Read Nyishi AIJAYA 30 Bible Online

AIJAYA 30 - Nyishi bible

AIJAYA 30

¹“Oa, tamy bo ko tulunga,” At Sw bibwqdo, “hiyv mwwnam mam niqtuq nyilin dvn, hvbmabde ngoqg ma, hoo lvqry-laqso mvsdo, hvbmabde ngoqg yal lvgab ma, ho bulv nyic hoqgv nyic yaadab vbw yinpv;

²hiyv Ijiptwb idwb mwwx-svqrw dvn, ngoqg lamtangam tox kamab, Parog raonam mam cwwgw naadwn hoo Ijipt doonyium ho doogw meekar dvn!

³Hoqgab Parog raonam nammv hvnyw gob nyikub tayin, hoo Ijipt gv doonyium ho doogwnam nammv xima dvb nyitayin.

⁴Hoggab mwwg oppisv Joan ho doos jaqkam hoo mwwg hvvky tulungv Hanes ho wc dvn,

⁵Nyiicwr-cwrxiv hvnywl haadwn hoq nyiilu hoqgv bulam nyegam ram, hoqhv svkangam la nyegam boam haag ram, hvbmabde hvnyw ngvla ximanam mam haag dvn.”

⁶Negeb svdin tulungam gamt tonam. Vs-axa bvla hentwr nyook hoqgv, ho hogloqkv sony nyot nyem-nyega gv, taaj jeeramv hoo bwxeq naalo tvbv haadwn, bulug nyetam bulv svdam tulug langk ho, hoo bulug gumnam svjin tulug luuc ho baqtwl, nyegam maanbo nyiilu dookub haadwn.

⁷Ijipt gv svkanamv ximanamv hoo asarv; hoqgab ngo mwnwn goqpa kun “Rahab cooikab hvraqb doodwn.”

⁸Hoo sija wgdvl bulug agaho soq sam lwpiaho xeqta hoo hoqham kitap uraho xiqlwql apta, ho hoqhv kuiyum mam nwrba xaqb hvvkib gob doom tvka.

⁹Hoggab bulv taleqbo nyiilungv, xaalyo bo ko tulungv, At Swg tomswrnam mam, tagab tvs mwwma bo ko tulungv;

¹⁰hiyv nyigbo tulungam bedwn, “Kaamabv,” hoo nyiqry benbo tulungam bedwn, “Ngulam hoggv jvqtw dvn ham nyiqry bemabv; ngulam tangam bo pagoqkam gooto, jvqtw maanam nyiqry benam mam beto,

¹¹lamtangam apto, lamta hoqgv daqyeqto, ngulv Israelwg Dvrwqbo Akam lokta tak yooju.”

¹²Hoqgab soq sib Israelwg Dvrwqbo Akv bedwn, “Nulv soq gomcwram oyum paku hoo nyijab-nyiyiqnam mam la nyixiaqnam mam mwwgw dvn hoo bulug aoho svqgw dvn,

¹³hoqgab soq nyixiaqnam si nulgab gurum ao bov yaqpia tanam hvb, buujinl yaqpia tanam hvb, hoo tabto tanam hvb nyidwn, hoq yaqpianamv haqmapaqb nyidwn;

¹⁴hoo hoq yaqpianamv deekam pwcwngv vmwq-akaqgob yoqdupnam hvb yoqdup dvn, ho hoq pengko ho vmwq-akaqkam yoqmwqnam mam kaapa kuma dvn imiq wm hoqgv hog naas doomanam hvb, ho sokum iss tuqlin sv doomanam hvb nyidwn.”

¹⁵Hoggab soq sib Pwnbo At Sw benum, Israelwg Dvrwqbo Akv, “Hookurl hoo doonul nulam ywwlin tayin; nyum-nyum bvla mwwgwngv nulam ator torg tayin.” Hvbmabde nulv hang mwar maanum,

¹⁶‍hoo nulv benum, “Ma! Ngulv svpur tulug aoho dootwl ketayin”; hoqgab nulv aadob keleqtayin; hoo, “Ngulv nyebia jaqb puutu aob xartayin”; hoqgab nulam ruqmin gvnbov nyebia jaqb ruqtayin.

¹⁷Nyi akin belam yukam lwwywngv ketayin; ang go belam yin nulv ketayin, hwdlo puutu ao lo jet tooriam torpeel, hoo yorn ao lo muxul ap peel apaqnam hvb nulam apaqdvn.

¹⁸Hoqgab At Sw nulam anya dvb kaaya dvn, hoo mwv atam paqs dvn nulam ayangam kaakin dvb. Hoggab Pwnbo At Sw jvqtw dvn; hiyv mwwgab kaaya dvn hv xinam jaqkv.

¹⁹‍Hoggab Jaiyonho la Jerusalemho nyiilungv dootayin; nulv lokkam xabkram. Nulug xabnam yalam tapa yin mwv jvqtw jaqb nulam anyatayin. Mwv hoqham tapa twqda kalam, mwv nulam birwqtayin.

²⁰‍Hoo At Sw nulam vs-axaqkam dvswb hoo hentwram twwswb jis jaqkam, nulam tomswr bov mwv atv atam lokam kvs kuram, hvbmabde nulug vnyiqkv nulam tomswr boam kaapa tayin.

²¹‍Hoo hwdlo nulv lvqbwqb wikam, ho hwdlo nulv laqcib wikam, nulug nyurungv gomcwram nulug langk hoqgv bidul doonam mam tapa tayin, “Soq si lamtangv, hoqb wto.”

²²‍Ho nulug murty mvtwl rupam la hunam nulv jiqtamnam yoqdwr guss tulungam kacdvb mvtayin. Nulv hoq tulu ham kacboam hurpaqnam hvb hurs-hurtwr tayin. Nulv hoq tulu ham betayin. “Wpaq tuku!”

²³‍Hoo mwv nulug rongo hoqg vly liinam gab nyodongam hom jitayin, hoo rongo hoqgv vly aaxeqngam swwlin mvtayin, ho nulv nyet bvla naleqtayin. Hoq aalam nulug tuun-meengv naleqgo nwmw dvmin tayin,

²⁴‍hoo rongongam mvnbo hvvbv la svdam tulungv darlo xookub-xooxeq tvl, mood-moodam dvsam dvtayin.

²⁵‍Hwdlo vcjaqb patab de aal hoola soja tulungv yaqpia de ho aobo puutu tuuxiv hoo yorn yorxy hoqgv pobu kucw issiv tomin tayin.

²⁶‍Hoq aoho, pool hutongv doonyi huto hvb huutayin, hoo doonyi hutongv kvn go huubin yaatayin, kvn aal go huto huunam hvb, hoq aalam At Sw mwwg nyiilug lvdwr-laqdwr boam puudin tayin, hoo mwwg nwqnam hoqgv uun boam mwptayin.

²⁷Kaato, At Swg, wm mwk juucanam hvb, mwwg haaxaqnamv bioqk-bioqk bioql, mwwg nvbcwr hoqgv mwjwr jwrlinl, hoo mwwg lyol hoqgv wm moily bioqlinl aado hoqgv haado;

²⁸mwwg saqnamv iss tol lwwgu ho cvvcnam hvb; iss hingxub pan hvb nyob mwlwngam asaq-asaqb twrm dvn, hoo nyiilug coqklo alongam vlwq tayin hoqhv bulam gaqxar gvtayin.

²⁹‍Nulug hangv hempwl hoo dvrwqbo soominl dvminam mam pvvnam hvb, nulv aiyam bemin ak betayin, hwdlo nyi akv piul tabnam yalam talayil At Sw, Israelwg Lwwn atwg puutub wtayin.

³⁰‍Hoo At Sw mwwg swrdorxeq yalam tapa mvdwb nyitayin hoo mwwg laqpo jwwgeq lonam mam hang lengl bioqnam mam hoo xvvtwrbo wm moiliam, doogum-taiyam buqporl hoo nyodo taa holnam mam kaapa tayin.

³¹‍Hwdlo mwwg dvvcw lvgab mwv jwwikam, At Swg yal hoqgv Assiriya nyiilungam bosil xitab tayin.

³²‍Hoo At Swg jwwdaqko mwlwngv tamborin tulungam jwwdin yin la rwwxw-gungga yalwb dutayin. Nyob pal alaq lwwn lvgab mwv bulam patayin.

³³‍Hoggab kol otuqho wm park nyook ak mwx-mvaq pakun; jvqtw jaqb lvpw atam mwx-mvaq pakun, ramxaq nanam urw dvb la taqt dvb, wm mam la wswngam naleq dvb mvpa kun; At Swg saqnamv wmv pobu hvb tolwl hoqho toggab dvn.