Read Nyishi AIJAYA 47 Bible Online

AIJAYA 47 - Nyishi bible

AIJAYA 47

¹Bebilonwg mvvngam nyijwr tulunga, ipoq gvdwl diimwr so dooto; Kaldiyag nyem ko tulunga, pwqlw ho doomab deela so dooto! Hoggab nulam lokam aby bvla anya dvb goqram.

²Miiriq lwpia tulungam naalayil hoo miiriq riqto, nulug dumpam pupaqto, nulug kamtam twqbin xaato, nulug lvpia lupam pipaqtvl, pobu tulungam rapeqto.

³Nulug talonam mam hog mutum ram, hoo nulug hvnyw-haram kaapa tayin. Ngo kwly daqtayin, hoo ngo akin gokam apaqram.

⁴Ngulug Pvlyw bov-nyiit At Swv mwwg eminv- mwv Israelwg Dvrwqbo Akv.

⁵Kaldiyag nyem ko tulunga, cooikab dooto, hoo kan urab wto; hoggab nulam lokam lvpw atwg dvnv hvl goqram.

⁶Ngoqg nyiilug lvgab ngo hang lengnum; ngoqg otungam ngo kacdvb mvnum; ngo bulam noqg alaqho jilwqnum; no bulam ayangam kaakin maanum; bulam no dumpu-xiima namgob no vcjaqb vgwboam baqm dvn.

⁷No benum, “Ngo nwrba gob dvnwb dootayin,” hoqgab no soq pagoq tulu sam noqg hangho pvvl apma ho hoq tulug niqtuqkam mwwpa kama.

⁸Hoqgab sija sam tato, hemp-hengam mam aby bo no, hiyv bos haai maab doon bov, hiyv nulug hangho bedwn, “Nulv twq, hoo ngoqg lvvg alo nyi asaq dooma dvn; ngo xwwmy akwb nyitwl dooram ho ko sileqnam mam cengka ram”:

⁹Nulug nyiqry kaanam mvla ui-opo vcjaq mvnamv doos kujaqkam, ko tulungv yuupaqnamv la xwwmib swwnamv twrkub nulug aoho haatayin; soq pagoq goqnyi si nulug dookub aal lookin ho haqma paqb haatayin.

¹⁰noqg nyic-nyia ho no alv subo hvl mwwl doonum, no benum, “Ngam hiyvkam kaapa ma”; noqg mwwlaq kvla noqg cenglaqkv nam booxarnum, hoo noqg hanglo no benum, “Ngo twq, hoo ngoqg lvvg alo nyi asaq dooma dvn.”

¹¹Hvbmabde almanv noqg aoho haatayin, hoqham no ui guupaq dvb kam cengram; ciqcaq-bviyaqkv noqg aoho haatayin, hoqham nulv pwr jil mvpaq laram; hoo noqg haqmapaqb yuupaq-caapaqnamv noqg aoho haatayin.

¹²Noqg ui guunam hoola noqg nyiqry kaanamho no aby jaqdo, hoqham noqg nyijwr-yaapa hoqgv jaq nyica pakun; lokam no niqtuq nyilin sukam paco; hvbmabde lokam no bosam ya hwrcw dvb nyikam supa co.

¹³Nam tomswr-honynam tulu hoqgv no nyelin-dorsnum; hoq tulu ham atorb daqtwl hoo nam ywwk to, hiyv doangam mwrpin sudwn, hiyv takar tulungam tuugabl kaadwn, hiyv nit pool karlin yin noqg aoho hoggv haata dvn ham cengm dvn.

¹⁴Kaato, bulv xoociq-taram hvb nyidwn; wmv bulam guiyum dvn; bulv atv atam wm moi niqtuq hoqgv ywwlin nyoma dvn. At Swam og naadwb soq si mopio dooma, wm agaho doodwb wm dooma!

¹⁵Hiyam no bon nyijkunamv hoqhvb nam nyitayin, hiyv noqg lvgab nyijwr-yaapa hoqgv jaq kwm-kor mvbam bov; nyiicwr-cwrxiv bulv atwg mwwkwb nyogaq gaqdwn; nam nyi akkam ywwnbo dooma.