Read Nyishi AIJAYA 38 Bible Online

AIJAYA 38 - Nyishi bible

AIJAYA 38

¹Hoq aal dio ho Hejekiya vcnum hoo sisv twqb nyinum. Hoo Amojwg ko tuup nyiqry benbo Aijaya mwwg dookub haanum hoo mwam benum, “Soq sib At Sw bedo: Noqg nam mam anya jaqb mvdar-mvparto, hoggab no sitayi, no al kuram.”

²‍Ho Hejekiya mwwg nyuqm mam gurum daiyab nywwkur banv hoo At Swn swgwnum,

³‍hoo benum, “Kvlv, At Swa, ngo hoggub noqg aga ho dengky jaqb ngoqg hvvjw-hara lvgab wl yvknum hoo hognvkv noqg kaagaho aldvb nyil wl yvknum hoq tulu ham mwwpa labka.” Hoo Hejekiya vcjaqb xabnum.

⁴‍Ho At Swg gomcwrv Aijayanvn haanum:

⁵“Wgdvl hoo Hejekiyanvn beta, soq sib noqg ab Debidg Pwnbo, At Sw bedo: ngo noqg swgwnam mam tapa paku; ngo noqg nyiqs dinam mam kaapa paku. Kaato, ngo noqg swwgam vnyw camleq nywng gota vbw jitayin.

⁶‍Ngo nam la soq bopam sam Assiriya lvpw atwg alaq hoqgv naalin tayin, hoo soq bopam sam ceetor doog tayin.

⁷“At Sw mwwg soq dingrnum pagoq sam nam kaacin mvdwb swrdorxeq ak At Sw nyijtayin:

⁸‍Kaato, Ahaj vbia baakap ho doonyi dooyumv baakap kvbyw go wleq kunum.” Ho doonyi huto baakap kvbyw go hogloqkv wleq kunum ham ngo lokta wkur mvtayin.

⁹‍Judag lvpw atwg Hejekiya mwv vc cipekul hoo mwwg vc hoqgv al laikul xeqnamv:

¹⁰Ngo benum, ngoqg swwngo rvpa dvk aalho ngo wdkub nyitayin; hoo ngoqg vnyw-aiya swwnam mam swwta kub ngo Sux-ywlw toggoqb wdwb nyitayin.

¹¹Swwl doonbo gvdaho At Swn, ngo benum, ngo At Swn kaapa kuram; gvda gvt pengko so doonbo nyia ko tulungam ngo lokkam kaapa kuram.

¹²Sviya rvkybo akv tombungam buusuqnam hvb ngoqg doogw koam buusuqnum hoo ngoqg hoqgv mvpaqnum; vj cumnbo akv vj tiqnam hvb ngo ngoqg swwgam tiqnum; mwv ngam tan nulum hoqgv pupwqnum, aal hoqgv ai namgub no ngam swwnyia mvdkub vlwq paku;

¹³Ngo atv arkomc nagub cooikab doonum; sony nyot akv mwv ngoqg loonyiq-loor mwlwngam kwrmwqnam hvb; aal hoqgv ai namgub no ngam swwnyia mvdkub vlwq paku.

¹⁴Pvta pwdw ngvla iss pukumv odynam hvb ngo ody dvn; ngo pwk rinam hvb rinnum. Ngoqg vnyiqkv aob piodul kaanyi kuma do. At Swa, ngam nyijab-nyiyiq paku; ngoqg cumciq doogw gob nyitbv!

¹⁵Hoggv ngo betayin? Hoggab mwv ngam goopa kun, hoo mwv atv hoqham nyipa kun. Ngoqg yvjv vcjaqb mwwdwq ko-gab ngo vnyw-aiyab nyinyiaq jaqb wdwn.

¹⁶At Swa, soq tulu gab nyi tulungv swwdwn, hoo soq mwlw so ngoqg swwnam yalv swwdwn. Oa ngam lokta bobuqb swwdar mvtbv hoo ngam swwl doom tvbv!

¹⁷Kaato, soq si ngoqg alko gab ngo vcjaqb hentwr henum, hvbmabde noqg abynam hoqgv ngoqg sig ung hoqgv no ngam swwgwb naalin pakun, hoggab noqg langk ho ngoqg nyic mwlwngam no mvpaq paku.

¹⁸Hoggab Sux-ywlw nyookv nam paqyalinco paqma dvn; sin bov nam paqma dvn; noqg dengkynam mam nilbo batamb ikbo tulungv mwwgw maadwn.

¹⁹Swwl doonbo, swwl doonbo, hvl mwv nam paqyalinco paqdwn, ngoqg soolo nyinam sib; noqg dengkynam mam abv ko tulungam ceng dvb mvdwn.

²⁰At Sw ngam ywwlin tayin, hoo At Swg namlo ho, ngulv rwwxw-gungga lvgab ngoqg beminam ngulug swwca mwlwho mvl dootayin.

²¹‍Ho Aijaya benum, “Nulv taoq ok nyviyin loq naalayil hoo unho puulwqto, ho mwv altai kun.”

²²‍Hejekiya kam benum, “At Swg namlo ao lo caadwb hognvkv ngo kaacin tayin?”