Read Nyishi AIJAYA 43 Bible Online

AIJAYA 43 - Nyishi bible

AIJAYA 43

¹Hvbmabde sija soq sib At Sw bedo, Jakuba, hiyv nam pwnbov, Israela, hiyv nam ywrn bov: “Bos maabv, hoggab ngo nam pvlyw pakun; noqg eminam ngo minl goqpa kun, no ngoqgv.

²Hwdlo no iss pobungam rabyikam, ngo noqg lvgab dooba tayin; hoo iss pobu tulungv, nam tolup nyoram; hwdlo no wmho wpeq jaqkam nam guram, hoo wm moiliv nam gux nyoram.

³Hoggab ngo noqg Pwnbo At Swv, Israelwg Dvrwqbo Akv, nam Ywwn bov. Nam rvlin dvb Ijiptam ngo jiknum, Kusam la Sebangam nam kwly nvpa kun.

⁴Hoggab no ngoqg kaagaho xinamv, hoo poqkumnamv, hoo ngo nam aby dvn, ngo nyiilungam noqgab jikur dvn, noqg swwg kwly gab nyiilungam jinam.

⁵Bos maabv, hoggab ngo noqg lvgab dooba dvn; noqg hosiqkam ngo dou-caga hoqgv boolin tayin, hoo ngo nam dou-haaga hoqgv bookum tayin.

⁶Ngo nyoodum nyookam apaq tukuk hvl, hoo nyooko nyookam, parl apbvk hvl betayin; ngoqg nyega ko tuup tulungam aado hoqgv, hoo nyem ko tulungam swcw nvg ywwtwr hoqgv boa tuku,

⁷nyi vxiv hiyv ngoqg eminam goqnum, hiyam ngoqg yuunam gab, ngo pwnum, hiyam ngo ywrnum hoo pwnum.”

⁸Vnyiq doos tvl, hiyv nyiqca bo, nyuru doos tvl ruutarbo nyiilungam agab boolin to!

⁹Nyob mwlwngv dookum-doopa dvn, hoo nyiilungv hookum dvn. Bulug pengko hoqgv hiyv soq sam bibwq nyodwn, hoo kolwg pagoq tulungam kaakin nyodwn? Bulv kvtaq dvn hvd nyiloqkam bulug hvvky tulungam boa mvka to, hoo soq si jvqtwngv hvl, bulam tapal hoo bemto.

¹⁰At Sw bibwqdvn, “Nulv ngoqg hvvky tulungv,” “hoo ngo hiyam daalin pan hv ngoqg nyerangv, ho nulv cengtayin hoo ngam mwwjw tayin hoo ngo hiyv ham cenglaq tayin. Ngo otuqho pwnbo asaq doomanum, ho ngoqg lvvg alo akam dooram.

¹¹Ngo, ngo jaqsu At Swv, hoo ngoqg lvvg alo ywwnbo asaq dooma dvn:

¹²Hwdlo nulug pengko ho kooxnam pwnbo dooma yukho, ngo bibwqnum hoo ywwlinum hoo pui bvqmwnum; hoo nulv ngoqg hvvky tulungv,” At Sw bibwqdo, “hoo ngo su Pwnbov.

¹³Hoqgab ngo jaqsu mwv; ngoqg alaq soqgv hiyvkam naareqbo dooma dvn; ngoqg bonam nyidwn, hiyv ham nyilwq nyotayin?”

¹⁴Soq sib At Sw bedo, Israelwg Dvrwqbo Akv, nulam pvlyw bov: “Ho noqgab ngo Bebilon ho kanam nvmlwqnam hoo nyemaqkam mvgeqnam hvb bulam mvgeqnum, Bebilon nyiilungv hogloq iss jaaj aoho hemp-hvnyir dvn hamkam mvgeqnum.

¹⁵Ngo At Sw, nulug Dvrwqbo Akv, Israelam Twrw-tvnbov, nulug Lvpw atv.”

¹⁶Soq sib At Sw bedo, mwv sa-svlo ura lo, hoo iss pobu hotbo ura lo lamta mwjdvn,

¹⁷mwv ceriotam hoo svpuram, sipaiyam hoo nyob pan boam boolin dvn; bulv geqp dvn, bulv daqrab nyokma, bulam tomiab pakun, muram nyumiqnum hvb:

¹⁸“Otuq pagoq tulungam mwwpa kumabv, ho kolwg pagoq tulungam mwwka kamabv.

¹⁹Kaato, ngo nit pagoq ak nyidu dvn; hoqhv sija buqlin do, hoqham no henglaq maai yv? Ngo deexa-raraho lamta ak mvtayin hoo diixa-rara lo pobu tulungam tom tayin.

²⁰Nyoro svdin tulungv, jekel lvla ostric pvta tulungv ngam poqkum tayin, hoggab ngo deexa-rarangam iss jidwn, diixa-rara lo iss pobu tulungam tom dvn, ngoqg daalinam nyiilungam twwdwb jidwn,

²¹ngoqg atgab ngoqg nyiilungam ywrnum ho bulv lokam ngoqg paqnam mam bibwq kamyi nvpv.

²²“Hvbsujaqkam no ngam goqma dvn, Jakuba; hvbmabde Israela, no ngoqgab ngadku!

²³Noqg sviyangam ngam boyuqnam aky jitab baqa maanum, ho noqg pwr jinam tulu hoqgv ngam paqmanum. Ngo nulam pwr gab hog mwwdwq mvma dvn, ho sungam bo pwr gab nulam mwwdwq mvma dvn.

²⁴Twngk lvgab no ngam bvpy-bapaq rwj maanum, ho noqg oxbo pwr jinam lvgab ngam xumt mvma dvn. Hvbmabde noqg nyic nyinam tulu lvgab ngam mwwdwq dwqm dvn; noqg nyixiaqnam tulu lvgab ngam mwwdwq dwqm dvn.

²⁵Ngo, ngo su mwv, hiyv noqg nyimur mwlwngam ngoqg atgab tixaq dvn, hoo ngo noqg nyic tulungam mwwpa kuram.

²⁶Ngam mwwpa dvb nyiky laka; kuj ngulv hwwbam tuj; ho noqg bvrwqkam jilwqto, ho nam kvtaqdvb hwwlin kamyi nvpv.

²⁷Noqg otuqcob abv nyic nyinum, hoo noqg buyw-buut tulungv ngam ceekol nyimurnum.

²⁸Hoqgab ngo xumk nammwg lvpw atwg nyega ko tulungam kac-kanyiaq dvb mvtayin, hoo Jakubnvn twryum mvdwb hoo Israelam nyijab-nyiyiq dvb jilin pakun.