘Hiyv xeq mwwjw tayin hv xargaq ram.’

¹⁷Hoo ngo bwqrnam mam jvqtwb bwqrtayin, hoo jvqtw xinnan lvgab xintayin; hoo vm mvvnam ho cwwgw boam nyodo taangv hurpaq tayin, hoo doogwngam issiv lumlup tayin.”

¹⁸Ho nulug sinam lvgab birwl apnamv dookram, hoo nulug Sux-ywlw lvgab pvvb mwrwl apnamv dookram; hwdlo vcjaqb jwwnamv wpeq yukam, nulam hoqhv akob jwwgeq lotayin.

¹⁹Lwxiam hoqhv wpeq yukam nulam naaky tayin; hoggab ar roxiam, aalam hoo aiyam hoqhv wpeq tayin; hoo hoqg puiyam cengdwb vcjaqb bostayin.

²⁰Hoggab kartamv vcjaqb otu ko-gab nyi akv lwjin-lvqjin lama, hoo pulup nanv vcjaqb romnyio ko-gab nyi akv tumlup nyoma.

²¹Hoggab At Sw Perajim puutungam daqrab mvtayin; Gibeon Lywpangam daqrab mvnam hvb daqrab mvtayin; mwwg bonam nyidwb hvbnyiloqkam—swrdorxeqkv mwwg nyisv! hoo mwwg bonam nyinam mam bonam nyidwb hvbnyiloqkam—swrdorxeqkv mwwg nyisv!

²²Hoqgab sija bej-bepar maabv, hvbmabde nulug swwbamnam mam ya hwngkw dvb mvto; hoggab Pwnbo nyiit At Sw galoqkv gvda gvtam twrdwb hvl pvvb mvnam ak ngo tapa pakun.

²³Ruucw kwrgab gvdwl, hoo ngoqg yal sam tato; tagab gvdwl, hoo ngoqg goonam sam tato.

²⁴Ampaq paqdwb hal tuqn bov tuqdu twql dooky dvn yv? Mwv mwwg rongongam tuqkoq koqdu twql dood nvi yv?

²⁵Hwdlo mwv rongongam tuqyw yukam, mwv tai-taiyaqkam, hoo wtw ammam hib-hibib hoo tanyeqkam liilwqko ho, hoo moku-tapam raagamlo liima dvn yv?

²⁶Hoggab mwam kvtaqjaqb tomswrnum; mwwg Pwnbo mwam tomswr dvn.

²⁷Taiyam jurpy daqk ho daqma dvn, ho taiyaqkam riqxaq maadwn, hvbmabde taiyam svvda lvgab swqxaq dvn, hoo taiyaqkam xunyia (fungi) lvgab xuxaqdvn.

²⁸Nyiv ammam wtw gab riqmwq dvn yv? Hvbma, mwv ham nwrba gob jurpy doqdu maadwn; hwdlo mwv hoq aob svpur lvgab riqjabl wikam, mwv ham riqmwq maadwn.

²⁹Soq siikam nyiit At Sw galoqkv haadwn; mwv swrdorxeqb tomswr-hony bov hoo dengky jaqb pumb rwdwn.