Read Nyishi AIJAYA 35 Bible Online

AIJAYA 35 - Nyishi bible

AIJAYA 35

¹Deexa-rara ngvla pwtw nyookv hemp potayin; diixa-rarangv hwnyir-hvmarl hoo opu-aaxiv yaqbeqnam hvb nyitayin;

²hoqhv naleqgo opu-aaxiv yaqbeq tayin hoo hwnyir-hvmar lvgab hemp beminam betayin. hoqham Lebanonwg yuunam mam, Karmel gvla Saronwg xinam mam jitayin. Bulv At Swg yuunam mam, hoo ngulug Pwnbog xinam mam kaapa tayin.

³Laanyi maanbo alaqkam ator dvb mvdwn, hoo hwngkw maanbo lwbwngam hwngkw mvdwn.

⁴Hang hol mwwdwqbo hangam beto, “Haakam to; bos maabv! Kaato, nulug Pwnbov ree daqnam lvgab la, Pwnbog aky jinam lvgab haatayin. Mwv haatayin hoo nulam ywwlin tayin.”

⁵Ho nyiqca bo vnyiqkv piokoq tayin, hoo ruutar bo nyurungv tal dootayin;

⁶ho lukum bov sudum pojuqnam hvb juqtayin, hoo goocin maanbo lyolv hemp bemin betayin. Hoggab deexa-rara lo issiv buqlin paku, hoo diixa-rara lo pobungv todo;

⁷og gul doonbo xuqx tulungv hviyiqbo sokumb nyikub paku, hoo deela pwtw bov iss buqlin do; hogloq ho svcangv cwwgwl karl dook nyook nwmwngv, tvtwq-nwwbu hoo poqta saala gob nyikub paku.

⁸Hoo hoqho lamta paadangv dootayin, hoo hoqham Dvrwqbo Lamtangv hvl goqtayin; hoqb kacbov wpeq nyoram. Hiyv hoq lamtab wnbo tulu gab hoq lamta hv dootayin; bulv dama sujaqkam, bulv gaqxaram.

⁹Hoqho sony nyot dookram, ho cen-gamn bo akam hoq lamtab caapeq kuram; bulam hoqho kaaparam, hvbmabde pvlywnam tulungv hoqb wtayin.

¹⁰Hoo At Swg pvlywnamv hookur tayin hoo bemin lvgab Jaiyon ho haatayin; kuiyum nagub hempnamv bulug dumpo ho dootayin; bulv mwwngam mam la hempam paatayin, hoo mwwdwq-saqkv la hentwrv aadob keleqtayin.