Read Nyishi AIJAYA 29 Bible Online

AIJAYA 29 - Nyishi bible

AIJAYA 29

¹Oa, Ariela, Ariela, hogloq ho Debidg doogw ko bopamv! Vnyw aoho vnyw vbw gvdwl; bulug deela ho dvmin soominamv xarl yvnka.

²Hvbsujaqkam ngo Arielam hentwr mvtayin, hoo hoqho mool-rinl hoo nyix-riim tayin, hoo mwn ngoqgab Ariel hvb nyitayin.

³Hoo ngo nulam tag-loosaqb ceekol doqtum tayin, hoo nulug soja lvgab ngo hwwtum tayin, hoo ngo nulam ceekol nyitum-nyigonam nyis tulungam nyirab tayin.

⁴Hoo nulam anyo dvb mvl tayin; nulv swcw soqgv agam gootayin, hoo diimwr hoqgv nulug goonam mam akob pvxw mvtayin; nulug yalv deela hoqgv oram yal dulinam hvb haatayin, hoo nulug goonam mam diimwr hoqgv jebsil jabin tayin.

⁵Hvbmabde nulug jaqt jaqb nyoodo ceebio tulungv diimwr hvb nyitayin, hoo naleqgo kwr-korbo tulungv amp hvb wpaq tayin. Hoo hoq nyinam hv haqmapaqb nyitayin,

⁶nyiit At Sw nulam doogum lvgab hoo nyioby hwqnam lvgab hoo vcjaqb ruuj-pumj dvb dunam lvgab, cwkeq-lvmeq la nyodo taa lvgab, hoo xvvtwrbo wm moily lvgab gaqatayin.

⁷Hoo dumtwq-miilywl nyob luuxiv Arielam ceekol nyob panbov, mwnwn ceekol nyob pan boam hoo mwnwg cwwgwngam nyob pan boam hoo mwnwn hentwr hembo mwlwngam, yuma maanam hvb la aiyam nyiqry kaanam hvb nyim tayin.

⁸Hwdlo kano bo nyiv yuma lo mwv dvs dudunam hvb hoo huurab yukun mwwg kanongv hvraqb noodunam hvb, ho hwdlo hvngwr bo nyiv yuma lo twws twwdunam hvb hoo huurab yukun mwwg hvngwrv hvraqb ngwrdunam hvb, dumtwq-miilywl nyob luuxiv Jaiyon puutungam ceekol nyob panbob nyitayin.

⁹Nulv atv atv lomto hoo lomdin svrinto; nulv atv atv nyiqca to hoo nyiqca to! Twwxumto, hvbmabde opo hoqgv ma; tabko-tablo to, hvbmabde vcib twwnam hoqgv ma!

¹⁰Hoggab At Sw yubngaqnam yalam nulug aoho jilwq pakun, hoo nulug vnyiqkam mutum pakun (nyiqry benbo tulungam), hoo nulug dumpongam pulupnum (nyigbo tulungam).

¹¹Hoo soq nyiqry kaanam mwlw si nulgab kitapho gomcwram mutumnam hvb nyipa kun. Hwdlo nyiingv hoqham rilaq boam jitwl begamv, “Sam rito,” mwv bedo, “Ngo sam nyila ma, hoggab hoqham leetum paku.”

¹²Hoo hwdlo bulv rilaq maanbo akam kitapam jitwl begamv, “Sam rito,” mwv bedo, “Ngo sam rila ma.”

¹³Hoo At Sw benum, “Soq nyiilu si agam lvgab ogumb hvvnwqdo hoo bulug nvbcwr lvgab paqdwqdo, hvbmabde bulug hangv ngoqg galoqkv aado kiyo do, hoo nyi tomswrnum gaml hoqgv nulv ngam bosdo,

¹⁴hoqgab, kaato ngo lokta soq nyiilu lvgab swrdorxeq pagoqkam nyita dvn, swrdorxeq aoho swrdorxeqb, hoo bulug pumb rwnam mwwlaqbo nyiilungv yuupaq tayin, hoo bulug cenglaqbog cenglaqkam kvstayin.”

¹⁵Oa, nulv hiyv nulug tomswr-honynam mam At Sw hoqgv ura jaqb kvsdvn, hiyvg nyinam tulungv kan dvn, hoo hiyv bedwn, “Hiyv ngulam kaapa dvn? Hiyv ngulam cengdwn?”

¹⁶Nulv dvrab pam likub-lexeq dvb mvdwn! Pwcw mvnboam deekam gob mwwtayin yv, ho dupum-dvrab mvnam yaangv hoq mvnbo akam hvl bedwn, “Mwv ngam hog mvma pan”; ho dupum-dvrab pwnum yaangv hoq Pwnbo akam hvl bedwn, “Mwv hog cenglaq ma”?

¹⁷Oyu maatab Lebanonam aaxy rongo gob, hoo aaxy rongongv nyoro rootaq gob nyikub maan mvi yv?

¹⁸Hoq aalam kitap hoq gomcwr goonam mam ruutar bov tapa tayin, hoo bulug kaiyal kanko hoqgv nyiqca bo vnyiqkv kaapa tayin.

¹⁹Yanbov nitbo hempam At Sw uraho naatayin, hoo jwwgwbo nyia ko pengko hoqgv Israelwg Dvrwqbo Ak ho hemp potayin.

²⁰Hoggab kwr-kor bov la bej-beparbov hog dookmab nyitayin, hoo mwlwjaqkv hiyv almanboam nyidwb koodu boam papaqtayin,

²¹agam gvmcw hoqgv nyiingam bimur bogub bedwn, hoo toggoqho hiyv tob-tai dvn hv mwam pwd-poto gob pvvdwn, hoo hiyv biyuq-bemaq dvn hv jvqtwngam bik-beya dvn.

²²‍Hoqgab soq sib At Sw bedo, hiyv Jakubg imiq gab mwwnv, Abrahamnvn pvlywnum: “Jakub lokta hvnyw kuram, mwwg nyuqmv lokta moiya rvxa kuram.

²³Hoggab hwdlo mwv mwwg ko tulungam, mwwg pengko ho ngoqg alaqg nyis nyinam mam kaaikam, bulv ngoqg eminam darxaqtayin; bulv Jakubg Dvrwqbo Akam darxaqtayin hoo Israelwg Pwnbo agaho bosil daqtayin.

²⁴Hoo hiyv yal ho nyogaqdvn hv cenglaqkv haatayin, hoo tomswrnam mam hiyv bud-bud haqdwn hv loorwq taikun.”