Read Nyishi AIJAYA 37 Bible Online

AIJAYA 37 - Nyishi bible

AIJAYA 37

¹Hoqham lvpw at Hejekiya tada tvl, mwv mwwg vjam twqjor tvl hoo mwv atv tuila vj lvgab tomlup tvl At Swg namlob wwnum.

²‍Hoo imiq dvparam kaaya bo Eliyakim, hoo nyig-wgbo Sebana mwv kanamnum, hoo axabo nyub tulungv Amojwg ko tuup nyiqry benbo Aijayanvn tuila vj lvgab tomlupnum.

³‍Bulv mwam benum, “Soq sib Hejekiya bedo, ‘Soq aal si vs-axaq aalv, yolu ruqnam aalv, hoo ximanam aalv; ko tulungam bwwlin dvb nyis do, hvbmab ham bwwlin dvb ator dook ma.

⁴‍Noqg Pwnbo At Sw Rabsakeg gomcwr tulungam tapa kamyi nvpv, hiyam mwwg at Assiriyag lvpw at swwl doonbo Pwnboam bej-bepar mvdwb kanam pakun hoo noqg Pwnbo At Swg gomcwr tapanam tulungam yolu ruqtayin; hoqgab boumnam nyi tulu gab noqg swgwnam mam nyirab to.’”

⁵‍Hwdlo Hejekiya lvpw atwg nyera tulungv Aijaya dook ho haanum,

⁶‍Aijaya bulam benum, “Nulug atam betam ta, ‘Soq sib At Sw bedo: Bos maabv hoggab nulug gomcwr tapa kunam hv, yaapa bo Assiriyag lvpw atwg ceebio baqnam mam ngam betam pakun.

⁷‍Kaato, ngo mwam yal ak jilwqtayin, ho mwv xwwk-xwwyanam gon ak tapa tayin hoo mwwg gvdab wkur tayin, hoo ngo mwam mwwg atwg gvda lo lyoqr niqtuqb haam dvb mvtayin.’”

⁸‍Rabsake wkur kunum, hoo Assiriyag lvpw at Libnanvn ceekol nyob podu dvb kaapanum, hoggab Lakiswb lvpw at wleq kunam mam mwv tapanum.

⁹‍Kuswg lvpw at Tirhaka lvpw atwg pagoqkam tapa kunum, “Mwv nam ceekol nyob patab wrab nukba.” Hoo hwdlo mwv ham tapa yukho, mwv Hejekiya dookub pui baqnbo tulungam kanaml begamv,

¹⁰“Soq sib no Judag lvpw at Hejekiyanvn gootayin: ‘Noqg mwwgwnam Pwnboam no dingr kul Jerusalem gvdangam Assiriyag lvpw atwg alaqho jilwqram hvl vm mvvk maabv.

¹¹‍Kaato, Assiriyag lvpw atv gvda mwlwngam twrdwb mwwx-mwaqnam mam nulv tapa pakun. Hoo nulam naalin taikun yv?

¹²‍Ngoqg ab tulug twryumnam nyob hoolu Gojan, Haran, Rejep, hoo Telassar ho doonbo Iden nyiilungam, nyob hoolu ho pwnbov bulam naalin pan yv?

¹³‍Hogloq ho Hamatwg lvpw atv, Arpadwg lvpw atv, Separbaimwg bopam hoqg lvpw atv, Henag lvpw atv, ho Ibbag lvpw atv?’”

¹⁴‍Hejekiya pui baqtambo tulug alaq hoqgv potangam nvvrwql hoo ham rinnum; hoo Hejekiya At Swg namlob wwnum, hoo At Swg agaho hoqham lwqko tvl apnum.

¹⁵‍Hoo Hejekiya At Swn swgwnum:

¹⁶“Nyiit At Swa, Israelwg Pwnboa, Cerubim aoho ywr dumtupam tuplwqnum aka, no jaq Pwnbov, no aro twq, swcw soqg lvpw-hatiam mvnbov; ho no doa nyookam la swcw sam pwnum.

¹⁷‍Noqg nyurungv ruucw kwrgab tvbv, At Swa, hoo tapa tvbv; noqg vnyiqkv pioko to, At Swa, hoo kaato; hoo Sennakerib gomcwr mwlw sam tato, soq si swwl doonbo Pwnboam bej-bepar mvdwb kanam paku.

¹⁸‍Jvqtw jaqb, At Swa, Assiriyag lvpw atv nyob mwlw ngamla bulug gvdangam doopaq dukub mvpa kun,

¹⁹‍hoo bulug pwnboam wm uraho joolwq paku. Hoggab hoq tuluhv pwnbo ma, hvbmabde hoqhv svvda ngamla wlwngam nyi tulug alaq hoqgv mvnamv. Hoqgab bulam twryum paku.

²⁰‍Ho sija, ngulug Pwnbo At Swa, mwwg alaq hoqgv ngulam ywwlin tvb, ho no aro twq At Sw hvl, swcw soqg lvpw-haty mwlwngam cengm to.”

²¹‍Ho Amojwg ko tuup Aijaya jilwqnum, begamv, “Soq sib Israelwg Pwnbo At Sw bedo: Hoggab Assiriyag lvpw atwg Sennakerib pagoq gab nulv ngam swgw paku,

²²‍mwwg pagoqkam At Swg gomcwr goonamv soq si: “ ‘Jaiyonwg mvvngam nyijwr — mwn nulam oyum do, mwn nulam xikma; Jerusalemwg nyijwr — mwn nulug langkwb dumpwq pwqxa duku.

²³“ ‘Hiyam nulv bej-beparl hoo oyum dvn? Hiyam nulv ceekol sogoq goqdwn hoo nulug vnyiqkv nyiidu kulul kaadwn? Israelwg Dvrwqbo Akam ceeko dvn!

²⁴Nulug nyera tulu hoqgv At Swn bej-bepar paku, hoo nulv benum, ngoqg mvqlwbo ceriot lvgab ngo aobo puutu mwlwngam cao pakun, aado kiyo Lebanon nyook nagub, ho hoqg mwlwngam ao yaanbo sidar svvn tulungam, ho hoqg mwlwngam xibinam saipres svvn tulungam kwrtab pa, ho mwlwngam caac lamanam puutu tuluho, hoqg aaxy-amar xeebin yaanbo nyoro ho haanum.

²⁵Sokum tulungam ngo hengnum hoo issam twwnum, Ijipt gv pobu kucw mwlwngam xoom dvb ngoqg lvpiangv samdaqnum.

²⁶“ ‘Kol otuq hoqgv sam nyidwb ngo mwwrnum mam nulv tapa maan mvi yv? Kol otuq moodho ngo hoggv mwwr ap pakun ham ngo sija baqa dvn, ho nulv gurum nwqtumnam bopam tulungam yupaq dvb mudup mvm dvb,

²⁷ho hoqho doonbo nyi tulug atoram anyo mvm dvb, hang hoxa mvm dvb hoo mwwdar-mwwpar mvma dvb, hoo deelag nwmw hvb, hoo jurlin bo nwmw hvb, mwwlo ao lo nwmw buqlin tvl swwrab maatab singtwrnam hvb nyim dvb.

²⁸“ ‘Ngo nulug doonam mam hoo lvvgwb lengnam mam hoo urab haanam mam, hoo nulug ngam ceekol kwr-korwb nyinam mam cengdo.

²⁹Hoggab nulv ngam ceekol kwr-korwb nyipa hoo nulug atv paqsnam mam ngoqg nyuru si hvvc paku, ngo nulug nyupumho ngoqg vkaram haqgab tayin hoo ngoqg duduq-dvngaram nulug agamho vlwq tayin, hoo nulug lamta haakwb ngo nulam wkur mvtayin.’

³⁰“Hoo soq si nulgab muxnam gob nyitayin: soq vnyw so hoggv hoqkv swwlin pan ham dvtayin, hoo vnyw nywnyi deenam hoqgv hoggv jurlin tayin ham dvtayin. Ho vnyw nywum deenam vly liito hoo dvn naato, hoo roo aaxiam liito, hoo hoqg aaxiam dvto.

³¹‍Hoo Juda namlo ho boumnam tulungv lokta mvmiangv niikumb haatayin hoo aoho aaxiv xeetayin.

³²‍Hoggab Jerusalem hoqgv boumnamv, hoo Jaiyon puutu hoqgv swwl doonbo acam go lengtayin. Nyiit At Swg hwrcwb mwwnamv soq sam nyitayin.

³³“Hoqgab soq sib At Sw Assiriyag lvpw at pagoq gab bedo: Mwv soq bopam urab haalaram ho tolo uppuq abnyiram ho svtam lvgab haanyiram ho hoqham ceekol svvpo jootuml paal ap nyoram.

³⁴‍Hogloq lamtab haanum, hoq lamta baakinb mwv wkur tayin, hoo mwv soq bopam urab haalaram, At Sw bibwqdo.

³⁵‍Hoggab ngoqg at emin gab la hoo ngoqg nyera Debidg emin gab, soq bopam gab ngo ceetorl ywwlin tayin.”

³⁶‍Hoo At Swg gumtwngv lengnv Assiriyag svmcw hoqgv lwwg la cam piinleq ang lwwyw go nyiingv mengnum. Hoo hwdlo nyiilungv ar komc ho gorabl kaaknamv, hoqg mwlwngv svma goknyi.

³⁷‍Ho Assiriyag lvpw at Sennakerib hoqgv wknv hoo nammwb wkur kunum hoo Nenibi ho dooknum.

³⁸‍Hoo hwdlo mwwg pwnbo Nisrok namho mwv xumdul dooi yikho, mwwg ko tuup Adrammelek la Sarejar mwam lyoqr orioq lvgab patabnum. Hoo hoq kokwb bulv Ararat gvdab kilwqnum, mwwg ko tuup Esarhaddon mwwg kwlib mwwg nyookam pvvb bwwl doognum.