Read Nyishi AIJAYA 45 Bible Online

AIJAYA 45 - Nyishi bible

AIJAYA 45

¹Soq sib At Sw mwwg xuqlinam, Sairasnvn bedo, hiyam ngo lvqbwq alaqkam nyumtin pakun, mwwg agaho nyob nyi asaqkam caajab-cvviywq dvb hoo lvpw at tulug soruqkam toosuq dvb, ho mwwg agaho viyap pam ciqko dvb ho toggoq tulungam giitum mvma dvb:

²“Ngo noqg otuqb wtayin hoo coojo-roojo bo nyook mwlwngam hvmlin dvb mvtayin, ngo tama viyap mwlwngam vmwq-yumgub mudup tayin hoo dvvcw viyap mwlwngam xaako dvb pako tayin,

³ngo nam kan twdwq gumn tulungam jitayin hoo nyomb nyook tulungam noosub jitayin, ho hoqhv ngo At Swv bo hvl, no ngam cengtayin, hv ngo, Israelwg Pwnbov, noqg eminam nam goqn bov.

⁴Ngoqg nyera Jakub gabla hoo ngoqg daalinam Israel gab, ngo noqg eminam mingl nam goqdwn, no ngam cengma sujaqkam ngo noqg eminam mingl goqdwn.

⁵Ngo su At Swv, hoo ngoqg lvvg alo asaq dooma dvn, ngoqg lvvg alo Pwnbo asaq akkam dooma dvn; no ngam cengma sujaqkam, ngo nam tomswr-hony dvn,

⁶ho dou-caga hoqgv dou-haaga namgub, ngoqg lvvg alo asaq dooma dvn, sam nyiilungv cengdwn; ngo su At Swv, hoo asaq akkam dooma dvn.

⁷Ngo hutongam ywrnam hoo kanam pwnam, ngo swrsongam mvdwn hoo dwr-kanongam pwdwn, ngo su At Swv, soq mwlw sam hiyv nyim dvn.

⁸“Doa aonga, nyodo hool to, hoo doomwq-dooiyaml nyodongam jvqtw bo tulug aoho hoiyaq mvmto; swcwngam svgagvrwq mvto hoo ywwlinamv la jvqtwngv aaxy xeekam yin pv; vnyi-vnyi sam beggar-garlin dvb swcw no himbuq yaato; At Sw ngo soq sam pwlin pakun.

⁹“Deekam pwcw tulug pengko hoqgv pwcw cwwgwn, hoqham hiyv jwwl ywrab boam mwam mwwdwq mvto! Deekamv mwam ywrn boam hvl bed nvi yv, ‘Hoggv no nyidu dvn?’ ho ‘Noqg bonam nyinam si hog gvbw nan dooma’?

¹⁰Mwwdwq dwqmto hiyv ab akam hvl bedwn, ‘No hoggab sib hila papan?’ ho nyem dvn akam bedwn, ‘Hoggab no cinc cidwn?’”

¹¹Soq sib At Sw bedo, Israelwg Dvrwqbo Akv, hoo mwam ywrabo akv: “Haata bo pagoqkam ngam toxto; ngoqg ko tulu gabla ngoqg alaq soq bonam nyinam tulu gab no ngam gaml jita dvn yv?

¹²Ngo swcwngam pwnum hoo nyia kongam hoq aoho pwnum; ngoqg alaq soqgv ngo doa aongam pujinum, hoo ngo hoq uraho doonbo hog mwlwngam gaml jinum.

¹³Ngo mwam jvqtw uraho biur goorab mvpa kun, hoo mwwg lamta mwlwngam ngo nvmyin dvb mvtayin; mwv ngoqg bopam mam mvtayin hoo ngoqg nyumwb mam topaq tayin, kor la aky gabma,” nyiit At Sw bedo.

¹⁴Soq sib At Sw bedo: “Ijipt gv gumnv hoo Kuswg kwm-kor mvnbo tulungv, hoo Sabeanwg nyi dort tvl aobo tulungv nulgab haatayin hoo noq gvku; bulv noqg kokwb wmin gvtayin; bulam tag korcup tvl haatayin hoo nam pvxwl xumtayin. Bulv noqg lvgab paql mvnyi-moiyul betayin: ‘Jvqtw jaqb Pwnbov noqg lvgab dooj do, hoo asaq dooma dvn, mwwg lvvg alo asaq pwnbo dooma dvn.’”

¹⁵Jvqtw jaqb, no Pwnbov hiyv atam ciis dvn, Israelwg Pwnbov, Ywwn bov.

¹⁶Bul mwlwngam hvnyw moolw mvdwn hoo mwwdar-mwwpar kumanum; murty mvnbo mwlwngv lvkin gob mwwkwq-svqwl wbam dvn.

¹⁷Hvbmabde Israelam At Sw nwrba cwtam ywwlinam lvgab ywwlinum; nulam hvnyw moolw mvram ho nulam nwrba cwtam nagub mwwdar-mwwpar maab nyimram.

¹⁸Hoggab soq sib At Sw bedo, hiyv doangam pwnbov (mwv Pwnbov!), hiyv swcwngam ywrnum hoo ham pwnbov (mwv ham mvknum; mwv ham asar dvb pwmanam, mwv ham doogw koob ywrnum!): “Ngo su At Swv, hoo ngoqg lvvg alo asaq dooma.

¹⁹Ngo kan ko gvdaho, goosil gooma; ngo Jakubg ko hosiqkam hvl bema, niqtuq doomab ngam meeto hvl.’ Ngo At Sw jvqtwngam bedwn; hoggv jvqtw dvn ngo bibwqdvn.

²⁰“Swwl doonbo nyob tulu nulv, atv atam lvkin gob ogumb hvvnwql; hoo haal doqkum suto! bulv hog cengma hiyv bulug svvda murtiam joodwn, hoo ywwd maanbo pwnbo akam swgw gwwdul doodo.

²¹Nulug yolungam bibwq gvdwl betam kaato; bulam lvkin gob hwwbam mvka to! Hiyv sam otuqho betamnum? Hiyv hoqham kol bibwqnum? Soq sam ngo, At Sw maai yv? Hoo ngoqg lvvg alo asaq pwnbo dooma dvn, Pwnbo jvqtw bvla Ywwlin bo akv; ngoqg lvvg alo asaq dooma dvn.

²²“Swcw nvg ywwtwr mwlw hoqgv, ngoqg dookub hookurto hoo ywwlin koto! Hoggab ngo Pwnbov, hoo asaq dooma dvn.

²³Ngo atv jaq dingr pakun; hoqgv ngoqg agam soqgv jvqtw gomcwrv lengn kun hoqhv hookur takma: ‘Nyiicwr-cwrxiv lwbw kumbwl ngam xumtayin, nyiicwr-cwrxig lyolv ngam paqtayin.’

²⁴“At Swg ura hootwq, jvqtw ngvla atorv doodwn hvl ngam betayin; hiyv mwlwngv ceekol ceebionum, mwwg dookub haatayin hoo hvnyw moolw mvtayin.

²⁵At Sw ho Israelwg ko hosiq mwlwngam loorwql hoo yuum tayin.”