Read Nyishi AIJAYA 34 Bible Online

AIJAYA 34 - Nyishi bible

AIJAYA 34

¹Ogum hvvnwqto, nyob tulunga, tapal hoo ruucw kwrgab dvb, nyiilunga! Swcwngv tato, hoo hoqho doonbo mwlwngv; gvda gvtv, hoo hoqgv haanbo mwlwngv tagabto.

²Hoggab At Sw nyob mwlwngam ceekol hang lengdwn, hoo bul mwlwngam ceekol hang lengdwn; mwv bulam twrm dvb jipaq pakun, bulam patab mvdwb jipaq pakun.

³Bulug patabnam mam joopaq tayin, hoo bulug svma naiya suurab tayin; bulug hijumv puutu hoqgv tol tayin.

⁴Doa toloq doonbo mwlwngv yaapaq tayin, hoo cwwnyiaq-doonyiaqkv piuar tiqnam hvb tiqtayin. Roo ok rwlnam hvb, taoq svvn ok rwlnam hvb, bulug hog mwlwngv yoqtayin.

⁵Hoggab ngoqg lyoqr orioqkv doa tolo doonbo mwlwngam twwxum pakun; kaato, hoqhv Idom aoho pw-hwwtab ipoqdvn, nyiilungam twryum dvb ngo mwwx-mwwrwnum.

⁶At Sw lyoqr orioq daag doogdvn; hoqhv hijum mam xumt dvb twwdwn; hoqhv ox lvgab, sviya gvla sibin hijum lvgab, yaap tvmwrg xiicwr ox lvgab mviyaq dvn. Hoggab At Sw Bojra ho pwr ak jipa kun, Idom gvdaho vigo patabnum.

⁷Nyorog carb tulungv bulug lvgab yoql tayin, hoo hvvpa tulungv atorbo hvvb tulu lvgab nwqmin sutayin. Bulug gvdangv hoqg hijum mam twwtayin, hoo bulug kediv ox lvgab kaqco-kaqyo tayin.

⁸Hoggab At Sw ree daqdwb aal loog, hoo Jaiyon lvgab aky jidwb vnyw nywg pvvpa kun.

⁹Hoo Idomg pobu tulungv deela gob nyikub tayin, hoo mwnwg kediv cumdwq nyikub tayin; hoo mwnwg gvdangv og gul doonbo gob nyikub tayin.

¹⁰Ai-aalwb hoqhv miqram; hoqg mwkv nwrba gob juutayin. Ko hosiq-hosiq xaqb hoqhv doopaq bo nyookub nyitayin; hoqb nwrba cwtam kuiyum namgub nyi ak kam wpeq kuram.

¹¹Hvbmabde hoqham twt-bwrv la sisv doog tayin, hoqho pupv la poaqkv rwqgw tayin. Mwv vrram kaadar-kaapar maadwb bwql aptayin, hoo xinnanv asarb dootayin.

¹²Si jaq xinam—hoqham lvpw-haty hvl goqnam akam dookma, hoo hoqg lvpw atwg ko tuup tulu mwlwngv niqtuq dookma.

¹³Hoq cwwgw nan tulu aoho taangv swwtayin, hoqg gurum tulungam ter-tanv homlup tayin. Hoqhv svca tulug rwqkum koob hoo ostric tulug dookum koob nyitayin.

¹⁴Nyoro svdin tulungv hainas lvgab cemin sutayin; nyorog bembv bulug ajinam sogoq tayin; jvqtw jaqb hoqho aiyam pvta tulungv rwqkum tayin hoo bulv bulug doonu koob kaapa tayin.

¹⁵Hoqho pupv osup subl hoo pwp pwl hoo gubl ko garl hoo lobyum tvl bulam lvkin gob yvgtayin; jvqtw jaqb twt-bwrv lvkin gob dool akwn-akwn meemin sutayin.

¹⁶Meegaqto hoo At Swg kitapam rito: Ak jaqkam hoqhv nyiiram; mwn gab ajin ak jaqkam doomab dooram. Hoggab At Swg agamv gaml jipa kun, hoo mwwg Yalv bulam bookum pakun.

¹⁷Mwv bul gab tak kaapa kun; mwwg alaqkv bulug naady sanam mam bwqrwl bwqlin jipa kun; bulv hoqham nwrba gob doog tayin; ko hosiq hoqgv hosiqb bulv hoqho dootayin.