Read Nyishi AIJAYA 52 Bible Online

AIJAYA 52 - Nyishi bible

AIJAYA 52

¹Huurabto, huurabto, Jaiyona, noqg atoram torabto; noqg kangam bo vj tulungam kooto, dvrwqbo bopam, Jerusalema; hoggab pepaql-mux mvmanamv la dvrwq maanbov noqg dookho lokkam haakram.

²Diimwram no atv dudin peel hoo daqrabto; ho doato, Jerusalema; Jaiyonwg nyuum boonam nyem ko tulunga, noqg lwwgu osongam poqsuqto.

³‍Hoggab soq sib At Sw bedo: “Nulam hog dooma dvb puqnum, hoo nulam twngk hiqmab pvlyw tayin.”

⁴‍Hoggab soq sib Pwnbo At Sw bedo: “Ngoqg nyiilungv otuqcob Ijipt nyook bolo nyiogy gilnum, hoo Assiriya nyi tulungv bulam hog yolu doomab mvnyi-mviyanum.

⁵‍Hoqgab sija ngo si dood kun,” At Sw bibwqdo, “Kaaknamv ngoqg nyiilungam hog yolu doomab nyumwb boopa ku? Bulam pvvb bwwl doogbo tulungv goqlam-goqcamnum,” At Sw bibwqdo, “hoo aal-aiyib ngoqg eminam xima-paqma dvb bekynum.

⁶‍Hoqgab ngoqg nyiilungv ngoqg eminam cengtayin. Hoqgab soq sam ngo bedwn hvl hoq aalam bulv cengtayin; ngo si doodwn.”

⁷Hwdjaqgo kangam namgo hiyv puutu tulungam liqbol tugu puiyam baqa dvn, hiyv swrsongam betam dvn, hoo hempbo tugu puiyam baqa dvn, hiyv ywwlinam mam betam dvn, hiyv Jaiyonam bedwn, “Noqg Pwnbov pvvb bwwl doogdvn.”

⁸Nulug kaaya bo nyi tulungv sogoq goql—bulv bulug sogoq kam vcjaqb goqdo; bulv hwnyir-hvmarl lvkin gob bemin bedo; hoggab bulug vnyiq jaq hoqgv kvvbw dvb At Swg Jaiyon lo hookurnam mam kaado.

⁹Jerusalemwg dooxa-xaaram bo nyook tulungv, lvkin gob beminam bedo, hoggab At Sw mwwg nyiilungam bet-bela pakun; mwv Jerusalem mam pvlyw pakun.

¹⁰At Sw mwwg dvrwqbo alaqkam nyob mwlwg kaagaho asar dvb kaatam pakun, hoo ngulug Pwnbog ywwlinam mam swcw nvg ywwtwr namgub kaapa tayin.

¹¹Wleqto, wleqto, soqgv lvvgwb lengto; kacboam idaqmabv; mwnwg pengko hoqgv lvvgwb lengto; nulv hiyv At Swg dupum-dvrab pam bwwnbov, nulv atam atv darxaq suto.

¹²Hoggab nulv nyebia jaqb lvvgwb lengram, hoo nulv nyebia jaqb nyiody booram, hoggab At Sw nulug otuqho wtayin, hoo Israelwg Pwnbov nulam langk-haabob rvky tayin.

¹³Kaato, ngoqg nyerangv pumb rwnam jaq hvb nyitayin; mwam ao bvla koi dvb joorab tayin, hoo yuupw tayin.

¹⁴Nyiingv nam naleqgo lomtayin- mwwg nyuqtuq-moorv moiya-rvxanum, nyia ko nyuqtuq-moor hvb nyik maanum, hoo mwwg gv vpv nyia ko hvb nyik maanum-

¹⁵mwv nyob naleqgo nyedar darxaqtayin; mwwg gab lvpw atv naleqgo bulug agam mam gomtum tayin; hoggab bulam betam maanam pagoqkam bulv kaapa kun, hoo bulug tapa maanam mam bulv cengpa ku.