Read Nyishi AIJAYA 5 Bible Online

AIJAYA 5 - Nyishi bible

AIJAYA 5

¹Ngoqg tumab abynam gab ngam bemin bemtvb mwwg roo boolu gab ngoqg abynam bemin sam: Ngoqg tumab abynamv diibuqbo yorn galo roo boolu ak doognum.

²Mwv ung dunum hoo hoqg wlw tulungam mvxaqnum, hoo aljaqnbo roongam liilwqnum; mwv hoq ra lvpaho rvky ko soja jag mvnum, hoo hoqho aaxiam raxorko ak mvnum; hoo mwv roo aaxiv xeei nvp hvl kaanum, hvbmabde hoqhv nyoro roo aaxy yab xeeknum.

³Hoo sija, Jerusalem la Judag nyi doonyia bo tulunga, ngam la ngoqg roo boolu pengko ho pw-hwwka to.

⁴Hoqho ngoqg nyimanamv dood nvi yv, ngoqg roo boolu gab ngo hoqgv hvraqb nyisv doodwn? Hwdlo hoqham ngo roo aaxy xeei nvp hvl kaanum, hvbmabde hoggab hoqhv nyoro roo aaxy yab xeedwn?

⁵Hoo sija ngo nulam betam tayin ngoqg roo boolungam ngo hoggv mvtayin. Ngo hoqg sulungam sapaq tayin, hoo hoqham twrm tayin; ngo hoqg bvliam saxia tayin, hoo hoqham caajab tayin.

⁶Ngo hoqham doopaq dvb mvtayin; hoqham mwwr-mvbarl paxaq kuram, hoo iky ningcam la taa-haageqb swwrab mvtayin; hoq aoho nyodo hom mvma dvb ngo doomwqkam kam gaml jitayin.

⁷Hoggab nyiit At Swg roo boolungv Israelwg nambungv, hoo Judag nyiilungv mwwg hempwl liinamv; hoo mwv jvqtw gab kaanum, hvbmabde ywlw twwnam yaab kaado; hoggab dvrwq jvqtw gob kaanum hvbmabde sogoq kiirl xablin dvb kaado!

⁸Mwwdwq mvmto hiyv nam nammwb meekar dvn, hiyv rongo aoho rongo yaada go nvvbw dvn, cuukiq-bvvrw noum akkam dook maadwb naadwn, hoo nyook mwlwg pengko ho no vp-cwkwb doodwb doogw mvp paku.

⁹Nyiit At Sw ngoqg dingrnam mam tapa kunum: “Kvxaq deema naleqgo nam namxiv namram tayin, namt tvl hoo kangam bo nam nvmxy ho nyi dookram.

¹⁰Roo rongo rwqywngv aaxy xees tayin hvbmabde uppum pux gob ala xoorlin tayin, hoo aaxiv hoopum gob xees tayin hvbmabde ginc gob naatayin.”

¹¹Mwwdwq mvmto hiyv komc mikab gorab laiyil, bulv opo twwkwb xarl wdwn, ho bulam opongv ator torgam gab bulv ariyum mam doonyu cuucu dvn!

¹²Bulug lvgab rwwxw-gunggangv, ludum pup tubn nanv la piul tabl hoo roo alangv bulug durum-dvmaq dvk ho doodwn, hvbmabde bulv At Swg bonam tulungam xima dvn, ho mwwg alaqho bon nyinam mam kaama dvn.

¹³Hoqgab ngoqg nyiilungv cenglaq maagam gab nyumwb wdwn; bulug xinam nyiilungv kano dvn, hoo bulug nyi mvqlwngv hvngwr lvgab buqc dvn.

¹⁴Hoqgab Sux-ywlwngv koi yaiyab dwnwl rwwdo hoo hoqg agamv xic lama dvb gamk paku, hoo Jerusalem hoqg xinam nyiilungv la mwnwg nyi mvqlwngv, hoo mwnwn hur-matab dugbov la mwnwn hiyv hemp dvb mvdwn hoqb soolwq tayin.

¹⁵Nyia koam yan mvdwn, hoo vx-ceram anyo dvb mvl dvn, hoo kwr-korwb vnyiq kaan boam anyo dvb mvl dvn.

¹⁶Hvbmabde nyiit At Sw jvqtw ho yuudwn, hoo Dvrwqbo Pwnbov mwv atv dvrwq jvqtw ho kaakin sudwn.

¹⁷Ho bulug rwqtaqho sviyangv nwmw dvtayin, hoo nyetbo pengko hoqg mucu-mviyanam mam tuun-mee koocumbo tulungv dvtayin.

¹⁸Mwwdwq mvmto hiyv nyixiaqbo xaalyo laqso lvgab haadwn, hiyv nyimuram oso seenam hvb seea dvn,

¹⁹hiyv bedwn: “Mwam nyebia mvto, mwwg bonam mwam vnwqb nyimto ho ham ngulv kaapa dvb; Israelwg Derwqbo Akwg tomswr-honynam mam hvvnwq mvmto, hoo ngulv ham cengdwb, ho ham haamto!”

²⁰Hiyv alman boam al gob hoo alboam alman gob bedwn, hiyv kanam huto gob hoo hutongam kan gob kwly dvn, hiyv kacaq boam tiiswr gob hoo tiiswr boam kacaq gob kwly dvn, mwwdwq mvmto!

²¹Hiyv atwg vnyiq kvvlwq koob mwwlaqdvn, hoo atwg kvvlwq koob pw-hwwdwn, mwwdwq mvmto!

²²Hiyv hingwnam tulungv opo twwdu dvn, hoo haakaml nyob pvxbo nyiilungv twwxum xumkwr boam, mwwdwq mvmto,

²³hiyv nyixiaqbo tulu gab pvvb mvjongam kam naadwn, hoo nyi nyiisam nyidy-wdynam mam nyijab-nyiyiq boam mwwdwq mvmto!

²⁴Hoqgab, wmv hoggub piilam guiyumnam hvb, hoo sengn bo nwmwngv wm mvi hoo yoqlwqnam hvb, hoqgab bulug rwbv yoocu-yaiya tayin, hoo bulug opungv diimwr hvb juupaq tayin; hoggab bulv nyiit At Swg pvvbam haqpaq pakun, hoo Israelwg Derwqbo Akwg gamlam haqpaq pakun.

²⁵Hoqgab At Sw mwwg nyiilug aoho haaxaqnum, hoo mwwg alaqkv bulug aoho laqlinl ceeko banv hoo bulam jwwnum, hoo puutu tulungv hwqdinum; bulug svmangam lyobu pengko lo ngurpaq tvl doonum. Hoggab soq mwlw si mwwg haaxaqnamv xvqngin maata, hoo mwwg alaqkv hvraqb ilin lingdu dvn.

²⁶Mwv aado hoqg nyob asaqkam kaalaq mvdwb muxnam akam hwca tayin, hoo swcw nvg ywwtwr hoqgv bul gab koxio tayin; hoo kaato, bulv nyebia jaqb taiyam bioqnam hvb haatayin!

²⁷Akkam nyelin-dorsram, akkam dwqtubram, akkam yubtap ram ho yubram, soruqkam vcwr gokam toosuq ram, caataqnan oso ngvkam bupiq ram;

²⁸bulug uppuqkv yvkiq jaqpa, bul mwlwg illiam seea paku, bulug svpur lvpiv wlw hvb kaado, hoo bulug duql wnanv cwkeq-lvmeq hvb pwrdo.

²⁹Bulv sony nyot ak hvb dugum do, bulv sony nyot nyopangv dugumnam hvb dugum do; bulv ngamlayil hoo bulug dvdynam mam cetab dukun; bulv ham baql wgdvn, hoo hiyvkam ham mwpy nyoma.

³⁰Bulv sa-svlongv lumbo namhvb, hoq aalam hoqham ngambo tayin. Hoo nyi ak gvdangam kaab nyiloqkam, kaato, kanv la mwwdwq-saqkv; hoo hutongam hoqg doomwqkv kan dvb pulup dvn.