Read Nyishi AIJAYA 3 Bible Online

AIJAYA 3 - Nyishi bible

AIJAYA 3

¹Hoggab kaato, nyiit Pwnbo At Sw Jerusalem hoqgv la Juda hoqgv torl-daal jinam mam, dvs mwlwngam hoo iss twws mwlwngam,

²atorbo nyiam la sipai ham, hvvkiam la nyiqry kaan boam, nyoky nyubam la nyi axangam,

³camg sipaiywg Keptenam hoo nyiig bo tulungam, tomswr-hony bo la gwwn-nyiqry boam hoo xvvsw baqbin yaan boam soq mwlw sam naapaq tagdo.

⁴Hoo ngo ko tulungam bulug lvpw at gob mvtayin, hoo ko hoiyinv bulug aoho pvvb bwwl doog tayin.

⁵Hoo nyiilungv akwn-akwn nyijab-nyiyiq mins tayin, mwwg ajin vxiam hoo mwwg door-doopw vxiam; nyijwr-yaapa tulungv axangam modu kuram, hoo xikumnam mam haqpaq dvn.

⁶Hoggab nyiv mwwg abwg nambu uraho mwwg vbw-boram yumgab tvk hvl, betayin: “No kamt rumg doodo; no ngulug xilob swwto, hoo soq mucu-mviyal yoqkum namsi noqg pvvb ura lo dootayin”;

⁷hoq aalam mwv goolin tayin, hoo betayin: “Ngo mwpbo akwb nyila ram; hoggab ngoqg nam lo dvs gokam ho kamt gokam dooma; nulv ngam nyiilug nyigbo gob mvla ram.”

⁸Hoggab Jerusalemv dwqtup pakun, hoo Judangv yaql pakun, hoggab bulug goonam mvla bulug nyinamv At Swn ceeko dvn, mwwg yuudub doomin gvnam mam haqpaql looma dvn.

⁹Hoggab bulug nyuqmv bulam hvvky ceeko dvb kaalaq dvn; bulv bulug nyimuram Sodom hvb bekin dvn; bulv ham kvs maadwn. Bulam mwwdwq mvto! Hoggab bulv atv atam alman boam boqpup supa kun.

¹⁰Dvrwq boam betam to bulam hoq lvgab altayin, hoggab bulv bulug nyijo aaxiam dvtayin.

¹¹Nyic bov mwwdwq to! Mwv hoq lvgab vc tayin, hoggab hoqgv mwwg alaqkv nyilin pakun hvbkalam mwam nyij tayin.

¹²Oa ngoqg nyiilungam—ko hoiyinv bulam nyijab-nyiyiq dvn, hoo nyem tulungv bulam pvvb bwwl doogdvn. Ngoqg nyi tulunga, noqg tomswr bov nam nyixiaq gvpa ku hoo bulv noqg lamta pagoq tulungam bik-beya paku.

¹³At Sw mwwg kwlib hentwr hendwb naap kun; mwv nyiilungam pw-hwwdwb daqdwn.

¹⁴At Sw nyiixa tulu la lvpw atwg lvgab mwwg nyiilungam pw-hwwtab urab haatayin: “No su roo boolungam coocu-caaya pakun, jwwgw bog mudup-mvnyiapnam dvrabpv nulug namlo doodwn.

¹⁵Ngoqg nyiilungam nulug vmwq yumgub mvnamv, jwwgw bog nyuqm mam twrmwqnamv hoggv doodwn?” nyiit Pwnbo At Sw bibwq dvn.

¹⁶At Sw benum: Jaiyonwg nyem ko tulungv larl hoo lwwpo xwqjin tvl wggam gab, bulug vnyiqkv mvd-nyidwb kaagam gab, bulv wikam coodup-caanyiap wggam gab, bulug lvpia lvgab dudin dingjol wggam gab,

¹⁷hoqgab At Sw Jaiyonwg nyem ko tulug dumpongam un mvgwl dum rwxaq dvb jwwtayin, hoo At Sw bulam twwla kaaga dvb mvtayin.

¹⁸Hoq aalam At Sw kangam jaqn bo lwxwngam, dumpinam, hoo xinam tvswngam;

¹⁹ruubinam, koojam, hoo lwwpo puutum nannam;

²⁰bopyangam, dindu puucwngam, vj poqbaqkam, sungam bo uddum mam, hoo nwlw hiqlwqnam mam

²¹lvqcam hoo nyupum gagiam;

²²lvvtum vjam, lolupam, kamtam hoo alaq bvvnam kui tulungam;

²³vrs tulungam, topum vj tulungam, bopya tulungam, hoo puutum nanam naapaq tayin.

²⁴Sungam bo kwlib hoqho naiyangv suutayin; hoo soruq kwlib osongv; hoo dum aljaqn bo kwlib dungxo tayin; vj albo kwlib tuila vby-anyongam gvtayin; hoo kangam kwlib kaap maatayin.

²⁵Noqg nyiilungv lyoqr niqtuqb, hoo noqg atorbo nyiilungv nyob pak uraho haatayin.

²⁶Hoo mwnwg toggoq tulungam nyix-riil hoo morl dootayin; asarb mwn deela aoho dootayin.