Read Nyishi AIJAYA 51 Bible Online

AIJAYA 51 - Nyishi bible

AIJAYA 51

¹“Ngam tagabto, nulv hiyv lootwngam meegaq bov, nulv hiyv At Swn meegaq bov: Rogabl kaaka to hogloqkv nulv wlwngam taqlin dvn, hoo hogloqkv nulv wlwngam dulin dvn.

²Nulug ab Abrahamnvn hoo nulam ko bwwnbo Saranvn kaaka to; mwv su goqnam akv hwdlo ngo mwam goqnum, ho ngo mwam dumtwq-miilyw swwlin mvdwb lvqc cinum.

³Hoggab Jaiyonam At Sw bet-bela dvn; mwv mwnwg dooxa bo nyook mwlwngam bet-bela dvn hoo mwnwg deexa-rarangam Iden boolu hvb mvdwn, mwnwg diixa-rara gvdangv At Swg boolu hvb nyinam; hwnyir-hvmarnamv la nyirmin-soominamv mwnwg uraho dootayin, paqyalinco hvl beminam yalam tapa tayin.

⁴“Ngoqg nyiilungv, ngam tagab jinjin to, hoo ngoqg nyob tulungv, ngam ruucw kwrgab to, hoggab pvvb ak ngoqg soqgv lvvgwb lengtayin, hoo ngoqg lootwngam ngo nyiilug huto gob mvtayin.

⁵Ngoqg lootwngv ogumb hvvnwqdo, ngoqg ywwlinamv lvvgwb lengn kuba, hoo ngoqg alaqkv nyiilungam pw-hwwtayin; soiyoqg nyook tulungv ngam svqgw dvn, hoo ngoqg alaqkam bulv kaayal doodwn.

⁶Nulug vnyiqkv doa aob koodu to, hoo swcw nvg urangam tuugabl kaaka to; hoggab wm mwk hvb doangv nyiinba, swcwngv vj nyanam hvb nyanba, hoo hoq uraho doon mwlw hv hoq hvbkalam nyiitayin; hvbmabde ngoqg ywwlinamv nwrba gob dootayin, hoo ngoqg lootwnamv nywywngam xooram.

⁷“Ngam tagabto, nulv hiyv lootwngam cengn bov, hiyvg nyiilu hang lo ngoqg gamlv doodwn; nyi tulug benyi-beyanam mam bos maabv, ho bulv bej-bepar yin hang homabv.

⁸Hoggab vjam tog dvnam hvb bulam dvtayin, svcaqkam topum dvnam hvb bulam dvtayin; hvbmabde ngoqg lootwngv nwrba gob dootayin, hoo ngoqg ywwlinamv hotam-hotamb dootayin.”

⁹Huurabto, huurabto, ator torabto, At Swg alaqka; huurabto kolwg mood hvb, otuqg wkbo hotam-hotam hvb. No Rahabnvn vmwq yumgub twqma namyv, ho hiyv mucum lvvr-laanyiam nwqlwqnum?

¹⁰Sa-svlongam, ho vcjaqb urabo issam pwtw dvb mvnbo no maai yv, ho hiyv sa-svlo ura boam lamta hvb mvtwl pvlywnum nyi tulungam wpeq mvma namyv?

¹¹Hoo At Swg hiqlinamv hookur tayin hoo Jaiyon ho bemin beg dvl haato; kuiyum xaqb bulug aoho hempv dootayin; bulv nyirmin-soominam mam la hempam hengpa tayin, hoo mwwdwq kvla moonam ringnamv keleq tayin.

¹²“Ngo, ngo atv su nulam bet-bela dvn; nulv hiyv nulv hoggab sinbo nyiam bosdvn, nyia ko tuupam nwmw-nwsin hvb pwpa kun,

¹³hoo nam ywrnbo, At Swn mwwpaq paku, hiyv doangam pujin bov hoo swcw gwwlam mvnum, hoo mvnyi-mviya bov hang lingtwr ko-gab nulv aal looxiam bos soky dvn, mwv atv twrdwb mvl apnam yv? Hoo hogloq ho mvnyi-mviyanamg hang lingtwrnamv?

¹⁴Hiyv pvxwl xumn boam nyebia jaqb tolin tayin; mwv siram hoo nilbo batamb ipoqram, ho mwwg dvsv pwwmab nyiram.

¹⁵Ngo noqg Pwnbo At Swv, hiyv sa-svlo issam hwqdin tvl ho hoqg iss suduq duqnamv dugum gumdwn- mwwg eminv nyiit At Swv.

¹⁶Hoo ngoqg gomcwr tulungam ngo noqg agam ho vlwq pakun hoo ngo nam ngoqg alaq doonyium ho doom dvn, doa aongam mvp pan hoo swcw nvg gwwlam mvl ap pan, hoo Jaiyonam begamv, ‘No ngoqg nyiilungv.’”

¹⁷No atv huurabto, no atv huurabto, Jerusalema, daqrabto, no At Swg alaq hoqgv mwwg hang lingtwrnam pvtaq hoqgv twwn bov, hiyv dooxa bo pukaq hoqgv twwtwl ho loml nyirabnum.

¹⁸Mwnwg ko bwwnam tuup pengko hoqgv mwnwn tomswr-hony bo akkam dooma; mwnwg tuup sorabnam pengko hoqgv mwnwn alaq gvbwl boonbo akkam dooma.

¹⁹Soq pagoq goqnyi si nam nyipa kun— hiyv nam mwwp dvb betayin?— yuupaq-caapaqnamv la ocu-aiyanamv, dwr-kano ngvla lyoqr orioq niqtuq hoqgv; hiyv nam bet-bela tayin?

²⁰Noqg tuup tulungv swnyiq-svnyiaql laanyi kuma; sudumv wswq uraho gel karnam hvb bulv lyobu buuxy lo gel kardo; bulug aoho At Sw hang lingtwr twrya do, noqg Pwnbog yolu ruqnam gob nyido.

²¹Hoqgab sam tagabto, no hiyv hentwrnum, opo hoqgv twwxum maasu, hvbmabde twwxum pan hvb nyinum:

²²Soq sib noqg At Sw bedo, noqg Pwnbo, At Sw mwwg nyiilug pagoq gab mvnyi-moiyu dvn: “Kaato, ngo noqg alaq hoqg hur-marabnan pvtaqkam naapa kun; no ngoqg hang lingtwrnam pukaq hoqgv twwpa kuram;

²³hoo ngo hoq tulu ham nam hentwr hembo tulug alaqho vlwq tayin, hiyv nam benum, ‘Pvxwl xumto, ho ngulv caabol wleq tayin’; hoo noqg langkam no lamta deela hvb hoo bulug caataml wpeqko lamta lyobu hvb mvpa kun.”