Read Nyishi AIJAYA 46 Bible Online

AIJAYA 46 - Nyishi bible

AIJAYA 46

¹Bel pvxwl xumdo; Nebo gubxw do; bulug murty mvnam tulungv gunggo-nyiiyo gvla tuun-mee aoho doodo; soq pagoq tulu sam nulv baqnyi maanbo svdin tulug baqnam hvb baqdo.

²Bulv gubxw do; bulv lvkin gob pvxw xumdo; bulv vgw baqdy sanam mam mvtor nyoma, hvbmabde bulv atv nyumwb wdo.

³“Ngam tagabto, Jakubg nombunga, Israelwg nombu hoq boumnam mwlwngv, annwg kepo ho gvrabl, nam ko bwwma taiyik hoqgv, ngo nam svkanum;

⁴nulug nyekam-xox namgob kam ngo mwv su, hoo nulug dumpu namgub ngo nulam kaal yvgtayin. Ngo mvpa kun hoo ngo kaal yvgtayin; ngo kaal yvgtayin hoo ywwtayin.

⁵“Nulv ngam twiyw-tvc nyotayin hoo ngoqg simp gob mvtayin, hoo ngulv aiyin dvb nulv hiyam ngam twiyw-tvc tadwn?

⁶Hunam cuk hoqgv naalin layil, hoo rupam jaaka nanho jaalin layil, hun yip pwnboam ree goqlayil hoo mwv hoq hoqgv murtib mvdwn; ho bulv geqpwl hoo xumdwn!

⁷Bulv hoqham bulug gorbw ho tvca dvn, bulv ham joodwn, bulv ham hoq dook ho joop dvn, hoo hoqhv ho daqdwn; hoqhv hoq daqk hoqgv biima dvn. Hoqham nyi akv sogoql xabjaqkam, hoqhv birwq maadwn ho mwwg vs-axaq hoqgv kam ywwma dvn.

⁸Soq sam mwwgabto hoo hwngkwb daqto, nyimur-nyic bo tulu nulv, sam dumpo lo mwwpa laka,

⁹kolwg otuq pagoq tulungam mwwgab laka; hoggab ngo Pwnbov, hoo ngoqg lvvg alo asaq dooma dvn; ngo Pwnbov, hoo ngoqg simp bo akkam dooma dvn,

¹⁰nyirab hoqgv nyinya nagub hoo kol otuq moodwg hog mwlw pagoqkv nyima daab bibwq pakun, hoo begamv, ‘Ngoqg tomswr-honynamv biimab dootayin, hoo ngoqg hog mwlw nyitanam mam nyiyum taikun,’

¹¹dou-caga hoqgv pvta akam mengn boam, hoo aado kiyo bo nyook hoqgv ngoqg tomswr-honynam nyiam goqa tayin. Ngo goopa kun, hoo hoqham ngo nyil wtayin; ngo pagoq ak nyid dvb doodwn, hoo ngo hoqham nyitayin.

¹²“Ngam tagabto, hang tamy bo tulunga, hoo hiyv jvqtw hoqgv aado kiyo dvn:

¹³Ngo ngoqg jvqtwngam ogumb bvqnwqpan; hoqhv aado ma, hoo ngoqg ywwnamv oyu ram; ngo Jaiyon lo ngoqg ywwnam mam jilwq tayin, hoggab Israelv ngoqg yuunamv.”