Read Nyishi AIJAYA 44 Bible Online

AIJAYA 44 - Nyishi bible

AIJAYA 44

¹“Hvbmabde sija tato, ngoqg nyera Jakuba, Israelv ngoqg daalin kunamv!

²Soq sib nulam pwnbo At Sw bedo, hiyv nam nvmmamho ywrabnum hoo nam svka tayin: Bos maabv, ngoqg nyera Jakuba, Jesurunvn ngo daalin pakun.

³Hoggab hvngwrbo gvdangam iss tool jitayin, hoo ngo huutwrbo deela lo iss kucwngam tom tayin; ngo ngoqg yvjam noqg ko hosiq tuluho jilwqtayin, hoo ngoqg lvqcam noqg hotam tulungam jilwqtayin.

⁴Bulv iss kucw soiyoq ho nwmw swwl doonbo hvb nwmw tulug pengko ho swwlin tayin.

⁵Soq ak si betayin, ‘Ngo At Sw gvsu,’ asaq akv Jakubg eminam goqtayin, hoo asaq akv mwwg alaqho xeqtayin, ‘At Swngv hvl,’ hoo mwwg emin nvsu Israelwg eminv.”

⁶Soq sib Israelwg Lvpw at, At Sw hoo nyiit At Sw, mwwg Pvlyw bov bedo: “Ngo otuqkv hoo ngo vtwr-anyangv; ngoqg lvvg alo pwnbo dooma dvn.

⁷Hiyv ngoq hvb nyido? Mwam ham pui duka mvto. Mwam bibwq mvto hoo ham ngoqg agaho kaatam to, hoggab ngo kolwg nyiilungam xuqlinum. Bulam bibwq mvka to hoggv haata dvn, hoo hoggv nyitayin.

⁸Bos maabv, ho boskama bv; ngo nam kolgv hoqham bibwql betam maan mvi yv? Hoo no ngoqg hvvky tulungv! Ngoqg lvvg alo Pwnbo akta dood nvi yv? Lwwn pwsaq dooma; ngo asaq akkam cengk ma.”

⁹‍Mwlw murtiam pwnbo si hog hvvtw dooma, hoo bulv hogloq pagoq ho hemp dvn hv hog niqtuq dooma. Bulug hvvky tulungv kaapa kama do ho cengkam maado, bulam hvnyw moolw dvb mvkam yin pv.

¹⁰‍Hiyv asaq pwnbo akam pwdwn ho murtiam xumdwn hv hog akukam niqtuq dooma dvn?

¹¹‍Kaato, mwwg ajin tulu mwlwngam hvnyw moolw mvtayin, hoo yip pwnbo tulungv nyia kov twq. Bul mwlwngam hookum mvto, bulam agaho daqm to. Bulv vcjaqb bos tayin; bulam lvkin gob hvnyw moolw mvtayin.

¹²‍Dvvcw yip pwnbov mwwg nyin-mvnnan dupum-dvrab la mer wm lvgab nyis tulungam nyidwn. Mwv hoqham yip pwdwn mwwg kvnyi lvgab la alaq laqxamb nyis tulungam nyidwn. Mwv kano dvn hoo mwwg atorv kvxaqdvn; mwv iss twwma dvn hoo ngad kun.

¹³‍Svvtaq jem mvnbov muxul bwqnam ak bwqdwn; mwv muxul bwqnam akam pensil lvgab muxdvn. Mwv ham mwwg mwwk jaqb bwqr tvl hoo ham muxnan lvgab mwrwl ap dvn. Nyi hvb kvvyw-kaacnam dvb kangam albo nyi apo ak nam uraho doodwn hvb mvdwn.

¹⁴‍Mwv sidar svvn tulungam patab dvn, ho mwv saipresam la kora svvn tulungam daalin dvn hoo hoqham nyoro svvn tulug pengko ho hwngkw jaqb swwm dvn. Mwv sidar svvnam liidwn hoo hoqham swwm dvb nyodo hobam mvdwn.

¹⁵‍Ho hoqhv nyi ak gab kutib nyidwn. Mwv hoq tuugin ham naalayil hoo mwv og hengdvn; mwv wm pargab tvl hoo wtw baan dvn. Mwv pwnbo ak pwtwl hoo ham kam xumdwn; mwv murtiam mvtwl hoo hoq agaho geqpwl xumdwn.

¹⁶‍Hoqg papo gon mwv wmho pardwn. Papo gon mwv vdin baal dvdwn; mwv ham romsin naadwn hoo xumt dvn. Ho mwv atv og dvb henjo nv bedwn, “Vjaqsu bo ngo ogdo, ngo wm mam kaapa ku!”

¹⁷‍Hoo tuugin mwv mwwg pwnbo murty ak gob ham mvdwn, hoo hoqg agaho geqpwl hoo ham xumdwn. Mwv swgwl hoo bedwn, “Ngam naalin tvb, hoggab no ngoqg pwnbov!”

¹⁸‍Bulv hog cengma, ho bulv mwwlaq kama, hoggab bulug vnyiqkam mwv mutum pan, hoqgab bulv kaapa ma, hoo bulug hangam putum pa, hoqgab bulv cenglaq ma.

¹⁹‍Akkam mwwkal, ho cenglaql ho mwwlaql bema, “Hoq papo gon ngo wmho parnum; ngo wtwngam kam hoq mopioho baanum; ngo vdinam xomnul hoo dvt kun. Hoo ngo tuugin kacdvb mvtayin yv? Ngo swwtu-svvpo agaho geqp tai nvi yv?

²⁰‍Mwv muiyam dvdwn; kac-kanyiaq bo hangv mwam booxarnum, hoo mwv mwam naalin nyoram ho benyiram, “Hoqhv ngoqg lvqbwq alaqso vm mvvnamv dooma dvn yv?”

²¹Jakuba hoo Israela, soq pagoq tulu sam mwwgab to, hoggab nulv ngoqg nyerangv; ngo nulam ywrnum; nulv ngoqg nyerangv; Israela, ngo nulam mwwpa maab nyiram.

²²Ngo nulug nyixiaqkam doomwq wrxanam hvb hoo nulug nyicam haapam juuxanam hvb mvpaq pakun; ngoqg dookub hookur to, hoggab ngo nulam ywwlin pakun.

²³Doa no bemin beto, hoggab At Sw ham nyipa kun; swcw nvg uranga goqr roto; puutu tulunga bemin bepor lengto, Nyoronga, hoo hoqho doonbo svvn nwwcw nwwtiv beminam bepor lengto! Hoggab At Sw Jakubnvn ywwlin paku, hoo Israelwg uraho yuutayin.

²⁴Soq sib nam Pvlywbo, At Sw bedo, hiyv nam annwg nvmmam hoqgv ywrabnum: “Ngo At Swv su, hiyv hog mwlwngam pwnum, hiyv vp-cwkwb doa aongam pujinum, ngo atv su hiyv swcwngam palo-malob ywwlin mvpan,

²⁵hiyv xaalyol nyiqry kaan boam mwwdwq mvdwn hoo paca bo tulungam nyiqry kaanbo tulu gob mvdwn, hiyv mwwlaqbo nyiilungam rookur dvn hoo bulug cenglaqkam paca dvb mvdwn,

²⁶hiyv mwwg nyerag gomcwram loomin gvdwn hoo mwwg pui baqnbo tulug tomswr-honynam mam niqtuq lengm dvn, hiyv Jerusalem mam bedwn, “Mwnwg ho nyiv doota yukun; hoo Judag bopam tuluho, ‘Bulv nam mvtayin, hoo ngo bulug mucu-mviyanam tulungam mvdar daqrab tayin’;

²⁷hiyv bedwn sa-svlo urangam, ‘Pwtw to; ngo noqg pobu tulungam xootwr mvtayin’;

²⁸hiyv bedwn Sairasam, ‘Mwv ngoqg sviya kaaya bov, hoo mwv ngoqg hog mwlwngam niqtuq nyil jitayin’; Jerusalem mam bidu do, ‘Mwnwn ywrab looda tayin,’ hoo dvrwq namlongam, ‘Noqg gwwlam ywr gab looda tayin.’”