Read Nyishi AIJAYA 50 Bible Online

AIJAYA 50 - Nyishi bible

AIJAYA 50

¹Soq si At Sw bedo: “Hoglo nulug annwg tumin sunam potangv, ngo mwnwg lvgab kanam nvmlwq tvl wpaq mvnamv? Ho hogloq ho ngoqg ceego bo nyi tulungam hiyam ngo nulam puqknum? Kaato, nulug nyixiaq ko-gab nulam puqnum, hoo nulug nyic ko-gab nulug annam aadob roopaqnum.

²Hwdlo ngo haai kukho, hoggub nyi akkam doomanum; hwdlo ngo goqyikho, hoggub nyi akkam goqrwq maanum? Ngoqg alaqkv otu tvl, hoqham pvlyw nyoma dvn yv? Ho ngo naalin dvb huqlw dooma dvn yv? Kaato, ngoqg yolu begam gab sa-svlongv pwtwl xoanum, ngo pobu tulungam diixa-rara gob mvdwn; hoqho doonbo nguiyv iss dooma ko-gab sil naiya dvn hoo hvngwr gab sidwn.

³Ngo doa aongam kaiya bo doomwq lvgab vj koom pan hoo bulam tuila vjam pomlup pakun.”

⁴Pwnbo At Sw ngam tomswrnan lyolam jipa kun, ho mwwdwq boam ngo agam gomcwr lvgab bet-bela dvb cengpa ku. Ar roxiam mwv huurab mvdwn; hiyv tomswr yikam tvnwnam hvb mwv ngoqg nyurungam tvnw mvdwn.

⁵Pwnbo At Sw ngoqg nyurungam mvko jipa kun, hoo ngo taleqbo hvb nyimanum; ngo langkwb tobkur maanum.

⁶Hiyv jwwdwn ham ngoqg langkam jwwm dvb jinum, hoo hiyv nvmmam pulin dvn ham ngoqg coqpiangam pwrga jinum; ximanum hoo tacor curyaqnum hoqgv ngoqg nyuqm mam ngo kvs maadwn.

⁷Hvbmabde Pwnbo At Sw ngam svka dvn; hoqgab ngam ximab nyimanum; hoqgab ngoqg nyuqm mam mootar talar dvb mvpan, hoo ngo cengdo ngam hvnyw moolw mvram.

⁸Ngam nyiidar nyiib mvdy bov ogum si doodo. Hiyv ngoqg lvgab ai-heenyi tayin? Kuj ngulv lvkin gob daqrab tuj. Hiyv ngoqg ceebiongv? Mwam ngoqg ogumb hvvnwq mvto.

⁹Kaato, Pwnbo At Sw ngam svka dvn; hiyv ngam nyixiaqpa hvl bibwq tayin? Kaato, bul mwlw jaqkv vj nyanam hvb nyapaq tayin; tvgiqkv bulam dvpaq tayin.

¹⁰Nulug pengko ho hiyv At Swn bosdvn hoo mwwg nyera tulug goonam mam tvjw dvn? Hiyv kanho wl yvdwn hoo huto dooma dvn hv At Swg eminam mwwjwto hoo mwwg Pwnbo aoho svqgw to.

¹¹Kaato, nul mwlwngv hiyv wm rwgab dvn, nulv hiyv atv wm muram rwgab dvb cenglaq dvn! Nulug huto dvb wm mur rwgab kunum ho, hoo nulug wm huto ho wl yvto! Soq sam nulv ngoqg alaq soqkv naapa kun: nulv hentwr kaanyil geqpwl dootayin.