Read Nyishi AIJAYA 32 Bible Online

AIJAYA 32 - Nyishi bible

AIJAYA 32

¹Kaato, lvpw at ak jvqtw hoqgv pvvb bwwl doog tayin, hoo lvpw atwg nyega kov jvqtw pvvb bwwl doog tayin.

²Vxiv dooi hoqgv kvs sigw hvb nyidwn, doogum-dooi hoqgv doogw akub nyitayin, nyook pwtw ho iss pobu tonam hvb nyitayin, hentwr-kaas nyook ho koibo lwwpwq doonyium hvb nyitayin.

³Ho hiyvg vnyiqkv kaadwn hv nyiqcw kuram, hoo hiyvg nyurungv tadwn hv ruucw kwrgab tayin.

⁴Nyebia bo hangv talaql cengtayin, hoo lyongaq bo tulungv nyebia jaqb luusaq dvb gootayin.

⁵Damaboam lokkam xinamv hvl goqkram, ho nyimur-nyic boam xinam jaqkv hvl bekram.

⁶Hoggab damabov damangam goodwn, hoo mwwg hangv nyixiaq lvgab nyoma dvn, dvrwq maanboam nyidwn, At Sw pagoq gab nyixiaq looda dvn, kano boam xumt mvmab apaqdvn, hoo hvngwr boam twwm mvma dvn.

⁷Nyimur-nyic bov mwwg nyinanv almanbov; hwdlo dwc-twwpw maanbo nyi tulug konamv kvtaq sujaqkam, mwv nyic-nyiangam nyidwb mwol mwwg xaalyo lvgab jwwgw boam twrm dvb mwwdvn.

⁸Hvbmabde xinam nyi akv xinam pagoqkam mwo coodwn, hoo mwv xinam pagoqho daqdwn.

⁹Gorabto, sepy bo nyem tulu nulv, ngoqg yal sam tato; atv xumtbo nyem ko tulu, ngoqg agam goonam sam ruucw kwrgab to.

¹⁰At Swv xumtbo dvn tulu nulv, vnyw nywleq gob tvmdwr tayin; hoggab roo aaxiv xeekma, aaxy-amarv xeelin takma.

¹¹Hiyv sepy bo dvn tulu nulv, tvmdwr to, atv xumtbo nulv, tvmdwr to; hoo nulv atv atam talo dvb twqbin to, hoo nulug hwwpo ho tuila vjam xiqlwqto.

¹²Aljaqnbo rongo tulu gab la roo aaxy gab nulug swqbwngam nulv kwdin suto,

¹³hoggab ngoqg nyiilug nyookv taa ngvla nwmwngv swwdu do, vjaq xinam jaq bopam uraho hempbo namlo mwlw hookam.

¹⁴Hoggab lvpwngam hwqdin paku, nyiitw-mvqlwko bopam mam haqpaqnum; yornv la kaal dook sojangv nwrba xaqb lwwpwq tulu gob nyitayin, nyoro svdam tulug hempv, sibin-svv pvtwg nwmw dukum koob nyipa ku;

¹⁵hwdlo Yalam ao hoqgv ngulug aoso jilwq maad deedib, hoo deexa-rarangv aaxy rongo gob nyikub dvn, hoo aaxy rongongv nyorob nyidkun.

¹⁶Ho jvqtwngv deexa-rara ho dootayin, hoo jvqtwngv aaxy rongo ho doomin gvtayin.

¹⁷Hoo jvqtwg niqtuqkv swrso tayin, hoo jvqtwg niqtuqkv nyum-nyum bvla nwrba gob mwwgw tayin.

¹⁸Ngoqg nyiilungv swrsomalongam bugil swwl dootayin, cumciq doogw hoola nyum-nyum doonu ko nyook ho dootayin.

¹⁹Hoo hwdlo nyorongv twryum yukun, hoqhv niita yukun, hoo bopamv twrkub akob yoql tayin.

²⁰Hiyv nulv iss bviyoqho vly liinbov, hoo hiyv hvvbam la svdamg lvpiangam toosuq tvl gaql yvmbov hempnam jaqkv.