Read Nyishi AIJAYA 41 Bible Online

AIJAYA 41 - Nyishi bible

AIJAYA 41

¹Soiyoqg gvdanga, ngam cooikab tagabto; nyiilungam bulug atoram mvdar-mvpar mvto; bulam hvvnwq mvto, ho bulam goom to; kuj ngulv lvkin gob ogumb hvvnwql pw-hwwtaj.

²Hiyv dou-caga hoqgv hwrcwb daqrabo akam dwqkap kvbx lo mviya nan atorv wrwq dvn yv? Mwv nyob nyiilungam mwwg agaho jipaqdvn, ho mwv lvpw at tulungam mwwg lvpia niikum lo caajab dvn; mwwg lyoqr orioq hoqgv bulam diimwr hvb mvdwn, mwwg illy-uppuq lvgab swwxo-taram dooi miqpaqnam hvb mvgdvn.

³Mwv bulam ruqmin gvl hoo swrsob wleq dvn, mwwg lvpiangv lamta ho dapwl wma pakun.

⁴Hiyv soq sam nyila yukul nyinya kunum, nyirab hoqgv jaq ko hotam tulungam goqnum? Otuqjaqb, Ngo, At Sw, hoo vtwr-anya ho; mwv ngo su.

⁵Soiyoq gvdangv kaapa kun hoo bosdvn; swcw nvg ywwtwrv tvmdwr dvn; bulv ogum haal hoo hvvnwq paku.

⁶Nyiicwr-cwrxiv mwwg door-doopwngam svka dvn hoo mwwg boram bedwn, “Ator jaqto!”

⁷Yip pwnbov hun yip pwnam mam atordvb mvdwn, hoo hiyv dvvcw murtiam kvmp lvgab jwwlap bov hingkib mvlap dvn, ho jiqsiq-jiqmeq tvl begamv, “Soq si alpa”; hoo bulv hoqham dvvcw silo lvgab biim mvma dvb jwwtinl apdvn.

⁸Hvbmabde, Israelv nulv, ngoqg nyerangv, Jakubnvn ngo xuqpa kun, Abraham gv ko hosiqkv, ngoqg ajinv;

⁹nulam ngo swcw nvg ywwtwr hoqgv tuugab dvn, hoo aado kiyo cuukiq tulu hoqgv goqnum, nulam bedwn, “Nulv ngoqg nyerangv, ngo nulam xuqpa kun hoo nulam haqpaqram”;

¹⁰bos maabv, ngo nulug lvgab dooba dvn; hang homabv, ngo nulug Pwnbov; ngo nulam ator jitayin, ngo nulam svka tayin, ngo nulam ngoqg jvqtw bo lvqbwq alaqso gvbwl yvgtayin.

¹¹Kaato, nulam ceekol haaxaqbo mwlwngam hvnyw moolw mvl hoo mooka-saq mvtayin; nulam ceekol hentwr hemboam asar dvb yuupaq mvtayin.

¹²Hiyv nulug lvgab nyirwq-wrwq deen boam nulv meegaq tayin, hvbmabde nulv bulam meeparam; hiyv nulam ceekol nyob panbov hog doomab asar tayin.

¹³Hoggab ngo At Sw, nulug Pwnbov, nulug lvqbwq alaqkam gvbwl yvgdvn; ngos lak nulam bedwn, “Bos maabv, ngo akin sulak nulam svka dvn.”

¹⁴Bos maabv, anyo bo Jakub, Israelwg nyi tulu nul! Ngo su nulam svka deenbo akv, At Sw bibwqdo; nulam Pvlyw bov Israelwg Dvrwqbo Akv.

¹⁵Kaato, ngo nulgab nit tvl yvkiqbo hoo exy doonbo jurpy mvklo ak mwjtayin; nulv puutu mwlwho jurpy mvtayin hoo bulam cvvmwqtayin, hoo nulv yorn mwlwngam amp hvb mvtayin;

¹⁶no bulam xabxaq tayin, hoo bulam dooiyv aadob nuupaq tayin, hoo pwd dooiyv bulam nuus-nuutwr tayin. Hoo nulv At Sw ho hemp hvnyir tayin; Israelwg Dvrwqbo Ak ho nulv yuutayin.

¹⁷Hwdlo jwwgw bov la dwc-twwpw maanbov iss meegaqyin, hoo hog akkam dooram, hoo bulug lyolv hvngwrl pwtwl taqc kunum, At Sw ngo atv bulam birwq tayin; Israelwg Pwnbov ngo nulam apaqram.

¹⁸Ngo deexa-rara puutu ao lo pobungam tolin mvtayin, hoo haapa pengko lo iss subuqkam buqlin mvtayin. Ngo deexa-rara lo iss sviyinam hemp tayin, hoo deexa-rara lo iss subuqkam buqlin mvtayin.

¹⁹Ngo deexa-rara lo sidar, akasiya, mirtwl, hoo olib svvn tulungam liilwq tayin. Ngo diixa-rara lo saipres, pataq, hoo pasa svvn tulungam lvkin gob liilwq tayin,

²⁰ho bulv kaal hoo cengtayin, ho mwwka layil lvkin gob cenglaq tayin, soq sam At Swg alaqkv bon nyipa kun, hoo soq sam Israelwg Dvrwqbo Akv pwpa kun.

²¹Nulug bvrwqkam agab mvlin kvkato, At Sw bedo; nulug kaagab-hengabnam mam bwa kvkato, Jakubg Lvpw At Swv bedo.

²²Hoq tulu ham bulam bwa mvkato, hoo hoggv nyita dvn ham ngulam betam mvkato. Otuq pagoq tulungv hoggv, ham ngulam betam mvkato, ho ngulv hoq tulungam mwwka yinpv, ho ngulv bulug niqtuq lengnam mam cengkam yinpv; ho haata bo pagoqkam ngulam bibwql bekin tvb.

²³Soq kokwb hoggv haata dvn ham ngulam betam tvb, ho ngulv cengkam yinpv no ngulug pwnbov hvl; al ge, alman ge nyikato, ho ngulv hang hol hoo vcjaqb bos kamyi nvpv.

²⁴Kaato, nulv hog hvvtw dooma, hoo nulug bonam nyinamv hog jaq hvvtw dooma; hiyv nulam xuqn bov oyuml bulum-kac namjaqkv.

²⁵Ngo nyoodum daiya toloqkv nyi ak muunum, hoo mwv haapa ku, doonyi caalin hoqgv mwv ngoqg eminam goqtayin; mwv pvvb bwwl doogbo tulungam pwcw mvnbov deekam mam cooyu-caacanam hvb caatayin.

²⁶Ngulam cengm dukub, soq sam nyirab hoqgv bibwq pakun, hoo otuqcob ngulv betayin, “Mwv kvtaqdvn”? Hoqho hoqham bibwqbo akkam doomanum, ho akkam pui begaqbo doomanum, akkam noqg gomcwram tapa maanum.

²⁷Ngo su otuqcob Jaiyonam benam, “Kaato, soq si bulv doodo!” hoo ngo Jerusalem mam tugu puiyam betam dvn.

²⁸Hvbmabde hwdlo ngo kaanam, hoqho akkam doomanam; hwdlo ngo bulam birwq tvk hvl bei yikho, bulug pengko ho tomswr-hony bo akkam doomanam.

²⁹Kaato, bul mwlwngv koom-kaaxal nyidu do; bulug nyis tulungv hog hvvtw dookma; bulug dvvcw guss tulungv dooi hvb asar do.