Read Nyishi AIJAYA 48 Bible Online

AIJAYA 48 - Nyishi bible

AIJAYA 48

¹Sam tato, Jakubg nombunga, hiyam Israelvk hvl emin goqnum, hoo hiyv Judag iss hoqgv haanbov, hiyv At Swg eminb dingrnam hoo Israelwg Pwnboam beporl betamnum, hvbmabde jvqtw ma ho lootw kama.

²Bulv atam dvrwqbo bopam gob goqs dvn, hoo bulv atv Israelwg Pwnbo aoho doogw dvn; mwwg eminv nyiit At Swngv.

³“Otuq pagoq tulungam ngo kucuqkv hvl bibwq pakun; hoq tuluhv ngoqg agam soqgv lengn kun, hoo ngo hoq tulu ham pui betamnum; ho haqma paq golo ngo hoq tulu ham nyimnum, hoo hoq tuluhv nyiknum.

⁴Hoggab ngo cengdo no tamy bov, hoo noqg lwwpongv dvvcw hvb xwqda twqdo hoo noqg tuqt talongv tama hvb nyidwn,

⁵Soq tulu sam ngo otuq hoqgv nulam bibwq kunum, hoq tuluhv nyima daab ngo hoq tulu ham nam pui betamnum, hvb nam bema nyiloqkam no hvl bekam suiyv, ‘ngoqg murtiv bulam nyij pakun, ngoqg svvda guss taqnam mvla ngoqg dvvcw gussv bulam gaml jinum hvl no bekam suiyv.’

⁶“No tapa paku; sija no soq mwlw sam kaato; hoo no hoqham bibwq nyoram yv? Nam cengmab kvsil apnam pagoqkam, soqg mood soqgv jaq ngo nam nitbo pagoq puiyam bekin dvn.

⁷Sija hoq tulu ham, oyu maadab pwpa kun; soolo otuqb hoq tulu ham no nywywngam tapa maapan, hvb nyima loqkam no hvl bekam suiyv, ‘Kaato, ngo hoq tulu ham cengnum.’

⁸No nywywngam tapa ma, no nywywngam cengma dvn, otuq jaq hoqgv noqg nyurungam mvko maanum. Hoggab ngo jvqtw jaqb cengnum no sur jaqb nyidwn, hoo ko bwwma taab nam bidu-bel tama bo hvl goqknum.

⁹“Ngoqg emin gabsu ngoqg haaxaqnam mam ngo xaqngo gviyin, ngam xik dvbsu ngo hoqham mvturl ap pan, ho ngo nam mvpaq maab nyikam yinpv.

¹⁰Kaato, ngo nam heexor pakun, hvbmabde rup hvb ma; ngo nam hentwrg mvramho pookanum.

¹¹Ngo atwg pagoq gabsu, ngo atwg pagoq gabsu, ngo ham nyidwn, hoggab ngoqg eminam kacdvb mvtayin? Ngoqg yuunam mam asaqkam jinyiram.

¹²Ngam tagabto, Jakub pa, hoo Israelam, ngo goqnum! Ngo su mwv; Ngo otuqkv, hoo Ngo vtwr-anyangv.

¹³Ngoqg alaqkv swcw gwwlam tvpnum, hoo ngoqg lvqbwq alaqkv doa aongam pujinum; hwdlo bulam ngo goqyikam, bulv lvkin gob daqlin dvn.

¹⁴“Nul mwlwngv, doqkum gvdwl hoo tagabto! Hiyv bulug pengko hoqgv soq tulu sam bibwq pakun? At Sw mwam aby dvn; mwwg nyidy sanam mam mwv Bebilonwg aoho nyitayin, hoo mwwg laqpongv Kaldiya nyi tulu aoho ceeko tayin.

¹⁵Ngo, atv jaq goopa kun hoo mwam goqnum; ngo mwam boa pakun, hoo mwv mwwg lamta ho vigo swwta-geetayin.

¹⁶Ngoqg ogumb hvvnwqto, sam tato: beggar yuk jaq hoqgv ngo kvsil gooma, hoqhv hwdlo leng yik hoqgv jaq ngo hoqho dooknum.” Hoo sija Pwnbo At Sw ngam la mwwg yvjam kanam pakun.

¹⁷Soq sib At Sw bedo, noqg Pvlywbo, Israelwg Dvrwqbo Akv: Ngo At Sw, noqg Pwnbov, ngo nam niqtuq lengm dvb tomswr dvn, noqg lamta wdy koam ngo wg bov.

¹⁸No ngoqg gaml tulungam ruucw kwrgabto nyiloqkam! Ho noqg swrsongv pobu tonam hvb nyikam suba co, hoo noqg nyiidar nyiib nyinamv sa-svlo hwqnam hvb nyikam suba co;

¹⁹noqg ko hosiq tulungv xuqx hvb nyikam suba co, hoo noqg hotam tulungv am-temy aaxy tulu hvb nyikam suba co; noqg eminam nywywngam mvpaq maab nyikam suba co ho ngoqg aga hoqgv twrm mvmab nyikam suba co.”

²⁰Bebilon hoqgv lengto, Kaldiya hoqgv kelinto, soq sam hemp goqr lvgab goqr rooto, soq sam pui dupa to, soq sam swcw nvg ywwtwr namgub kanam nvmlwqto; beto, beto, “At Sw mwwg nyera Jakubnvn ywwlin pakun!”

²¹Bulv hvngwr maanum hwdlo mwv bulam diixa-rara bool wg yikho; mwv bulam wlw hoqgv issam tolin mwjnum; mwv wlwngam kuqko tvl hoo issam tolin mwjnum.

²²At Sw bedo, “Nyicbo gab” “Swrso dookma.”