Read Nyishi AIJAYA 40 Bible Online

AIJAYA 40 - Nyishi bible

AIJAYA 40

¹Ngoqg nyiilungv, mwwt-saqla to, mwwt-saqla to, noqg Pwnbov bedo.

²Jerusalem mam aby gvdwl beto, hoo ham sogoq gvdwl beto hoqham kvvyw-tadanamv wnya pakun, ho Jerusalemwg nyixiaqkam apaq jipa kun, ho bulug nyic nyinam mam koi yaag Jerusalemv At Swg alaq hoqgv nvvrwq pakun.

³Yal ak sogoq do: “Deexa-rara lo At Swg lamtangam mwx-mvaq mvdwb; ngulug Pwnbo gab diixa-rara lo lamta paadangam dinda dvb mvp jito.

⁴Lywpa mwlwngam lywrab mvtayin, hoo yornam la puutu tuuxiam akob mvl tayin; hoo pakam-raagam mwlwngv haapa tayin, hoo wr-wraqbo nyookv nyvmyin tayin.

⁵Hoo At Sw yuunamv yuupor tayin, hoo tornbo mwlwngv lvkin gob ham kaatayin, hoggab At Swg agamv goopa kun.”

⁶Yal ak bedo, “Sogoqto!” Hoo ngo benum, “Hoggv ngo sogoq tayin?” Tornbo mwlw si nwmwngv, hoo hoqg kangamnamv opu boolu hvb nyitwqdvn.

⁷Nwmwngv sengdwn, opungv yuupaq dvn hwdlo At Swg miqnamv hoqho miqdaq yukam; jvqtw jaqb nyiilungv nwmw hvb nyitwqdvn.

⁸Nwmwngv sengdwn, opungv yuupaq dvn, hvbmabde ngulug Pwnbog gomcwrv nwrba gob daqtayin.

⁹Aobo puutu ho nam boocatayin, Jaiyona, tugu puiyam bvqmw ta, Jerusalema, noqg ator lvgab sogoq gvdwl, tugu puiyam bvqmw ta; bos maabv, vcib goqgdvl, Judag bopam tulungam beta, “Kaato noqg Pwnboam!”

¹⁰Kaato, Pwnbo At Sw ator lvgab haadwn, hoo mwwg alaqkv mwam pvvb bwwl doogdvn; kaato, mwwg aky jidynamv mwwg lvgab doodwn; hoo mwwg jidynam akiv mwwg aga ho doodwn.

¹¹Sviya rvky bov mwwg sviya pvtwngam rvkynam hvb mwv rvky tayin; mwv sviya ko tulungam mwwg alaqkv jookum tayin; mwv bulam mwwg haabo ho jootayin, hoo bindo-binlo tulungam hingky alwb rool yvgtayin.

¹²Hiyv mwwg alaq asarv issam cuml xika ladwn hoo doa aongam yamkal yamc dvn, swcw nvg diimwram xinya dvn hoo puutu mwlwngam tuun nan lvgab tuuka dvn hoo yorn mwlwngam jaaka dvn?

¹³Hiyv At Sw Yalam xika pakun, ho hoggv nyia kongv mwwg tomswr-honynam mam kaapa kun?

¹⁴Hiyvg lvgab mwv hwwmin sunum, hoo hiyv mwam cengm dvb mvnum? Hiyv mwam jvqtw lamtangam tomswrnum, hoo cenglaqkam mwam tomswrnum, hoo mwam cenglaqg lamtangam kaakinum?

¹⁵Kaato, uppum hoqgv iss dilnam hvb nyob mwlwngam nyipa ku, hoo tuuka nan aoho diimwr hvb xipa ku; kaato, iss soiyoq gvdangam mwv albo diimwr hvb naarab dvn.

¹⁶Lebanon ho wsw parsv jot kuram, ho mooro svdin tulungv boyuql aky jin dvb jot kuram.

¹⁷Nyob mwlwngv mwwg agaho hog hvvtw maadwn, bulam mwv hog doomabo bvla asar hvb xipa kun.

¹⁸Hvnyiloqkam no hiyam Pwnbo lvgab tvkin tayin, ho hog nvk kvvyw-kaacnamv mwwg lvgab twiyw-tvcil tvkin tayin?

¹⁹Murtiam yam! Nyi pwnam ham yam, hoo hun yip pwnbo hun lvgab kaqtaqnam ham yv hoo rup gai mvnam tulu ham yv.

²⁰Hiyv aky gab laanyi looda maadwn svvda xuqnamv yaama dvn; mwv jem mvlaq boam meelin dvn biima-tama bo murty (apa-taca) mvp mvdwb.

²¹No cengma dvn i? No tapa ma i? Soq sam nam nyirab yuk hoqkv jaq betam maapa i? Swcw gwwl sam mvrab yuk hoqkv jaq no sam cengma dvn i?

²²Soq sam mwv swcw nvg aoso doom dvb mvpan, hoo hoq aoho doonbo tulungv komar takam hvb; doa aongam piuar hvb tiqda pan, hoo bulam doogw ko tombu hvb pujin pan;

²³hiyv lvpw atwg ko tuup tulungam hog dooma dvb mvdwn, hoo swcw soqg pvvb bwwl doogbo tulungam asar dvb mvdwn.

²⁴Bulv pwwma-cima dvb liinum, pwwma-cima dvb vly paqnum, anyo koggo bulug rwb apongv ked urab xwrlwqnum, hwdlo mwv bulam miqdaqyin, hoo bulv sengdwn, hoo bulam doogum-dooiyv swwxo-taram hvb baql wdwn.

²⁵Hvnyiloqkam nulv ngam hiyam twiyw-tvcil tvkin tayin, ho ngo mwwg hvb nyiyin dvn? Dvrwqbo Akv bedo.

²⁶Noqg vnyiqkv aob piorab gvdwl hoo kaaka to: hiyv hoq tulu tvlam bvl pwnbov? Hiyv ao tol doonbo mwlwngam pwlin tvl, ho hoq tulug vx-ceram emin minum, mwwg vcjaqb xitor-torlw gob la hoo mwwg huqlw ator ko-gab hog akin gokam nyimanum.

²⁷Jakuba, no hoggab bedwn, hoo Israela, gooto, “Ngoqg lamtangv At Sw galoqkv kvsdvn yv, hoo ngoqg nyidy sanam mam ngoqg Pwnbov xima dvn yv”?

²⁸No cengma namyv? No tapa maan mvi yv? At Sw kuiyum xaqb Pwnbov, swcw nvg ywwtwr namgub Twrw-tvnbov. Mwv ngaama dvn ho nyelin kama dvn; mwwg cenglaqnam mam mwwc-hinc lama dvn.

²⁹Mwv nganbo tulungam huqlw ator jidwn, ator dooma bo tulungam mwv ator torab mvdwn.

³⁰Tuudy-yaam tulu ngvkam ngatayin hoo nyelin-dors tayin, hoo yaapa tulungv ngatayin;

³¹hvbmabde hiyv At Swn kaaya bo tulungv bulug atoram mvdar-mvpar tayin; bulv xookam hvb aotol jaal yvtayin; bulv xartayin hoo nyelin-dorsram; bulv wtayin hoo ngakram.