Read Nyishi AIJAYA 49 Bible Online

AIJAYA 49 - Nyishi bible

AIJAYA 49

¹Soiyoqg gvda tulunga, ngam tagabto, hoo aado ho doonbo nyiilungv, ruucw kwrgabto. Mamb hoqgv At Sw ngam goqnum, ngoqg annwg aiyeq hoqgv mwv ngoqg eminam minknum.

²Mwv ngoqg agam mam lyoqr orioq hvreqbo hvb mvnum; mwwg alaqg doonyium uraho ngam kvsil ap dvn; mwv ngam uppuq yvrkiqnam hvb mvnum; mwwg vgeq uraho ngam kvsil ap dvn.

³Hoo mwv ngam benum, “No ngoqg nyerangv, Israel uraho ngam yuum tayin.”

⁴Hvbmabde ngo benum, “Ngoqg nyijongv niqtuq dookma; ngoqg atoram ngo niqtuq dooma dukub ator torpaq paku; hvbsujaqkam jvqtw jaqb ngoqg jvqtwngv At Swg lvgab doodwn, hoo ngam lvqc cidy sanamv At Swg lvgab doodwn.”

⁵Hoo sija At Sw bedo, mwwg nyerab swwm dvb mwv ngam mamb hoqgv ywrnum, Jakubnvn mwwg dookub bookur dukub; hoo lokam Israelv mwwg gab lvkin gob hookum kamyi nvpv— hoggab At Swg kaagaho ngam xidwn, hoo ngoqg Pwnbov ngoqg atorb nyipa kun—

⁶mwv bedo: “Jakubg nyob tulungam ngoqg nyerab swwrab mvnam mam hoo cuml apkunam Israelam lokta bookur deenam mam no anyo gob mwwmab; ngo nam nyob mwlwg mur huto gob mvtayin, ho ngoqg ywwlinamv swcw nvg ywwtwr namgub wc kamyi nvpv.”

⁷Soq sib At Sw bedo, Israelwg Ywwlin bov hoo mwwg Dvrwqbo Akv, hiyam ura jaqb oyumnum, nyob tulungv oyumnum, lvpw atwg nyera tulungam: “Lvpw at tulungv kaapel hoo gorab tayin; lvpw atwg nyega ko tulungv, hoo bulv atv bump tvl xumtayin; hoggab hvbnyiloqkam dengky bo, At Sw gv, Israelwg Dvrwqbo Akv, hiyv nam daalin pakun.”

⁸Soq sib At Sw bedo: “Albo moodho ngo nam birwq pakun; ywwd aalho ngo nam svka pakun; birwl ap nyiilu gob ngo nam pvvtayin hoo nam jitayin, haqpaqnam gvdangam ngo noqg otub doom dvb mvko jidwn,

⁹begamv pvtwq tumnam nyi tulungam, ‘Lvvgwb lengt ku,’ hiyv kan twdwq ho doodwn, ‘Daqlin tuk.’ Bulam lamta mwlwho hootayin; deexa-rara puutu mwlwho bulug nwmw-nwsin dvsv dootayin;

¹⁰bulv kano hvngwr kuram, ho bulam ogbo dooiyv la doonyiv xamdaq kuram, hoggab bulam aya mwwpa bov bulam bool wgtayin, hoo bulam iss buqlin kob bool wgtayin.

¹¹Hoo ngoqg puutu mwlwngam ngo lamta lamda gob mvtayin, hoo ngoqg lamta lamdangv vi yaiya tayin.

¹²Kaato, hoq tuluhv aado hoqgv haatayin, hoo kaato, hoq tuluhv nyoodum toloqkv hoo dou-haaga hoqgv, hoo hoq tuluhv Sien gvda hoqgv haatayin.”

¹³Doa aonga, hemp beminam beto, hoo Swcw nga, yuuto; puutu mwlwngv, bemin bel buqpor lengto! hoggab At Sw mwwg nyiilungam bet-bela pakun hoo mwwg hentwr henbo nyiilungam hang biitayin.

¹⁴Hvbmabde Jaiyonv benum, “At Sw ngam haqpaq paku; ngoqg At Sw ngam mwwpaq paku.”

¹⁵“Nyem dvn akv mwnwg gwwi twwdu bo kongam mwwpa maab nyid nvi yv, ho mwnwg aiyeq hoq nyega ko bwwnam mam mwn hang biimab nyid nvi yv? Bulv mwwpa maab nyis jaqkam, hvbmabde ngo nam mwwpa maab nyiram.

¹⁶Kaato, ngo nam ngoqg alaq laqc koro si ywrlwq pakun; ngoqg agaho noqg bvliv doodu keedwn.

¹⁷Noqg ywrn-pwnbov nyebia jaqb mvdo; nam twrmbo tulungv hoo nam dooxa dvb mvnbov noqg galoqkv lengleq pakun.

¹⁸Noqg vnyiqkv piorab gvdwl taqg-loosaqb kaaka to; bul mwlwngv lvkin gob hookum dvn, bulv noqg dookub haado. Ngo swwl dood deedib, At Sw bibwqdo, no bul mwlwngam gumn hvb pvvl ap tayin; no tvmwngv hoggub tvsw gvnam hvb bulam gvtayin.

¹⁹Jvqtw jaqb noqg mvpaqnamv la noqg dooxa bo nyookv hoo noqg dooxa bo gvdangv- jvqtw jaqb sija noqg dook gab adeq tayin, hoo nam dvmeq bov aado kiyo tayin.

²⁰‘Nyook si ngoqgab adeq jaqpa; ngoqgab doogw ko cwwrw lo ak mvtwb hvl: Ko tulungv noqg mwwdwq-saqk yin noqg nyuru ho jebsil hvraq betayin.’

²¹Ho noqg hang ho no betayin: ‘Hiyv soq tulu sam ngoqgab bwqj-yvqj pakun? Ngo mwwdwq-dwql hoo twrngumnum, nyumwb bool hoo aadob pvvpaq paku, hvbmabde hiyv soq tulu sam boorab pakun? Kaato, ngam vpwb apaqnum; soq tulu si hoqloqkv haapa kun?’”

²²Soq sib At Sw bedo: “Kaato, ngoqg alaqkv nyob tulug aoho irab tayin, hoo nyiilug aoho ngoqg kaacinam mam nyirab tayin; hoo bulv noqg nyega ko tulungam bulug haabo ho boa tayin, hoo noqg nyem ko tulungam bulug gorbw ho baqtayin.

²³Lvpw at tulungv noqg tomswr-hony bo abwb nyitayin, hoo bulug vi-koory tulungv noqg cin-hoonbo annwb nyitayin. Bulug nyuqm lvgab bulv nam ked haty namgub pvxwl xumtayin, hoo noqg lvpiag diimwram yaqxaq tayin. Ho ngo su At Swv hvl, no cengtayin; ho ngam kaaya bo tulungam hvnyw moolw mvram.”

²⁴Nyotum gaql mengnam mam atorbo hoqgv naareq lad nvi yv, ho lvpw atwg nyuum boonam mam ywwlin lad nvi yv?

²⁵Hoggab soq sib At Sw bedo: “Lvpw atwg nyuum boonam tulungam naatayin, hoo lvpw atwg nyuum nootunam mam ywwlin tayin, hoggab hiyv ngoqg lvgab ai-heedwn hoq lvgab ngo ai dvn, hoo noqg ko tulungam ywwlin tayin.

²⁶Nam mvnyi-mviya bo tulungam ngo bulug atwg vdinam dvm tayin, hoo bulv atwg uiyam bulug opo twwnam hvb twwtayin. Ho ngo noqg Ywwlin bo At Swv hvl, hoo noqg Ywwlin bov, Jakubg Atorbo Akv hvl, nyia ko mwlwngv cengtayin.”