Read Nyishi AIJAYA 33 Bible Online

AIJAYA 33 - Nyishi bible

AIJAYA 33

¹Oa, twrnbo no, hiyv atv atam twrs maapwn, nyipinbo no, hiyam nyi akkam nyipin maapan! Hwdlo no twrmnam mam saqnu yukun, nam twrta yukun; hoo no nyipin pingyum yukam, bulv nam nyipin tayin.

²At Swa, ngulam anya tvb, ngulv nam kaaya dvn. Ar roxiam ngulug nwwxo-svtamb nyitbv, vs-axaq moodam ngulam ywwlin bo.

³Tadar-tapar maadwb duikam nyiilungv kedo; hwdlo no atv atam daqrab yin, nyob luusaqkv cwrsaq-bvraqnum,

⁴hoo noqg pareql nookumnamv taqt-raqr gwkumnam hvb nyido; takam poqkumnam hvb hoqhv poqkum do.

⁵At Swn yuumnum, hoggab mwv aoho doodwn; mwv Jaiyonam jvqtw ngamla dvrwqkam bwwr mvtayin,

⁶hoo mwv moodam biimab doom tayin, ywwlinamv, pumb rwnamv, hoo cengnamv naleq dvn; At Swn bosnamv Jaiyonwg gumnv.

⁷Kaato, bulug nyiixwqbo tulungv lyobu tuluho xabl yvdo; swrso gab nyegam tulungv vcjaqb xabdo.

⁸Lamta paadangam sojv maalap paku (dooxa duku); nyoyw wnbov wkma. Birnam pvvbam mvpia paku; bopam tulungam haqpaq paku; nyi tulungam xikma.

⁹Gvdangv nyix-riil hoo hentwr hendo; Lebanonv hendar-henpar kumab sengpaq duku; Saronv diixa-rara hvb nyidku, hoo Basan nvla Karmelv bulug okam hwqdinl hwqpaq paku.

¹⁰At Sw bedo, “Ngo sija gorab tayin.” “Ngo sija atv daqrab tayin; ngam yuurab taikun.

¹¹Mwwsam bo nulv; nulv amrongam ko bwwdwn; nulug saqnamv nulam wmmwb gutayin.

¹²Hoo nyiilungam tac cola gunam hvb gutayin, taangam patab tvl, wm parnam hvb partayin.”

¹³Ngo hoggv nyiknum, nulv hiyv aado ho doon bov tapa to; hoo hiyv nulv ogum hoq doon bov, bekinl bepa to.

¹⁴Jaiyon ho nyimurbo tulungv bosdvn; dvrwqb swwma boam bosnamv mviya paku: “Ngulug pengko soqgv hiyv xvvtwrbo wm lvgab doola tayin? Ngulug pengko soqgv hiyv kuiyum nagub xaal doonbo lvgab doola tayin?”

¹⁵Hiyv jvqtw lamtab wdwn hoo jvqtwb goodwn, hv nyijab-nyiyiq layil naanam mam haqpaq dvn, hiyvg alaqkv tvmdwr dvn, bulv kam jinam mam nootu maadwn, hiyvg nyurungv ywlw twwnam mam tvnw maadwn hoo hoqg vnyiqkv almanam tuugab maadwn,

¹⁶mwv ao lo doogw tayin; mwwg cwwgw nan nyook hoqg gurumv bodo lwwnv; mwwg dvsam mwam jitayin, hoo mwwg iss twwsv kvxaqram.

¹⁷Nulug vnyiqkv kangam bo lvpw atam kaapa tayin; bulv vcjaqb ywwtabo gvdangam kaapa tayin.

¹⁸Nulug hangv bosnamho mwwtayin: “Hogloq ho xika bo akv, hogloq ho lvqcam jaaka bo akv? Hogloq ho sojangam xika bo akv?”

¹⁹Nulv modu maanbo nyiilungam lokkam kaapa kuram, cengla maadwb goonbo nyiilug goonam mam nulv mwwc nyokram, lyongaq bo tulug benam mam nulv cenglaq kuram.

²⁰Ngulug soomin dvmin dvb xuqpnam bopam mam, Jaiyonam kaato! Nulug vnyiqkv Jerusalem mam kaapa tayin, hoqho doonbo nyiilungv vs-axaqram, biima bo doogwngv, ham hiyv kam naareq dvb hampeqram, ho hoqg oso-teriam pupiqram.

²¹Hvbmabde yuunbo At Sw ngul gab pobu taqtbo la pobu kucw mwlwho dootayin, hoqb nwwxo-svtam baqnbo swpv, ho vcjaqb swp koibov wpeq nyoram.

²²Hoggab At Sw ngulug hvvkiv; At Sw ngulam pvvb jinbov; At Sw ngulug lvpw atv; mwv ngulam ywwlin tayin.

²³Nulug osongv tonur do; hoq tuluhv svvpongam vcib rubtin apma ho cwrsaq-bvraqb jaagaq mvgdo. Ho mviyal naareqnamv naleqyin ham horpin-hora dvn; lukum bov kam naatayin.

²⁴Hoo hoqho doonbo nyiilungv beram, “Ngo vc dvn”; hoqho doonbo nyiilungam bulug nyixiaqkam apaq jitayin.